Minphatna Sangin Nasephoi Thupizaw Hi

Minphatna Sangin Nasephoi Thupizaw Hi

Pastor M. Thangboi Zou

Tangtel: Siria galkapte a honhon in galdou in a kuon ua, Israel gam a kipat in numei naupang nou khat sal in ahing man ua, ama nu'n Naaman zi nna asem hi (2Leengte 5: 2).

Minphatna leh minthan nuom jiah a Pasian nna nasem kha ei? Minphat napen thupi masalou in, sepkhiet ding masa zaw hi. Leengte nina bung 5 na sungah min kitheilou numei naupang khat in sil thupi a bawl hi, chi mukhiet in a um hi. Aman Galkap lamkai Naaman zi nna asem hi.

Naaman pen galkap lamkai mi thupi ahi vangin Phah (Liprosy) ahi (5:1). Ama nu'n api kung ah, “Kapu Samaria khuo a guolnei kungah vapei leh a phah na suhdam pie mai ding hi” achi hi (5:3). Salmat numei nu'n a nei ITNA, deisahna dihta a nei hi. Sal a amante dam na ding deisah hi. 

Minphatna deina zieh a Pasian nna sepding hilou in, deisahna dihtah toh i sep masat phot ding apoimaw mama hi. Tualeh amanu “muon tah, gintat thei mi” ahidan amuthei hi (5: 4). Mi zulzau khat hileh apu in a thugen gingta vawtlou ding hi. Mi muontah, gintat thei i hina dingin i nasep a suhlat ding ahi. Min i thugente azui theina dia amasa a ei apat mite gintat theina, muon ngamna a nei masat uh a poimaw hi. 

Jesu nuazui na kichilai in mite, “muanta, gintatthei” na hi nai ma? Muonthei, gintat thei dia hinkhuo nazat masia mite'n na hinkhuo a Pasian thupina mu theilou ding ahima'n in, mite etton theidin thutah leh dihtat tah a kalsuanna nei masa photphot in (1Tim. 4:12, Phil. 1:27). Tuachin nangma leh nangma minphatna kipia hizolou in, na thutahna leh na ginumna te ziah in, Adeibang a na kalsuanna pa Pasian in ang toisang ding hi.