Ding a Ki Ngai Khu Pilvang Hen Tuachilou in Apuh Kha Ding Hi

Ding a Ki Ngai Khu Pilvang Hen Tuachilou in Apuh Kha Ding Hi

Dr. Dongzathawng

Devotional #  34( Vol 3)

Thirsty Souls member te Monday Ni jingpha leh chibai!

Kal khat hing gal kai sah a, kal thah hingmu sah I Pa Pasian min thupi ta hen!

Tulai Covid jieh a  shi na natna leh lockdown te um jing nanleh Pasian hoina ki chiangtanlou in ni tah hun thah hing pia hi. Adieh in I singtangme Singthupi tam lai tah ahi a, ka dei tawh in ka ne a tui hina mai jen e! Koi KFC, Pizza te bang in ki sim sih. Tualeh singtang me ajatjat te toh I pa Pasian in ahoina ahing lahsah jing jieh in Amin thupi ta hen! Mangpa Kipah inge!

Covid jauhuai dan kigen gen, mi adia i thum thum lai in Lamka lam a kou inn kuan zong ahing zial kha a, ka buai chiai chuai man uhi. Hinanleh atate thumna dawng in tu nin a hoilam ah hing umsahta hi. Thumsah tute  tung ah lungdam thu hing kou ing. 

Tuni Thupi: “Ding a Ki Ngai Khu Pilvang Hen Tuachilou in Apuh Kha Ding Hi”

text:  Tuni KJV ngen pansan vai:

Wherefore let him that thinketh he standeth take heed lest he falls 1 Cor 10:12

And in my prosperity I said, I shall never be moved  Psalm 30:6.

Amasa lam in Na melma leh Na unau tung a vangsietna atun chiang in kipah sin chi igen ta ua, tunnin na din mun a hoi lai,  hinkhua nop tah mang na kisah lai, bangkim lawching leh pai fuh na kisah lai in na hamdan, na um dan kiveng in atuachilou leh huaise tahin na puh kha ding hi chi thu iki kum ding hi.

Tulai hunkhu Corona jieh a chijat huai tah a puh va jung lai ahi. Gintatlou, lametlou pipi zong i vuiliam jungjung ta uhi. 

Mi insung a corona  atun chiang  a tanchin ki houlim a, thumna vel a puan a, i mel thei teng kung a news Item dan a forward jieh jieh khu  anuam hi. Ahiin eima inn sung ahing phah a, i  Inn sungmi shi leh hinn kal a, ang um chiang in thil baih hilou hi. 

Khujieh in tutung kou inn sung a zong hibang natna lau huai ang tun in hing thumpi va ka chi tah tah lou te kung ah ka gen ut sih hi. News Item dan a  whatsapp group tuamtuam a sua pen ka hinna in phal nonlou hi.  Ang thumpi tahtah ding ka chiloute ka hil ut sih hi. Tam vei pii hi bang thumpi ding a chialna ka mu chiang.. thumpi e thumpi ding chiiin in ka reply a,, tua chin midang kung ah ka foreward hi. Tua khu ka thumpina dan in ka ngai hi. Midang kung a thumpi ding item a forward khu thumpi na hilou hi. 

Tunia i gen ut  khu I dam thei lai in mi dam theiloute khuh ut dandan a thuhil thei ahi. Sum leh pai din mun i hoi lai, i bank account a tampi a um lai in mi sum leh pai tasam te ut dan dan athuhil thei ahi. “Na ki manage siam sih va, Van lei na ki control uh ngai. Na sum dinmun theilou a sum mawh jat na hi” chia mi thuhil dan nop mama hi. Ahiin i sum neiteng ang kang bei a, bat  hing dim a, bangma mu na ding ing ki lametlou chiang.. ilungsim neu mama hi.

Ei din mun a fuh sima din mun hoi ikisa sim chiang mite tung a thukhen( judgment) khum khu bailam mama hi. Ki fuh sah leh hamdan awsua thau deu a mite tung a houlim khu baih mama hi. “aw ahi chi ua ahi chita ve leh, Ka na chi mawng mawng, a hi ding mawng ahi… ka na etet ahi… “ chi dan a gal apat a thu khenkhum baih mama hi. Ahilou leh I inn veng pa in tuahsia atuah ni a  ama uh mai a hepina leh pawna leh suunpi ki nei a, a mai ua i mittui zong tahsah thei ahi. Ahia inn i tun chiang ua “ ahi chi ding mawng a veua leh.. lomlom in,,. ana ki boltheisah ga uh aneh uh ata mai veleh” chia ei leh ei thangpha leh gualjou kisa a kamsua sua thei ahi. 

Tuami ahi amasa issue a  Na unau or na melma ahi jong in a tuahsiet ni in thangpha sin chi umjieh a hi.

