“BUT AS FOR ME, IT IS GOOD TO BE NEAR GOD” Psalms 73: 28

“BUT AS FOR ME, IT IS GOOD TO BE NEAR GOD” Psalms 73: 28

Pastor Dongzathawng

Devotional  # 40 ( Vol 3)

Fellowship of Thirsty Souls and Hungry Hearts

Thirsty souls member te Topa Thupha!

Mangpa lungmuanna in tunin  na hinna hing luadim ta hen!

Na thei phah lou leh na lamet lou akipat in Thilhoi  pipi in hing tun khum ta hen!

I dam chiatna uh maw.. tujing kal noute ading athum jou dep in himi msg ka hing gel sawm hi.

LAMENT PSALMs series 3 tah i gel ua, nou asim te zong na gim ding ua, kei agel pa zong ka lel mama hi. Ajieh pen topic gih leh hahsa mama khat ahi. Ahiin tu in i gal kai ta uhi. I tawldam ta uai, i jaang ta uhi.

Pasian khu I pa ahi a i ut teng i genna thei  ahi. Aman gamla a, gal um diing in  hing dei lou hi. Aman amai a ki im leh ki suangla ding in atate khat zong dei lou hi. Nainou tah ama toh kithua a heart to heart,  face to face a ama toh kithua ding in hing dei hi. AMa kung a bangma im leh phual lou a ihina bang a ki sua khe ding in hing dei hi.  Ama inai sem leh ilung sim a kiphual gu tawm ding hi. Mihing khat toh kinai na ding in ihina a kiphual gu bei deu deu hi. Tua mabang in Pasian in I im im, i phual phual I lungsim a umte sua khia a, Ama  hangsan tah a juan ding in hing dei hi. Tua khu ahi LAMENT PSALMS in atup pen. Tuabang  a BIble a misiang thouten Pasian anai chiang un a lunggim, lungthah, lung sim gih apat in Pasian  in damna  leh jaangna pia in, phatna leh biahna in tawp jel uhi. 

Khumi khu ahi LAMENT PSALMS in atup pen. Complain a kipan a complain ah top ngai lou hi. Naupang in a nu apa kung a  lungkim lou teng agen jou chiang damna leh navah leh kipahna in juijel hi.  A nu it apa it kung a  alungthahna leh lungkimlouna gen jou  in   a ngaima  toh  kile kia um lou uhi. Ajieh pen anu apa itnna leh ang lum in a natna leh a liamna teng top kang in dam sah hi. 

Tuajieh in Lament pslams  a akap leh mau leh lungkimlouna,lungsim natna teng Pasian kung a suakhia  jou a, angei ngei a ki nua le kia um lou hi.  Phatna leh worship ah tawm gigie hi. Tua ahi Lament psalms a manphatna. 

Dark Clouds Deep Mercy laibu gelpa Mark Vroegop in:

"Without lament we wont know how to process pain”  chi hi.

“Lament is the language of a people who believe in Gods sovereignty but live in a world with tragedy.”

"Lament is the prayer language for those who are struggling with sadness”

"Lament is  a path to praise as we are led through our brokenness and disappointment chi hi

Lament is the song you sing believing that one day God will answer and restore.”

"Christians affirm that  the world is broken, God is powerful , and he will be faithful, Therefore, Lament stands in the gap between pain and promise” 

“Lament is more than tears and crying. Lament is the bridge between dark clouds and deep mercy” 

Tuate ngaitua kawm in tunin “kei ading in Pasian nai a khu hoi pen hi” chi pansan in i houlim ding uhi,

Tuni Topic: “BUT AS FOR ME, IT IS GOOD TO BE NEAR GOD” Psalms 73: 28

A tung a Bible chang khu ka bible chang dei pen te lah a khat ahi a,mi tampi Bible chang dei ahi. Ajieh pen Abraham Lincoln in gen bang in ”I have been driven  many timess to my knees by the overwhelming conviction that I had no where else to go” chi hi. Tamvei pi i puah gih, i lungnatna leh i buaina ten taina ding dang nei lou in Pasian kung ma ah hing tai lut sah hi.

