Ki Poimaw Sah Seng in i Value Su Bei Thei hi

Ki Poimaw Sah Seng in i Value Su Bei Thei hi

Dr. Dongzathawng

Devotional #35 ( Vol.3)

(Fellowship of Thirsty Souls and Hungry Hearts)

Thirsty Souls memberte Topa Thupha!

Tulai natna huaisia hilang manthaina apat a hing kembit Pasian min phat in um hen la.

Pasian in Ama tangtawn lemguatna toh a tuah ding a aphalsah damlouna leh lusuunna thuahte thumpi jing kawm in Mangpa’n Ama'ute khatkhat in umpi ta hen!

Shillong jingkal huisiang ki kap vitvit leh dam hieuhiau leh nisanou taang singseng kilawm tah apat in Shalom!

Tuni'n Mangpa’n a umpina dei um tah hing tangsah ta hen! Tualeh himi msg khu nang ading a, na thangana hing hisah ta hen!

Tuni Topic: Ki Poimaw Sah Seng in i Value Su Bei Thei hi.

Hattuam hiin, khawtaang hileh tualeh insung kivai hawmna hileh i poimawna mun a pangkhah khu Pasian thupina ahi a, mite ding a zong gualzawlna ahi. Mihing khat a poimaw namun a jatthei khu hinman um hi. A poimawna mun chet a jattheilou, mantheilou mihing khu a dahuai mama ahi.

Mihing khat poupou adiah in  gingtu piangthah khat khu Pasian in a poimawna munkhat a jat ding a bawl ahi. Tua mun a hoitah a kijang kha te khu America White House a sem sang a zong ki pahpi huaite ahi uhi. 

Koima, midang khat in abawl theilou, koima in  a luadim theilou mun ading a Pasian in ahing siam ahi. Tuamun khu na thei a, na um khah a, tua nang a ding a mun awng chet khu naluah khah chet leh mi kipah pen na hi ding a, na hinman zong um ding a, mi lawching a sim na hi ta hi. Koi in bang gen in, miten bang sem in bang bawl nanleh nang hih leitung na damsung tawmkhat ading a Pasian in ahing guatsah na mun, Van Angel ten zong asep theilou na muna Pasian in ahing umsah leh kipah tah a Pasian phat kawm a na sep ding ahi. 

Tua bang mun leh hun khu gingtu khat in niteng a ngah or et gige khu Pasian deina bang ahi. 

Ahi'n tunia i gensawm ahileh i poimawlou na mun a kisah la a, va ki poimaw sah khu mite ading a gualzawlna hilou in buaina i suah thei dan kikum vai chi ahi.  

Tulai hattuam hi'n, nam hileh society hileh ih inn sung hileh ibuaina uh khu i poimaw nonlou na mun a ki poimaw sah i tamseng jieh uh ahi ta hi.*

Tehpi in a tapa leh amou gamtatna teng a sai sawm leh abuai ding sa ahi. A tapa aneu lai in ana kem a ama lou in hitheilou hi Ahi'n ji ang nei chiang in ama kem ding Pasian in apiah ahi ta a, ama va ha pan ngai nonlou hi. 

Tuama bang in Sungnu te zong atanu a hah khiahsa inn sung leh hinkhuo a vai ava saisai leh atanu khu mou hoilou ahina ding a lampi bawl sahsah ahijaw hi.

Tuama bang in hattuam zong abuai na leh a liamliamna khu a poimawlou te iki ha sahla seng jieh ahi. Lamkai a kitel a, mawpuahna ki hawmchiat ahi. Ahi'n tua dept. tenga khat in thu iva nei sawm leh midangte ading a poimaw vawtlou lamkai ninhuai isuah ding hi. 

Tulai hattuam toh kisai a ka thumna khu Mangpa khoi mun ah kijang leng ka ga nei diai? hattuam a ka role ding hing thei sah in chi khu ka thumna ahi. Ei i senior  jieh leh,  founder ihi jieh  leh hausa ihi jieh leh sum thawtam  ihi jieh a bangkim ei chi dan a paisah ding  chi pen mite ading a ninhuai mama ihi lam kithei ngai ahi. I genjeel sa, "Hattuam na it leh awl pan in" chi khu ithei poimaw hi. Founder kisa, ngaina kisa, inn teh kisa, aneitu biih kisate jieh in hattuam teng naa siang, liambei siang, chau bei siang, kise bei, keh bei, nungtawl bei, mangthai siangta chi lei AMEN chi itam ding hi.