Na kam leh na maisua in a dapi nabang mai thei. Ahia I lungsim sungnung pen in gualjou kisahna khat, thangphat na khat, maikha e, chawhkha e,  a tuahkha ahi  china khat lungsim kanei ei??

I nasepna lamchin teng a ang pai fuh a, i ma ang vang a, bangkim a hoi chiang i ham dan, i um dan, ilungsim gel dan “ ki muanna in ki dim hi. Midang te bang ma a gellouna khat kinei hi. 

En kham (job) mun 2/3  gel khiah a, tel ding pen theilou jen a ing buai chiang i lomte kham khat zong muloute musit khu baih mama hi. 

Pasian thugen te zong i vanglai um hi. I popular hun um hi. Mipiten hing dei seng in kum 1 sung program bang full zong umthei hi. Seminar leh crusade leh camp leh conference thupi teng a speaker ding a chial ihi hun um hi. I thugenna Pasian hepina toh miten nethei in,  phattuam pi in ang ngaina, ahing it, ahing ngai sang, ahing star tampi um hi. Hibang hun chiang a I lawm Pastor aning  khat a, singtang lam biala,  khawta  khat a koi ma theiphahlou a ginum tah a semte etneuna lungsim nei thei mama hi.

USA ka um lai in unau Burma lam a pastor khat in Pasianin Thupha apiah dan gen hi. A lawm te  Burma gam a hahsa tah a , Kalymeu lah, Tedim lah vel pou a Pastor na a sep lai un ama Pasian in America ah pua lut hi chiiin in TOPA thupha chiin lungdam kou hi. Tuami pastor pa khu atah tah in America a toilet vel susiang in pang hi. Alang khat ah Burma a pastor sem mai mai achi te khu Pasan in ajat hattuam lian tah tah a pastor te ahi uhi. Tua America a toilet susiang pastor pan Burma a Pasian mijat pastor te khu Topa Thupha ngahlou, ama khu Topa Thupha ngah bih in ki koi hi. Tua ni apatin ka lungsim ah USA a lut thei Pastor te mai Topa Thupha ngah in Burma leh India a genthei taha Pasian nasem te Topa thupha ngahloute chi dan maw? chi ka ngaitua den hi. 

Tunin na pastor sepna mun thupi, or na teenna mun nuam tah, mite ngaisang a na umlai in mun genthei a um, rawngbawl te na musitlou ding in kiveng in.

Ahilou leh nang pasal hoitah nei in nupa hinkhua nuam tah na mang hi. Ta mel hoi tah te toh Pasian in hing gual jawl hi. Hibang hun chiang na lawm pasal mulou a lengkul, or na lawm ji mu lou a kul, or na lom ta nei lou te na tuam et lou na ding in kiveng aw. 

Nang gari hoitah a nataia, vanleng ngen in na jin zong himai thei hi. Na lom auto leh rickshow leh bus a zong tou jou lou a keng a pai zong um dinghi. Tuate khu mawh tuam et sin. A khen pen Gari dei lou a, gari kham or vanleng kham zong hi thei hi. Dei leh nang a sang a hoijaw zong lei jou ding hithei hi. Nang building nuam tah a na teen vang in mi inn hi nipnep a teng te musit sin. Ama khu buidling iin a teng chim gop a, simple life nop sa jaw zong hi ta maithei hi. Ahilou leh *nang sum leh pai nehguh, tahguh, mite tan ding te guhsah a inn thupi tah lam pa khu koi man hing eeng naisai lou hi. 

Pasian hepina toh na inn sung din mun a hoi lai tah hi kha va. Na tate zong Pasian in hing kep sah in, a gaulzawlna dawng in din mun sang pipi tung hi na va. A hiin ki pilvang in na lompa inn sung ngiem leh atate hindan jum huai leh hepi huai khu na lungsim in thukhenna na nei khum kha ding in ki veng siam in. Na lompa hindan khu sermon na in na jang kha ding ki vengsiam in. A jiehpen nang zong ama din mun a na din na ding thil hithei lou chi umlou hi.

Tunia i gen sawm khu I din mun ahoilai, Ivanglai, i dam thei lai, i sum hau lai, i neh tui lai, Miten ahing jatat a ahing baw vuluai lai, i vang pai lai, icheet thei lai um hi. Ahiin tua bang  din mun a Pasian hepina jieh leuleu a i um chiang Kumtawn a ki ling theilou ding, buai theinonlou ding, a hichi den ding, koiman hing su ling but nonlou ding bang in kingaitua sin chi ahi.

I changteel uh 1 Cor. 10:12 in “ Ading a kingai tua khu pilvang hen tuachi lou in apuh kha ding” chi ahi.

Pslam 30: 6 in “ Ka nopsah lai in suh ling in um sih vang ka chi hi chi ahi.