Himi topic pansan in hi Thirsty souls mama ah zong ina houlim ta hi. Hinanleh tunai in Pasian in nasah tah in hing houpi kia hi. JIngkal khat Dr Muankim in “Kei ading Topa naih hoi pen hi” chila khat ama sah audio record hing thot hi. Ama Doctor ahi a lasa mi  or album bawl ahisih hi, Hinanleh a testimony la ahing sah dan  ahijieh in i lungsim khoi hi. Ka ngai tua a:“aw Doctor khat ni zong “kei adin Pasian naih hoipen hi” chi ki im jou nonlou a la sah  siam lou sasa ang sah thei leh. Khawvel vang Pasian nai lou a um jou na mun hilou hi.  Michin in lunggimna leh puahgih kinei chiat chi. Kumpi hiin, Dr hiin, politician hiin, officer hi in, koi milian milal hitaleh Pasiannai thei te a hampha himai hi.” chi hing ngai tua sah hi.  Himi thu ka ngatua jel a, tua chiin jingkal khat Pasian Hagau in himi topic apat in  sermon piching khat leh article piching khat zong himi Bible chang leh himi thupi pansanin Pasian in hing pia hi. Ahiin tunin tuateng i gen man sih ding hi. Tomkim tah in  i houlim ding hi.

Bang ding a Pasian nai khu ei ading a hoi pen adiai?

Ajieh pen mundang ah bitna um lou hi. I pai na lam lam a liamna, ling leh khau, lungthahna, nual na ngen kituah hi. Khawvel in , i chit lou dan leh i mipha lou dan, i chau dan, ineu dan,i jawn dan,  i hatlou dan ngen hing musah hi. I aw ja tam jaw khu “nang na chit sih, Nang na mu jou sih ding, Nang na hoisih, nang nam ngiam, nang insung ngiam, nang na  ching jou sih ding’ chi ngen ahi.

I pai na lam lam khu liamna thei leh lung natna thei ngen ahi. Ling leh khau in i lampi tuam hi.

I it pen i ngai pen i ji , i pasal, i ta, i lom hoi pen, i nu i pa, i sanggam leh hagau a i lom leh i seppi te tanpha zong mihing ahi ua, a mihing hina uh hing kilang in, i thuah khawm natna leh gimna hing pia tu in pang thei uhi. Thal tang hiam bang a hing kap kap te khu melma te hi lou hi.  

I lam- et penpen te apat in lungsim gimna leh natna ki mu ut jel hi. Tuajieh in khawvel vang muanna mun, mun bit leh mun hoi hisih e maw i chi chang tam hi.

Khujieh in Pasian kung nai mama a um khu gingtu  hagau liam leh puahgih in avuh dim, guallel leh lawsap kisa, thatawl leh chau te ading in lampi dang um lou hi, Pasian nai chilou mundang taina ding um lou hi. Pasian halima nuai bou ah bitna leh muanna um hi. 

Khujiehin Korah tapa ten “mun dang a ni 1000 umsang in Pasian in huang a nikhat um  ahoi jaw”chi uhi,

AJieh pen tua mundang ki chi khu gualnopna, vacation, leh khualjin leh hun nop tah zong himai thei hi. Lawchinna, pahtoina, minthanna te zong hikha ding hi. Hinanleh Pasian pang lou in thildang jousie khu lunggimna  ah tawp jel hi. Lungmuan na tah tah hing pie thei lou hi. Jeremiah l 2: 13 a Ka miten kei  hinna tui hing ahi tansan ua, tui khawl thei lou, tui bawm, a tawvang, a dei jaw uhi achi toh kibang ahi. 

 

George Mac Donald thugen “whatever a man does without God, he must fail miserably or succeed more miserably” a chi khu dih hi. Pasian panglou a, lawchinna, sum leh pai, hausatna, inn leh lou, gam leh gua, nei leh lam, nopsahna, kai sangna kichi te khu tuibawm a tawvang tui khawl thei lou, kangpai pai  toh kibang hi. 