Hattuam khu Pasian a ahi a, Jesu khu a lutang ahi. Christ khu Bangkim a bangkim ahi.

Hattuam nou bete, nou unau, nou phung, nou inkuan a hi jenjen lou hi. Ahia nang neitu kisa, a neibih kisa, a innteh bih kisa a na hapan laisie mite delmang, daltu na hilam kithei in.

Kumpi David hun lai a Joabte unau hapan mama na pi un David adiing in sin khamna suah uhi. 

Khujieh in hattuam kivaihawmna ah milui (senior) pilvang lou, hattuam ading a mi masa, jatat huai mama hina pi atawp lam chiang in a na bawl hoisa teng uh khu bangmalou sua kawm in minsetah in a  record uh nusia uhi. 

Ka gen jing ta a,  Nelson Mandela a thupina khu khawl hunding a  akhawl theina khu ahi. “kum 28 jail a ka tan man” chi'n president in Ana pang den tei tei leh tuni'n koima'n jatat in ngaisang nonlou ding hi. A thupina teng khu eh suah ding hi.  Tuni'n leader hoi tampi jatat taah leh ngaisang huai tah a ki khiinkhe ding hina pi Saul bang in force a kai khiah ngai uh a, a damsung ua athil hoi bol teng uh khu susie, kai sie malam in pot khia uhi. Tuabang kaal ah ama uh leh ama un ana sep hoite gengen nalai uhi. Mite gen ding hinapi ama un mite theisah sawm teitei uhi. Ama un agen tam laisie mite'n thei leh zong theilou kinei ding uh hi. 

Innkuan kivaihawmna ah zong pa khat ka hi chia i tate, i moute, i tute hinkhuo teng a iki kum sawm a, i thunei sawm  a, insung vaiteng isai sawm leh pen, ahing ki jatat leh ahing ki ngaisang na ding teng bei in aguh in hing ki ning mama ding hi. 

Mihingpen i vanglai um chiat hi. *Pasian in thilkhat biih ading a, ajiah um a, ahing jat hun um ahi. 

Eg. *Nehemiah khu Kulbang lam ding a Pasian in ajiah um a, ajat ahi. Nehemiah in kei kulpi lam ka hi. Danthu jong kei hil ding ahi chi'n Ezra panmun tuh sahlou hi. Persia gam a, asepna ah va um kia lel hi.*

Tua bang in ei te jong Pasian in thilkhat biih bol ding in a hing guat a miten jong hing jui dupdup himai thei hi. Ahi tua khu a hun um hi. vanglai ni in, miten ithu la in, hing ki ngaisang, hing ki jatat hi. Tua i vanglai bang den ding ikisa kha leng hi. Hun leh nite hing liam bang jel in ivanglai zong hing bei hi. Mi hoijaw, mi siam jaw, mipil jaw hing piangdoh jel hi. Tuate khu ei sepga a i lah ngai hi. Tuate kipapi a ama uh i awt hun a um ngai hi.  Mose in ama hun ang bei in Joshua ngansie in a mangta hiau mai hi. 

Leadership lam siamte'n agendan un idea hoipen zong a dam kum khu kum 7 ahi chi uhi. Kum 7 jou chiang a idea thah in a khel ngaita hi chi ahi. Tualeh a gen jel na uah leader hun khat lai a, a felna jieh a ki kheelna tungsahpa khu, ki hepkhiah dan atheilou leh a kikheelna daltu hoipen suahthei hi chi uhi. 

Ka bawltheina, miten ka thu nial sih na, hausa khat ka hi, sum thaw tampen ka hi, founder ka hi. Senior kahi chi man a dept teng a i thu i va tunsah sawm leh mi bawl teng a va kikum khu mite jatatna apat a ZERO isuahna dang lampi  hoitah ahi chi theijing vai.

Thilteng en vengveng in i pomaw leh alou-theilou ihina khu en in tualoute khu kikaang koi siam lei i hattuam hi'n, society hi'n, i inn sung hileh a dam ding dan leh a khan ding dan muthei ahi.

