NgaihdamNa Gah: Nopsakna
NgaihdamNa Gah: Nopsakna
Pastor T. Tunthianmang
Tangtel: “A tatlekna ngaihdam a om a, a khelhna khuh a om in, nuam asa hi.
Mi, TOUPA’N thulimlouhna nei a, a sehlouh a, a kha a zekhemna himhim omlou
in nuam asa hi” Sam 32:1-2
Amasapen in tunitan damna hon musak I biak Pathian’ tung ah kipahthu ka gen a,
simtute tengteng na vek un Jesu min in Chibai ka hon buk hi!
Tukha sung thupi ding a “Ngaihdamna Gahte” chih i teelkhiak utoh kiton in
tuzing in ngaihdamna gahte gen ding tampi Laisiangthou akipan a omlai in
tuate’ laka khat I tangtel akipan in ngaihtuah khawm lehang ka chi hi.
Sam laibu (Phatnalate) sung ah Kisikna/Khelh kiphuankhiak Sam (Penitential
Psalms) sagih bang kimu thei a tuate’ lakah Sam 32 leng khat ahi hi.
Kisikna/Kiphuankhiakna Sam te ahihleh Sam 6, 32, 38, 51, 102, 130, 143 hi uhi.
Sam 32 ahihleh Sinsakna Sam chih in zong om hi. Hiai Sam 32 kumpi David gelh
hi a, bangchibang khelhna toh kisai a, a gelh hihiam chih genchian kei mahleh
khenkhatte’n Bethsheba, Uria’ zi tung a angkawmna khelhna a, a pukna akipan
hongpiangkhia hiding in gen uhi. Hiai Sam 32 ah bangchibang khelhna David in
hihkha hiam chih kigen kei mahleh, a khelhna a sel/im ziaka a thuakdan, a
khelhna a kiphuankhiak ziak/a kisik ziaka Pathian’ ngaihdamna a ngahdan kimu
thei hi.
Hiai Sam ah khelhna gendan li(four) leh ngaihdamna gendan thum(three) a kigen
a kimuthei a, tuzing in tuate saulou in enkhawm lehang I chi hi. Amasa in
khelhna lite I en masa ding:
Tatlekna: Hiai khelhna in a gen ahihleh helna - Pathian in mihingte’ hinkhua a thildik/thudik zuih ding a bawl zuih utlouhna, tua thudik zui ding a kitahlut utlouhna genna ahi. Hihlouh ding hihkhakna khelhna (sin of commission), akan-aval a gamtatna leng a chihtheih ding hi.Khelhna: Tatlekna in Pathian’ dan bohsiatna lam a gen a, hiai a khelhna kichi in Pathian’ siangthouna in a ngiat tan a hin zohlouhna (missing the mark). Pathian’ lametna tan/ deihna tan tunzohlouhna lam a gen hi.Thulimlouhna: Hiai khelhna in thil dik aselam a hihna, lam dik akipan pialmangna a gen deuh ahi.Zekhemna: Hiai khelhna ahihleh lepchiahna, zuautheihna, chihtaklouhna, chalak pilna lam genna ahi hi. A hoih, a fel, a siam, adik bangdan a om huchilah hilou genna ahi. Hihna hiloupi, a kibawltawm mihinna genna ahi.
Ngaihdamna gendan thumte
Ngaihdam: Hiai thumal in a gen ahihleh puakgik domkhia, lakhia, pomang, lamang chih ahi. Mikhial vangik pua bang a ngaihtuah in a puakgik Pathian in dopkhiaksak/lakhiaksak/puakmangsak ahihna genna ahi.Khuh: “A khelhna khuh a om in nuam asa hi” hiai in khelhna Pathian muhphaklouh dia koihmang/khuhkhum genna ahi. Pathian’ vaihawmna a I dinchiang a Pathian in I khelhnate hon pholhkhe nawnlou ding chihna ahi. Jesu Christ a omte a khelhna uh Khrist’ sisan a khuh a om chihna ahi.Sehlouh/seh hilou: “Mi, TOUPA’N thulimlouhna nei a, a sehlouh a…” Pathian in mikhial/khelhna nei a hon ngaihtuahlou, hon simlou, hon ngohlou genna ahi. Adam khelhna ziakin mihingte mikhial, mi thulimlou a sim/ngoh/ngaihtuah ihi uhi. Himahleh Pathian in mi a ngaihdam chiang in mi thulimlouhna nei a sim nawnlou hitel ahi.
Huaiziakin hiai bang a Pathian’ ngaihdamna tangkhate bel mi nuamsa hitaktak
uhi. Pathian’ ngaihdamna gahte’ laka khat tuh nopsakna/kipahna diktak neihna
ahi hi. Unau, mi nuamsa na hita hia?
No comments