Khangthakte'n Toupa A Theilai Di Uam?
![Khangthakte'n Toupa A Theilai Di Uam? Khangthakte'n Toupa A Theilai Di Uam?](https://blogger.googleusercontent.com/img/b/R29vZ2xl/AVvXsEjNQAWPJdlWd0MaV9Wr5UHlhy45vmo0FO-NYdUtjrdf_agh1hm3n1_ZuZC3UF1YifgZsPMuX4W7ZExJQQyGOUI_RHpP25dG-UbjA1rnYhKGh-u7z3FagGx8AyTGzHK69yIRGf20ANqNTUOP/w640-h426/Khangthakten+Toupa+A+Theilai+Di+Uamv.jpg)
Khangthakte'n Toupa A Theilai Di Uam?
“Joshua damsung leh upate Joshua kheng a dam teng, TOUPA’N Israelte adia thil thupi a hih tengteng mu mite’ damsung in mipite’n TOUPA’ na a sem uhi. Nun tapa Joshua, TOUPA’ sikha kum za leh sawm a upa ahih in a sita hi…Amah khang a miteng leng a pipute uh kiang ah a paikhawmta uhi. Amaute’ nung in TOUPA leh Israelte adia a thilhihte theilou suan dang a hong omta hi” (Vaih. 2:7, 8, 10).
I minam, Saptuam, khotang, leh Innkuan maban lametna naupang tampi honpia a Naupangte’ Ni hon musak I biak Pathian tung ah kipahthu ka gen a simtute tengteng Naupangte’ Ni chibai ka hon buk hi! Tuni Naupangte’ Ni ahih toh kiton in “Khangthakte’n TOUPA a theilai di uam?” chih thu I tangtel apan in tamlou in I ngaihtuahkhawm ding.
Tulai in Corona virus ziakin kuamah ngeina bang a pawpawt theilou in mahni inn chiat ah hun tamzaw I zang uhi. Midangte toh, I seppihte toh, I lawmte toh kithuah sang in I innkuan mite toh I kithuahtam zaw thei uhi. Saptuam vai leh thildang teng sang in innsung vai I sem/sai/buaipih tam thei zaw uhi. Hiai hunsung innkuan salam leh khalam a kilamthakna ding a hunhoih/hun lemtang tak ahimai diam chih in om hi.
Pathian in Israel tate Aigupta saltanna akipan Mosi tungtawn in a ban thahatna in pikhia in Joshua tungtawn in gamchiam, Kanan gam ah pilut hi. Kanan gam a luah nung un TOUPA’N Israelte adia thil thupi a hih tengteng mu mite, Joshua, leh upa Joshua kheng a dam tengtengte’ damsung in mipite’n TOUPA’ na a sem uhi. Himahleh khang masa TOUPA’ thil thupi hih mukha tengteng omlouh nung TOUPA leh Israelte adia a thilhihte theilou suan dang hong omta ahihdan I tangtel ah I muthei hi. Hiai khangthak/suandang hong omte’n a pi/pute bangloutak in TOUPA lehngatsan in, TOUPA’ mitmuh a thil giloute hih in, milim pathiante bia leh a na uh sem in TOUPA’ thangpaihna/gawtna thuak zaw uhi. Mulkimhuai mahmah hi! Khang masate’n khangthakte bangmah theisaklou/sinsaklou ahi di uam? Ahihkeileh khangthakte’n nu-le-pate’ sinsakna zui utlou ahizaw di uam?
Ei lak ki-en ta leng, nu-le-pate’n Toupa I theih leh I it bang in khangthakte ahuchi ding uam? Pathian I theih bang in, Pathian I it bang in, Saptuam I limsak bang in I khangthakte hong huchi ding uam? Ei, nu-le-pate, a upa lamte omlouh nung in khangthakte bang hong chi ding ua? Toupa leh a thilhihte a theilai na di uam? Tuabang dingin sinsakna leh thuhilhna pe huntawk in na kithei hia? A upa lamte’n biakna kikhopnate, thumna kikhopnate, Saptuam vai tuamtuamte I ngaih poimoh bang un khangthakte’n a hon ngai poimoh mah di uam? Israelte bang a I hihkhelh louhna ding in innkuan ah kikthak nawn ni chi nuam ihi. Innkuan kikhopna, thumna, phatna, kisinsakna leh kithuhilhnate panthak nawn lehang I chi mahmah hi.
Nidang in Saptuam vai tuamtuam- biakna kikhop, meeting, thumna kikhop, lazil, leh atuamtuam ziak bang, khotang vai tuamtuamte ziak bang, tanau vai bang, leh nekzonna, siamsinna, leh nasepna tuamtuam paulam a nei in innkuan kikhopna leh thumna hunte zangtheilou I himaithei. Himahleh, hiai Corona virus in tua atung a I gente hon sukvengsak a, I utbangtak leh deihdan tak a Innkuan vai saithei ihihman in hiai hun innkuan kilamthakna hun in zang mahmah lehang I chi hi. Tua hileh TOUPAN hiai hipi akipan suahtakna hon piak a I hih ngeite- Saptuam vai ah, khotang vai ah, siamsinna vai ah, nektak zonna vai ah I hihtheih nawn hun chiang in I hihdan a hoihlam ah hong kikhek om ngei ding in ka lamen hi. Hihngeite mah hih ahihhang a hihdan chituam/hoihzaw hong piangkhia om ngei ding in ka lamen hi. Naupangte, khangthakte I gam leh minam, I khotang, I saptuam leh innkuan a ding a I maban lametna ahihman in amaute a hong hoih uh leh I maban hoih ding hi. Khangthakte’n TOUPA a theilai di uam???
No comments