Mialnuai a umte tung ah Vah loupi hing tungta hi (Isai 9:2)

 

Mialnuai a umte tung ah Vah loupi hing tungta hi (Isai 9:2)

Dr. Dongzathawng | September, 2011

Theilou kal in Christmas ang tung kia manta. Munchin gamchin a tami laisim jousie Christmas chibai ka hing buh hi! I gam a christmas man nonlouna asawt sem leh inlang ngaina uang semsem hi.

1. Sildang ka gen ma in gamdang a christmas man pen lunghel huai mama ahi chiang in i lungsim ah theibang senlai ah a hing lang hi. Tua ka sweet christmas memory te neu khat ka hing gen ut hi. Gam tuam muntuan ah ki um nan leh christmas ahi chiang vang inlang ngaina jattuam tuam hi. Leitung pumpi ah tuhun a umna ding in hing kitel sah ding hileh ka pianna, ka khua lui P. Sejawl (Old Pangsang) ma ka tel ding hi. Neulai a hall lamna ding leh jaan giahna ding loutul lam a bupawl pua a kuan a kipahdan zong vang atehpi di bei vawt hi. Kum 30 tung lam ten thei giep van in, kampawl kot sakhau atam a tam leh pulaleen puannah cowboy lim in atuam dim vawt tevel christmas jingkal a leitung a puanah hoipen sil dan a ikigel hunte vel geldoh huai vengveng hi. Tami ka memory theisiam simtu lah a na um khah leh special nousiet kang bawl sawnsawn hi.

Tuaban ah ih christmas man dan bawlphat dia hoi kasah khat leh ni kang gen juai ding hi:

2. December ha pen hattuam program atamseng a Christmas tunkim tan phialin program i dimsah uhi. Tuachin thakhat thu in christmas hing tung a thei lou kal in liam mang ngal hi. America te bawl dan teng ahoi china hisih nanleh ahoi lah ding a ka thei ahileh November kaltawp thanksgiving a kichai nah leh christmas huikhua kipan ngal hi. December ha pumpi christmas mang ahi mai uhi. Christmas light, christmas tour, christmas party, christmas concert, christmas kantata, christmas carol, christmas sale leh adang dang pen a kibawl tou jiah jiah ahi ta hi. Bianinn kaina teng pen christmas thu leh la ngen tang hi phot hi.

Tuachin christmas ni 25 ang tung leh munchin gamchin a pat ki juan tua in inkuan kuan ahisih leh lawm leh gual toh inn chiat ah ann neh khawmna nei ua present box honna nei uhi. Biah inn kai chite pen 25 niin jat hinon lou hi. Kie ngaidan in en zong December ha pen christmas ha in nei in i lasah leh a huikhua himhim pen christmas hagau ki umsah ta leh hoi kasa hi.

3. Tuachiang christmas carol akichileh ka mang hil theilou ahileh Bangalore ka um lai ahi. December date 10-20 kikal vel in christmas drama leh kantata (lapawl sau) um hi. Nitah chiang Bible saangnaupang teng keeng in khopi sunga ah intuam tuam 1 am tantan carol kipai hi. Bang chi kibawl e ichi leh simple mama hi. Gift ding in calender ki toi a lampai kawm in la kisa a, inn i tunchiang khat in Bible sim in thumna nei in neh leh dawn hing pia a um leh kine ngaungau in aban ki pai jel hi. Khum hun a kalasah te uh: silent night, O come ye faithful, Noel, joy to the world chite pen tuni tan in akisah chiang khum hun lai ang geldoh sah nalai hi. Hite pen eiham a umlou ahiei thei sing. Lenkhawm la sah hun umvan hite zong ijil uh ngai ahi.

4. Tuabanah khenkhat in hagau lam a kaisah seng in "mi hagau miten Pasian thu leh la ajat uh ahi. Neh leh ta a kisuh buai lou diing ahi" chi pawl um hi. Ken vang tuapen a jou lou hi mai ing. Adiah in sapgam ten pen neh leh tah chi lou comercial tah bawl seng seng un a Jesu a lam lam zong thei kha nonlou uhi. Ken vang neulai a Christmas chia tha ding sial hing kikai lut a ki hen ban ah loud speaker hing kipawlut i mu khel a naupang lungsim a kipahna ding ka thei sih hi.

Ka gen ut pen ahileh December ha sung pen sil dang a kisuhuai sah senglou in christmas ha kihi sah top leh ut huai hi. Coral leh decoration ichi leh zong ani khel khel kingah da leh. Carol leh ki khopna leh kipawl khawm na tuamtuam pen a ni tun ma teng kipai tou sah sah hen len ani ijat chiang tua pen a tawpna hi hiau leh. Tualeh neh leh tah pen uang bawl seng ju leh sa toh a khe le bawl bawl vang deisah huai sih nanleh nehkhawm na pen asia in ngaida vai in tua sang in meithei taga ape jou loute a ding kisuang la lou tah a panthein ading un lampi bawl sah lei hoiva ka chi hi. Hichi bangte hattuam ah ja hinon da leh ut huai kasa hi. Fund pen ahun kuan a inkuan a dawn sang in lamdang kingai tua thei leh.

