Missionary Day Message: A Hing A Inn Tung Ding A Deih
Missionary Day Message: A Hing A Inn Tung Ding A Deih
Tangtel: Pathian in khovel a it mahmah ziak in a Tapa tang neihsun apia hi. Kuapeuh amah gingtate a manthatlouh ua, tangtawn hinna a neih zawkna ding un” Johan 3:16
Tukal paita sung in Saptuam Ni poimoh mahmah nih- Missionary Day leh Nute’ Ni omkha hi. Nikum mahbang in tukum in leng hiai Ni poimohte tup-le-ngim dan in kizangtheilou nawn a poi I sa mahmah hi. Kongkhat ah lah, mi tampite’n hiai hun mukha nawnlou a sihna hanmual hon liamsan nung ua eite’n a hun leh ni mukha theilai ihihman un hamphathuai in kipahhuai mahmah zel hi. I hoihna om hetlou ahihlai a Pathian’ hoihna ziaka hiai hunte mukhalai ihihman un Pathian kiang ah kipahthu I gen a simtute tengteng Missionary Day leh Nute Ni chibai k’on buk hi.
Tuma a Delhi a Covid case a hon sihsan unaupa Pauminlian Tangpua, a luang a innmun uh honpuak tung ni un ka vahoh kha a tuahun a apa’ thugente’ laka lungsim hon khoih mahmah leh hi ka na sakluat khat om hi. “Ka tapa Mimin, damtak a khualzin, a hing/a dam a inn hong tungkik ding in kana lamen in ka deih mahmah lai in a sisa in inn hongtungkik maimah hi. Pathian in leng mihingte, I khualzinna khovel I nutsiat chiang in a hing a I pa’ inn (vangam) tung ding in hon deih hi” chiin hon gen a hi kasa mahmah hi.
I tenna khovel ah ka inn-kalou omna I chih, ka mun-ka mual I chihna, intektak a I khosakna, inn-le-lou hoih leh thupi, salam dinmun hoih neih ziaka mite’ zahtakna/mai etna I ngahna hiai khovel Laisiangthou in I khualtamna, mikhual ihihna mun leh mual ana chi hi. Hiai khovel ah bangzahta a hausa in, thupi in, nuamsa in, dinmun hoihtak nei mahlehang nikhat ni chiang a I muntak/I tangtawn mun ding zuan a I pawtsan ding gam himaimah hi. Bangchibang in hiai khovel I pawtsan dia/bangchibang in I inntak I tungkik dia chih ngaihtuah tham ching mahmah I sa hi. A sisa a (piangthaklou) a pawtsan ding/inn tungkik ding na hihia? Ahihkeileh ahing a (tangtawn hinna nei a) pawtkhiaksan ding/tungkik ding na hihia?
Pathian in mihingte a hing a inn tungkik ding a ahon deih ziak in Jesu Khrist ah lampi hon bawlsak hi (Johan 11:25,26). Jesu tuh mi kuapeuh a hing a inn a tunkik theihna lampi omsun, sawltakte’n ana tangkoupih uh, Saptuam masate’n ana tangkoupih uh, tuni a ei gingtute’n leng khovel kiang a-khamangthangte kianga I tangkoupih zomzel ding Tanchinhoih ahi hi. Hiai Tanchinhoih nasepna Saptuam a dinga nna lianpen/thupipen/
poimohpen ahi hi. Niteng phial in a sisa a tangtawn inmun zuan a khovel nusia a paikik (sihna tuak) om ahihman in hiai Tanchinhoih nasepna khawllou a a paizom zel poimoh mahmah hi. I tangtel a I muh mahbang un, Pathian in tangtawn hinna I neih theih na ding a A Tapa honpia ahihman in hiai thu a zakhanailoute kianga I piaksawn a eimah bang a tangtawnna hinna nei a(ahing a) inntak a tun ding uh I mohpuakna lianpi ahi. I hihtheihna lamchiat ah hiai I mohpuakna semkhe chiat dingin I kichial thakthak hi.
No comments