Ngaihdamna Poimohna
Ngaihdamna Poimohna
Pastor T. Tunthianmang
Tangtel: “Michih in na lungtang tak ua na unaute uh na ngaihdam kei uleh ka
Pa van a om in leng huchimah bang in na tung uah a hih sam ding” a chi a
(Matt. 18:35).
Amasapen in hiai message simtute tengteng na vek un Chibai! Tuzing in Matthai
18:23-35 in,
Ngaidam nuamlou Sikha Gentehna thu a Jesu’ thukhitna kampau akipan
ngaihdamna kichi lungtang taktak a ngaihdamna ahihdan tamlou in gen leng ka
chi hi.
Mikhat in hichiin hon gen hi: “Ngaihdamna toh kisai a Peter in Jesu kiang ah
bangzah vei ka unau in ka tung ah hihkhial leh bangzah vei ngaidam ding ka
hia, sagih vei tan in ahi diam?” chi a a dotlai in Jesun sagihvei mun
sawmsagih tan k’on chi zaw” (Matt. 18:21-22) chiin dawng hi. Kei ngaihdan in
ka unau in ka tung a, a thilhihkhelh ka lungsim a hong kilat teng a ngaihdam
zel ding achihna hidia gingta kahi” chiin hon gen hi. Hiai bang ngaihdan mi
tamtakte’ ngaihdan leng hiding in ka gingta hi. I ngaihdamnu/I ngaihdampa I
muh teng a I tung a, a thilhihkhelh hong suak zel chih omthei tham ding in ka
ngaihtuah hi. Himahleh Jesu'n “sagihvei mun sawmsagih tan” achih in hiai dan
ngaihdamna gen hiding in a gintakhuai kei hi. Khelhna khat tamveipi ngaihdam
ding genna hiding in I koih kei hi. Khelhna khat/khelhna kibang I ngaihdam
khitsa amah I muh teng hiam/I lungsim a hongsuah teng a ngaihdam zel ding ahih
in bel ngaidam kichimah lehang I ngaidam taktak kei chihna hiding hi. Hiai dan
a kingaihdamna tuh ngaihdamna taktak hilou, ngaihdamna bukimlou, Laisiangthou
hon sinsak dan hilou, Pathian in mikhial eite Khrist a hon ngaihdamna toh
kibanglou ngaihdam ahi zaw hi.
Laisiangthou in “Pathian in Khrist a nou ahon ngaihdam bang in, noumau leng
kingaidam tuah chiat un” (Eph. 4:32) a chih ngaihdamna taktak, lungtang tak a
ngaihdamna, khatvei setdet ding a ngaihdamna ahi hi. “A khelhnate uh leh a
tatleknate uh ka thei gige nawn takei ding, huchi in khelhna ngaihdam a
hihnung in khelhna ading in thillat a om nawnta kei hi” (Heb. 10:17-18).
Pathian in Khrist a I khelhnate leh I tatleknate hon ngaihdam lai in
siit(reserve) neilou in a thawn in, a vek in hon ngaidam sipsip hi. Toupa phat
in om hen!!
Toupan I khelhnate a theinawn ta kei a, I khelhnate’ ziak in lungtang natna,
lungkhamna, dahna, thuakna a neih nawn ta kei a I Pathian a lungkimta a, a
lungdamta hi. Pathian mah bang a eiten leng I tung akhialte’ ziaka I thuakna,
I lungtang natna, khaatna, thangpaihna, lungsim chidamlouhna I neihte tengteng
akipan I suahtakna ding leh I damna ding in lungtang taktak a mi’ I ngaihdam
ding Toupa’ hon deihdan ahi hi. Pathian banga midangte lungtang taktak a
ngaidam thei ding in Khasiangthou in hon panpih chiat hen!
Eite dinga right message ahi, alung tang dama athin damloute, kiphulahte.
ReplyDelete