5. Tu in i thupi ah lut ta vai ele. "Mialnuai a vahten vaah loupi amu ta uhi, shina lim guam a teengte tungah a vaah ahing tung ta hi." Isai 9: 2. Adihtah in nam toh kisai a eite pen mial nuai a teeng leh khawsa ihi mama uhi. Nanleh gospel a hing tung chiang i gam i nam ah vahna hing tung hi. Ahin himi taang in agen na tah tah ahileh Setan henkhuh leh khelna nuaia chimaw leh beidong a i um lai un khantanhoi in hing hunkhia a tunin leitung ah mite mu ding in inn leh loute, i gamtat dan te uh ngiam in hepi huai nanleh Vangammi hina inei ua lametna neite ihi ta hi.

England ka um lai in sapkaang te Pasian thu dang tah in ka jilna mun ua meeting ah ang ki tawl jung jung uhi. Kei bang counseling team ah ka pang nalai hi. Hing mu sit het lou in ahamsatna uh imlou ing gen ua kap huthut mai ka mu chiang ka ki uangla jawjen hi. Khatvei ak lawmpa kung ah, "Chris (amin ahi) leitung a na deiteng uh nei uchin a bang dinga Pasian thu na hichi suisui na lai uh e?" kachi leh, ang dawngna ka manghil thei sih hi. "Dong, nouten leitung a bangma na neiou jieh un Pasian ma na bel ua, kou ten ahileh ka lungtang uh nat jieh in Pasian ka bel uhi. Pasian in Ama i tulmaw theina ding in nou pen jawngkhalna ahing pia a, kou pen lungsimlam natna ahing tungsah hi" achi hi.

6. Tunin leitung nei leh lam a itahsap leh i gam buai vengvung te jieh in Pasian ma i bel ua, leitung ah kikhual diing dan ingaitua sih hi. Aw laingvai leh genthei te dinga mun a um khel khel mama kipah huai e maw. Hilam a sapkaang mihausate bang in leitung a i deiteng nei lei eilawipi Pasian i gelphana di ve aw ka chi hi. A jiehpen neukhat i kichi thei leh zong Pastor te ki musit pai, neukhat lai i thei deu leh christian pen mi mawlte a didan a koi leh hattuam vel simmaw pai pai hi hai a maw. Leitung a noptah a zong kihing jou lou a Pasian zong i phoh lou sawn sawn leh double a vangsia ihi. Leitunga a Lazar bang a genthei dingin si jou chianga mihausa pa bang a genthei sem ding chi mawng mawng. Kalungsim khat a sapkaangte ka simmaw na khat ahileh "noute lawi hih leitung ah na dei teng nei nanleh uchin kou Van-gam lam ka lamenna uh lianzaw hi. Nou na nei val ua na piah uh ahi a kou ka neilou val ua ka piah uh ahi. Hagau lam ah kou sang jaw lilehna ve ung" ka chi sim jel hi. Gospel leh bangtan vei christmas melmu ding Pasian in ahing khawi khawi diai chi zong i thei lou pi.

7. Anina ding a tunin na hinkhua ah mialna tuam tuam in hing tuam mai thei hi. Lungsim mialna leh tahsa hinkhua neh leh dawn damsung khawsah vaituam tuam in hing tuam in potkhia theilou in lungjinna guam sung ah na um mai thei hi. hibang a liangvai leh lungkham na tuah tangval noukhat inn apat taimangin atawp in chimawna top tung hi. Beidong leh chimaw kisa in jaan mial nuai ah kikhai lum sawm hi. Nanleh bang ma bawl theilou in daltu khat um bang hi. Tuakhu anu thumna ahi. Tuachin khupdin in a Jesu a lametna kotpi ah lut hi. Amin T.A. Torrey ahi.

8. Jesua pen bangkima a adawnhuna (answer) ahi. Tahsapna, lungkiahna, lawsapna, thangpaihna, mudanam, mite geldohlou leh manghilna mun, thabaana leh chauh hun, kignaisiet leh lungsimneu hun, thupuana bawl theilou a lungbuai hin, lungsim leh tahsa natna in ahing tuam hun leh bangkim a Ama pen a dawnhuna ahi. I la in "Mang Jesu nangna umna ah VAAH
kim khuajing ngai lou" chita hi.

9. Himi nasim jaw jaw chiang khupdin alem lou leh zong na lu kuun in "Aw Mangpa nang bang siljousia a kichainua chiang a zong hing taisan nailou ka hing nei manin ka nuam hi. Ka mialna jousia hing salvah sah dingin ka hing han a ka hing juan hi" chi in thum in. Mangpan na umna mialna mun ah Ama vannuai vah hing kilah ta hen!!