Tuajieh in mihingte, dangtahna shithei lou, lungsim tawng a thawm hauna bei thei lou, dangtahna  tai thei lou toh hih leitung hamsietna dam a khawsa  ten Pasian umna ngai vungvung uhi, Bangma dang in hing sutai thei lou hi.  Tua bangma ding a Pasian in ahing siem ahi. Mihing te  hinna a lungsim thawmhauna, John W. Frye gen dan in  GRAND CANYON chia a lian,  ihinna a hawmguah khu bangma dang in lua dim thei lou hi. French Mipil pa Blaise Pascal in agen gen Mihing hinna khu TRADMILL kipei bang a tawl nga thei lou, i hinna sungnunga hawm guah( Vacuum) a  um hi, Tua khu JESU ma in alua dim  lou leh bangma in lua dim thei lou hi.

Khujiehin mundang a ni sang khat, ni sangsom bual nanleh lungdimna um thei lou hi. Lungkimna tah tah khu PA kung ah um hi, Pa Ang sung ah um hi.  Tapa taimang pa tanchin ah kilang siang ta hi. 

KHujien in mun danga ni 1000 um a, nopsahna kichi teng in zong ahing pia thei lou khu tomnou or nikhat mai Pasian inn a Ama nai a umna in hing pia thei hi.  Ajiehpen ama khu HINNA TUI HING ahi. 

Ajieh pen Ama kung ah ihi na bang apawm na leh saanna um ( acceptance and belongingness). Ama kung ah nualna leh mawpaihna, ki tuambawlna, ki ning bawl na, ki engbawlna umnon lou hi . 

Aman ihina atheisa ahi bang in ihi na bang in hing pawm hi. I natna, i liamna, i puahgih, i guallelna, i lung neu na,i jumna, i ki suanglana, i ki awimawna te abawn in thei a ; Kisuang la lou leh, ki awi maw lou leh, ki ngaisie lou a ihi na bang  bang a hangsan tah leh ja-len tah( suahta tah) a ama nai a um diing in hing chial in hing na ngah jing hi. 

Ama kung ah judgmental, condemning spirit um non lou hi. Ihina bang bang in hing pawm hi.

Tulai ka taneu pen Khum Rimoi in  ahun ahun in ka umna room ah hing taijel in a ute tung a alungkim lounate hing report hi. Achang ah kap sa in hing tai lut hi. Keikung ang tun phot leh kap sa in kile kia ngai non lou hi. A lut  a ang lut leh a buaina veng himai hi, Ajieh pen kei aw ajah a, ken ka panpi chi athei nah leh hangsan tah  leh kimuang tah in pot kia ngal hi. Ajieh pen midang kunga nualna, leh demna, tuam bawlna leh, musitna atuah te khu kei kung ang tun chiang theisiemna leh pomna,  hepina  leh itnatoh ana kilam dawn gige hi chi thei hi.

khawvel apat i thuah liamna, natna, gimna, lungkim louna, jumna, guallelna, musitna, tuam bawlna lawsapna teng toh I Pasian kung iva nai chiang itna leh hepina leh theisiam na toh Aman hing na lamdawn a, ama ang lum ah i natna, i gimna leh i liamna teng jun mang hi. Vai gei in, a jawt dan zong siam lou in, a gen  siam lou, kamsiamlou ham dan zong siam lou  hinanleh itna baan lianpi jah sa in hing na vaidawn hi. 

Ajieh pen ama itna leh hepina in sildang jousie beimang sah hi. Tua i gimna, inatna, i liamna, i jauna, power teng ama itna in  a gu teng beimang sah hi.

Philip Yancey in “The main purpose of prayer is not to make life easier, nor to gain magical powers, but to know GOD, I need GOD more than anything I might from GOD”

Paisan kung a iva tai chia a lamdang mama khu eiten ibuaina leh i jauna, i gimna leh itahsap te jiehin i va tai jel uhi. Hinanleh A man tua teng sang a poimaw jaw hingna pia hi. Tua khu  bang dang hilou in AMA LEH AMA hing kipia hi. Tua AMA  mel hoina leh thupina vah i mu chiang thildang teng mual bei in, i dei mama, dei seng a ika ngut ngut , i hinna pumpi hing lua dim te khu AMA vah ah mial in, vul mang siang ta hi. *AJieh pen AMA imu chiang thildang kidei non lou hi,  

Khujiehin Philip ma in “ Though my needs may drive me to prayer, there I come face to face with my greatest need: AN ENCOUNTER WTIH GOD’S OWN SELF” chi hi. 