Ka Prof. pa'n agen hoi kasah mama ka manghil theilou khat: Na hattuamte uh nang umlou a sunday service khatvei anei thahtah uleh tua hattuam ah nang na poimaw non sih. Tuami hattuam apat na graduate ta hi. ka pastor sep tung lai in Kei ka na mot dan kana um den kha nalai hi, chi jiau hi. Eite pen ei umlou a i mipite a hithei ding khu da mama hilei kilawm hi. Pa in atate ama uh ki toudel a ang khawsah thei ding uh khu i dream ahi. 

Ei um lou a abuai ding uh khu naa kisa hi. Ei umlou a a ki manage thei uh khu iki pahna pen ahi. Ei leader te pen i umlou khu miten feel in, hing ngai tuntun, hing khiala tuntun uleh ki-ut hi. Ei i um nonlou leh abuai dan uh a chi maw dan uh ki ja leh tha ki nga mama ding hi. Tuapen mi selfish te lungsim ahi. Tuachi dan ding hileh Paul in hattuam khat kheel phut khielou ding hi. Khat phut in nusia tou jel hi. 

Mipi hi'n, hattuam hileh i poimawna mun a pan khah, ngaidan va sun khah, va ki jatkhah khu thupi in manpha hi. Ahia i poimaw nonlou na mun a, koi man adoh lou a i thu va tun sah teitei a, koima ngailou leh poimawlou sasa a va ki poimaw sah a va ki kumkum khu i value ngiamsahtu ahi. 

Pastor hi'n, lamkai hi'n, nam makai hitalei i mipite leh i sepna hapanlou ding, gaal-et ding china hilou hi. Ahi'n i kijat theina ding mun, i gaa neina ding mun, i bawl theina mun, i expert na mun ah  alou-theilou in hing ki dong in hing ki chial mama na ding hi. Tua chilou  a lamkai ka hina chia bangkim a kitaahla khu i valna( unwanted) leh i manphatna iki suh beina ding a lampi hoitah ahi

Young preacher te zong bang chi jawng e khata hattuam te kichial sah, progm a i melthei khat tungtawn a ki guanlut chite khu bawl chi hilou hi. Senior preacherte jong i melthei leh ei a piangthah tam jieh a ama uh te through a invitation ki bolsah bai lam mama hi. Hing nial ngamlou ding uhi. Ahi'n hing dei senglou himai thei uhi. I umna mun ah, a guh in thum vai in ang poimawte'n hing chial ding hi. Nidang in kei zong hichi dan ka ngai tua hi. Ahi'n ka mualphou hun um hi. Eima deina mun leh progm vel a tuan a pulpit lua a va mualphou thei ahi. Ahin tu in vang: Mangpa nang umpilouna ding mun ah hing paisah sinlan nang umpi louna ding PULPIT ah hing ding sah vawt sin chi khu ka thumna ahi. 

I gen jel bang in, van-le-lei a indispensable khu Pasian mai ahi. Umjie khu koi ma in Pasian mun luatheilou hi. Mihingte pen mipil pen, mi hoipen zong mi poimaw pen ichi a umlou chiang a mun luathei khat um jing hi. Ajiehpen Pasian in mi tasamlou hi. Tuachi dan ding a Pasian lemguatna in a guat sa ahi. Ahi'n  ki kaangkoi chang thei a, mite awtdan thei a, mite chance pia a, mite training bawl jaw a, leader du-amlou, dugawllou, thuneina a tudet teiteilou lamkaite khu a poimawna uh amanphatna uh mite'n theisiam sawt ding uhi.

A umlou nung chiang un zong mite'n a value uh thei jingjing uhi. 

Tunin bangtan in hattuam leh khawtang leh innsung ah i va kikum thaw in, i vaisai sawm uai? chi hilou in, Bangtan in theina pi theilou ki pang, bawl theinapi bawl theilou bang a um, thunei na jatthei hina pi bangtan ahiai a janglou… poimaw napi bang tan a ki poimaw sahlou ding in bang tan in iki discpline jou ding uai? chi ahi. 

Himi in hagau lam a ipichin leh pichinlou hing sulang pen ding hi...

Hattuam leh society leh inn sung in ang poimaw na mun a panglou ding ,kikaang koi ding china hi jenjenlou. Ang ki poimaw louna mun a ki poimaw sahlou ding chi lam hijaw hi. Tua khu theisiam in ki kaang koi siam leh hattuam hi'n khawtang hi'n insung hileh anop in nopvan, akhang in khang hoi van, adam in dam ta vei,,

Mangpa’n i bawn un telsiamna hagau hing pechiat ta hen!