Ding kip iki sah lai in puh thei mama ahi. Dam ikisah laiin bangma lou a zong ICU tun thei ahi. Pil ikisah laiin ihuah ngol thei hi, Hau ikisah lai in i nei i lam teng jan khat thu in bei thei hi. Popular ikisah lai in mualphou thei ahi. Lal ikisah laiin zero suahthei jing ahi. Gualjou ikisah lai in guallelna i maban hijing thei a hi. Det ikisah lai in i dinmun dengdel mama ahi chi kithei vai.  Mite ngaisang pen ikisah lai in ahing ngaisang mipi ten hing khailum thei hi. 

Ajiehpen Bible a Ginnna a pa, Pasian gingta pen Abraham in Pasian gingta joulou in Hagar toh ta nei uhi. Ishmael suanten bang jatahin Isrealte a subuai ta uai. Tulai tahin zong Gaza strip a gal um hi.

Mose khu mihing lah a lungneem pen kichi hi ahiin lungthah in Suang kung a thu gen ding lai khu achiang toh sat hi.

David kheeel a hagau mi, Pasian toh kinai um lou mai thei hi. Ahiin Pasian venbitna pat potkhia  in khelna huaise tah sem in a inn sung  leh a lenggam a buaina huaise tung hi. 

Samson mi hat pen pa khu naupang khat in  amittaw in kai kawikawi hi. 

Elizah mihangsan pen pa khu Numei khat jau in tai mang hi. 

Tunia i gen ut khu mihing te din mun hoi, dam thei, hat ikisah lai tah zong Pasian mu ding a khuailu thaumei mit di kisa leh, pumpeng gaw, gawp ding kisa  toh kibang ihi, I dengdel dan. 

Khujieh in Paul in bangma kisuanpi ding ka nei sih. Ka chitlouna, ka hatlouna te chilou kisuanpi ding kanei sih chi hi. Paul  in vang Pasian hepina nuai a hing  maimai ahilam a second a minute chin in kithei  hi.

Unaute i din mun dengdel dan, bangma ihilou dan, apuhthei, a chauthei, i hilam ki theina ding a kum 70 or i pension tan ingah sese ngailou hi. Tunin thei in, jil bai lei avang pha imai ding hi,

Hinkhuo bang ahi chi theina ding a i sam kaang tan ngah sese ngailou hi. I kim ipam ah nichinin i mu ding in Pasian in hing en sah hi. Mi hatte puh va jung ua, Lalte eh kiah in kia ua, ahau te guahtang in um ua, adam thei te ICU tung ua, a siam te huah ngolna piah in um ua, Miteng su jau a, lingsah pa tu in jau in ihmu theilou in gawng tultul hi, Thagum jangjang pa tunin chi kithing in ann zong nethei nonlou hi,  abol theite hing chau ua, a thaute guh guah bang in hing um ua, mi liante hing neu ta uhi. Nam lian leh khangtou kisa te hing puh in kumpi lian leh gam thupi te bei mang in tangthu sim in kisim ta hi. 

Hiteng thei na ding a Britsih library a lai bu teng va sim ngailou hi. Niteng in ikim ipam ah um a. Eima sung mama zong hing phata hi. 

Tujeihin unau mi sang in na neh tui jaw maithei, misang in na nih na puan hoi jaw mai thei,  misang in na inn nop jaw mai thei, misang in na tate din mun ham phat huai mai thei, mi sang in na sum dinmun kichingjaw mai thei, misang in maban lim chi jaw mai thei, misang in na kisuanpi ding tam jaw mai thei, misang in na gen ding  tamjaw mai thei  

AHIVANG IN pilvang in. Na hamdam, na lungput dan, mite nang sang a din mun hoilou jawte na houpi dan, na et dan ki veng siam in ajieh pen Pasian thu in “BUT TIME AND CHANCE HAPPEN TO THEM ALL” chi hi( Eccles 9:11).  

Mi din mun i chiam mui khumkhumte, ideilou loute eitung a, ahing tun chiang baihlou hi. Pasian in thil jousie kheel in din mun jousie hing ki hengkual sah jel hi( Rotation and revolution). 

Tuajieh in Paul bang in hau a umdan, jawn a umdan, din mun hoi a hin dan, din mun kisia a hindan, lawchinni leh lawsap ni a hin dan, tahsam a hin dan, kining chin a hindan ka siamta achi bang in eite zong ani ni a hindan iki jil uh angai hi.

Pasian thu in Koi zong ading a  kigel khu pivang hen apuh kha ding achi chiamte vai in. 

Ka dinmun ahoilai in ki ling theilou ding ka kisa hi achite mang hil sih vai.

Mangpa’n simtute tung ah  ki ngainiemna leh pilvanna lungsim hing pia ta hen!