Aw ei lah tua sum nei khat tahsap jieh, mi khat hing bawl siet jieh, thuse khat i jah jieh, ahing ki nual jieh, lawsap i iki sah jieh, khoi tah e khat a ivai pai fuhlou kisah jieh, bang e khat dei jieh a PAISAN iva nai lai in amaan tuate hing buaipi sah nonlou in ATHUPI  JAW , Aman pha jaw AMA MEL, AMA THUPINA hing ki mu sah in, a hepina tui hing dawn sah in,  a khawtuana lui ah hing ki sil sah , hing ki jap sah in, a loupina toh hing tuam hi.

Tuabang a  AMA mualsiang thou a  VAN huikhua  dih a,  Christ Hausatna ahoitah a muchian ten hun sawt pai nai lou a puahgih leh, a liamna, anatna, a lungthahna te khoilam a um e chi thei non lou uhi, Ana dei mama uh a kaa pi pi uh, dei seng a Pasian kung a anget nget uh khu tu in a value teng bei ta himai hi. A dei ding dan leh a manna ding thei non lou uhi. Bang jieh a ana dei uh e chi zong thei jou non lou hi.  *Ajieh pen tua a thilmu uh, a thil tuah uh, a thil thamkhah uh,  athil nei tha uh thupi seng ta hi.

Khujieh kumtampi pai ta a Europe gam a misiangthou JULIAN of NORWICH in “ GOD OF YOUR GOODNESS GIVE ME YOURSELF. FOR YOU ARE ENOUGH FOR ME. IF I ASK ANYTHING LESS I KNOW I SHALL CONTINUE TO WANT. ONLY IN YOU I HAVE EVRYTHING” chiin ana thum hi.

Pasian nai a a kunga tailut ten a thil tup leh adei, abuaina uh suhveng mai hllou  Van huasatna leh Pasian hoina leh thupina vah nuai ah VAN huikhua ah va um uhi.

Khujieh   Christophe Morely in “ I had million questions to ask GOd; but when i met HIM, theu all flet my mind; and it did not seem to matter”  chi hi. Lungsim puah dih leh thei siam louna dim, liangvai leh mangbang gingtu in Pasian nai a va del ua, a umna mun a ava bual jou ciang un  apoimaw, a thei siem lou, a lungthahna leh a thei siem loute uhkhu AMA vah in  abawn a hip mang in poimaw sa nonlou uhi, Buai non lou uhi. 

Isreal tate gul tuh a, gulgu thuah la ten SUM GUL kikhai a et chiang un a thuah la uh, a shi pi ding kisa GUL  GU khu CROSS in top kang in, damna automatic tung chat chat hi. 

Ama umna iva nai chiang i lunggimna, iliamna, i gimna guu teng khu a ma itna in topkang siang in, koima Pasian ang a um jou in  aliamna gu toh hing pot khia non lou hi. 

Khujieh in FW Roberson i “Pray till prayer makes you forget your own wish, and leave it and merge it in GODs will” chi hi. 

Tunin bang ding a kei ading a Pasian nai khu hoi pen e?  ajiehpen mundang jou sie khu  kei ading a mun bit lou leh mun  dengdel ahi. Mundang a nual leh dei lou, ching lou leh tah lou, sanglou leh pom lou, musit leh nuaisie in ka um hi.  Ahiin ama kung ah ka hina banga pawmna, theisiamna um a,  abaan jang lianpi kei ading in ki hong jing hi. *Ama umna ah damna, lungmuanna, hamuanna, halna, navahna, tha ngahna, ki suh halna, ki tungdihna , kipat thahna, ki dua thahna  um jing hi.

