Gingtu Hinazaal in Bang Kiheng Lamdanna A Um Ei?

Gingtu Hinazaal in Bang Kiheng Lamdanna A Um Ei?
Pastor B. Goumunthang

...khantanhoi khu, thu guah a hingtung hilou in, silbawltheina leh Hagau Siangthou leh, theichienna toh hingtung ahi zaw hi. 1 Thess.1:5

Khantanhoi-gospel in silbawltheina power hattah anei ziah in, ahi bangbang a pomte leh hinpite adiing in ki lamdanna umlou theilou ahi. khuziahin nang gingtu in tanchinpha na hinpi ziahin bang ki lamdanna na nei ei? ki lamdanna chu um teitei diing ahi tahbeb a gospel na hinpi ngaal in chu. Tuni'n ei gingtute'n gospel i pom leh i hinpi ziah un bang ki lamdanna i nei ei chi ki dong vai.

Ngai vawi, Thessalonica mite khu'n apostle Paul apan tanchinpha a zaahtah un a pomdet pei ua, tuachi'n a hinkhua uah ki lamdanna a um ngaal hi. Tua ki lamdanna ahi leh: Pasian hing leh dihtah be diing in a milim biatte uapat ahing ki heita uhi (1 Thess.1:9). Tuni'n nang leh kei zong tanchinpha zaal a Thessalonica te bang a gingtu ihi uhi, hinanleh amaute bang a eima a kilamdanna bang adiai? Unau aw, Jesu khu Hundamtu leh Mang a ipom taah a ahi leh, iMangpa sang a i poimaw ngaizawh bang a um nalai ei? Tuate apat a Mang Jesu khu i hinkhua a dia, a poimaw penpen isuahsah uh ngai hitalou ama? Tamte ziahin ki enchianpha vai. Mang Jesu sang a sildang khat poupou poimaw ngaizawh leh thupi ngaizaw a i um ngeingei leh vang adihlou khat um ahi chi thei mai vai.

Thessalonica te bang a, akhatna a akoi gige uh milim biatna te khu taisan in a HING PASIAN khu akhatna a, akoi ukhu ei gingtute'n gospel i pomdet ni ua pat a iki henglamdan diing dan uh ahi. Thamlou in Thessalonica ten soisahna, sawina, bawlsiatna, zep leh chilpi khaw salou in tanchipha khu a kiim-a-paam ah a geenzaah ngaal uhi. Tuni'n tanchinpha bangzat vei i geenzaah kha tai? Ei leh ei ki dot dia hoi mama khat ahi.

Thessalonica te'n Pasian thu leh laa khu a hinpi ua, a geenzaah ua, ama uh zaal in mi tamtahte'n Pasian amu law uhi. Tambang a hinkhua azat lai un nuamtah a um ahi zenzen sih ua, sawina (persecutions) nasatah a thuah pum a Pasian thu hinpi leh puangzaahte ahi uhi. Tambang a vuilou (chausemailou) a, hinkhua a zat theina uh pen sildang bangma ziah hilou in, ang peipa diing Hundamtu, Jesu Khrist a, aki nepna ziah uh ahi Jesu hing pai a misiangthoute ang khopkhom hun diing a ngaahla mama uhi. Tambang kinepna ziah a hahsatna nasatah thuah a Khrist a dia hing leh panla thei ahi uhi. Tam bang ma in ei gingtute zong bang chihlai pou in lam tuamtuam ah ang subuaithei diing leh i khoheina hing daal thei ding atam diing a, a um gige diing hi. Tamte  ziahin, i ginna geelthah kia vai, i muansan khu ngaitua khethah kia vai. Mangpa a kinepna in hatna ang pethei giap diing hi, aziahpen, Mangpa ah bou silbawlthei na a um thuai a (a umngal a).

1Thess.1:3

...i Mangpa Jesu Khrist a kinepna zieh a na hakatnate uh ka manghil sih uhi.

Tambang kinepna khu ginna ziah a hing um ahi, tamte ziah mama in a kukal ua a thuahzou uhi.

Tam Thessalonica te bang a tanchinpha i hinkhua a dia pom tahtah te ihi uleh tuni'n i hinkhua a poimaw isah penpen taisan a, Jesu khu a poimaw penpen hisah thei din ki panthah vai, tua ahi sihleh, kinepna dihlou OR hinsan umlou a mumalou tah a hing zong ihi kha thei hi. A ki kheel ma in pan lathah vai. Mangpa a i ginna tudet leh panlathah a, Ama a kinepna nei pumpum a hinkhua zangthei ta diing in simtu tengteng Mangpa'n tam article "Gingtu Hinazaal in Bang Kiheng Lamdanna A Um Ei?" tungtawn in a silbawlthei na hing musah ta hen.