Ama umna ah ki tuam bawlna, ki nualna, ki housietna, ki el kouna um lou hi.*   A umna kima damna hui khi laang a, hepina huikhua in tuam hi. Ama umna kim a natna leh liamna um thei non lou hi.  

Aman ka hina teng a theisa ahi a, ka gimna leh ka liamna, ka puahgihteng thei hi. Ama’n tuate hing puahjang sah vang, hiing dam sah vang, hing veng sah vang chiiin hing chial chial hi. Ahiin hiteng sang a hoi jaw leh hite zong te thei lou AMA mel vah leh thupina leh hausahna thuguh hing musah ut hi. Ama kung a tailut te kung ah *“na khuchi a, na tua chi a, nang jieh a, nang chatvai chia in”chi te kamsua toh kimaw sah a, ki suanglah sah na kam mal ki jang ngei lou hi, Ahilou leh ;” na tua chia na hi chi ta veleh, tua chi ding lai tu in hichi ta,,, aw ana khu chi ta leh chin,,aw ana um hoi ta le chin aw,,,” chi te a mi ki oimaw maw na ding ki gen sah sah non lou hi. Tapa taimang pa  A pan ana lamdawn dan khu I Pa Pasian in a ta INNLAM juan aki le kia te a vai dawn dan chet I Mangpa Jesu in ahing hil dan ahi. HIbang lou dan  a I Pa Pasian ahing ki hil khah leh I Mangpa Jesu kipah lou ding hi. A jieh pen aman apa hina ahilou tah a ki present ding khu dei lou hi. 

Tulai dieh dieh ka loinu Course jieh in jaan 2 AM tan tan alai simna ah agei a ka tou pi jel hi. Khujiehin jingkal vai gei deu mai in ka thou  jel uhi. Hinanleh vaigei mama hina pi Pasian toh ka hun jang ding a ka um chiang in “na vai geita, bang bawl a tu pan pan a hing a kisa,. jum lou maw, “ chiin hing na nual mong mong lou in, hing na ki hei san vawt lou hi. Nidang a, ang pawl bang in hing  pawl veve hi. Ka Pasian khu theisiamna dim hi e chi ka mu deu deu hi. Ahing pawl mai hilou in sermon thah thah, message thah thah hingna pia  na lai hi.  Aw Pasian kung nai a um nop hina mai e maw!

Khawvel milian, mi jatat huai te kung a i va pai chiang protocol: hamdan kilawm, kichei dan, neh dan, tou dan ki lawm ki jui a  gim huai mama hi. Ahiin ka pa kung a ka um chiang bang ma dan jui ding um lou hi, Ka hina bang in  free tah in ka um a, ka lungsim a um bang ka gen a, a aang a tawl dam tah in ka um hi.  Bawl tawm bangma um lou in jangkhai leh tawldam tahin ama nai ah ka bual thei hi.

Khujieh in kei ading in Pasian nai a um khu hoi pen hoi pen jing hi. Midang ten a ut leh gualnop party leh hattuam vai leh, mobile leh a ut ut uh bawl ta uhen.. ken vang ka Pasian ma ka nai ding a Psalm gel tu  gen bang in “ One thing have I desired of the Lord, that will I seek after; that I may dwell in the house of the Lord all the days of my life, to behold the beauty of the Lord, and to enquire in his temple” (27:4)  chi khu niteng a kei lunggul pen leh seppi pen hita hen.

Keibang hatlou, ching lou, siam lou, koiman hing na sangin, hing na dei lou maithei. Hih leitung vang mi bawl thei leh, hat leh siam, hau leh chit te mun ahi. Ahiin Pasian in keibang hing na nuallou, hing na saang gige, kei bang leltah ka vai gei ni, ka thasietni, ka baani leh ka bawlkhiel ni nasan  a zong hing nual lou a, hing  awi maw lou leh tai lou a hing na pawm leh sang gige PASIAN nai a um khu kei ading in hikhel a hamphatna dang um sih e.

Mangpa’n nang zong ama nai ut jing te lai ah hing pang sah ta hen!

Topa Thupha!