Poppy Apat IPS Officer
Poppy Apat IPS Officer
Rev S. Kaikhanmang
“Ephraim chu vuaahin a um a, a jung uh a gaw a, gah a suang sih diing uhi:
ahi, gah a suan un zong, a gil va gah deihhuaitah ngeei chu ka that diing
hi.” (Hos.9:16)
Khota (village) khat ah pasal khatin a tapa IAS hihna diingin theihtawp
suahin pan ala va, a tawpin a tapa un Indian Police Service (IPS) ahung mu
hi. A tapa un training azoh a haloh masapeen a laah diing kuan chetin
singnuai mite’n a kaaplum uhi. A tapa sih ni a mipi maia a pa thusoi in
sigaal a hung zousiah lungsim asukha mahmah hi. A pa thusoi chu: “Ka tapa
chu IAS Officer khat suah teitei na diingin No.4 business ka na bawl a, IAS
exam na ah a mark a chinzohlouh jiahin IPS ana la hi. Ka tapa IAS/IPS
officer khat a tundoh teitei na diing geelna jiahin, mihing hinkhua tampi ka
suhsiat nunga IPAS officer kana suah ahih jiahin, a haloh masapeen natan la
manlou a Pathian in ahung jeep ahita hi” chia a tapa luang tunga thu asoina
ah mipi koimah a ponalou a umsih hi. Hu ni apat Songkoh khua mipite’n Poppy
Plantation chu atawpsan vengvengta uhi, chi’n mite’n asoi uhi.
“Bangmahlou a hausatna akiam diing a, hiongleh tohgimna a kholkhawmtu chu
apung deuhdeuh diing hi” (Prove.13:11). “Dihloutah a summuh tampitah sangin
dihtatna a tawmtakhat ahoihzaw hi” (Prov.16:8). Hizongleh hauhsat tumte chu heemna leh, thaang ah, utna ngolhuai leh, susethei tampi
bang ah a puuhluut veu va, hute in chu siatna leh mathaina ah mite a sutum
veu uhi. Ajiahchu sum ngainat hi gilou zousiah bulpi ahi; hu chu khenkhat in
a deihgoh va, ginna a paimangsan va, huleh amahuh leh amahuh lungkhamna
tampi in a kisunlet uhi” (1 Tim.6:9-10). “Mengkeeng in a tuui opkhum ngaal
a, keuh theihlouh mahbangin, mi dihtatna lou a hausatna mutu in chu a damlai
nite ngeei in a nuse diing a, atawp ah mingol ahi diing hi” (Jer.17:11).
“Dihtatlouhna a inn bawltu leh, sildihlou a pindante satu; a manbei a, a
innvengpa na seemsah a, anatohman a kawm a pelou chu a tung agih hi”
(Jer.22:13).
Singtaang a ka hohna khua khat ah pasal khat in, “kani kichiing leh ki hausa diing, kumkhat a lakh khat atawmpeen a kinei diing” chin ahung soi hi. I sum deih uh, I sum duh uh, I duhaamna mahmah uh ave maw I innsung, nupa kaal, kouhtuam sung, society leh khovel subuaitu leh sumangtu. Hausatna dihlou a heem a umte leh thaang a awhte chu koimah kipaah leh nuamsa a u sih uhi. Unau deihtah, khovel a poimohpeen chu sum ahi sih a, sum neitu (balwtu) Pathian ahi zaw hi.
Sum neih jiah a kipaah diing hilou in sum neitu kipaahsah khu thupizaw ahi.
Sum neitu Pathian tawnlou a sum neih tum chu guta ahi. Hujiahin mihingte’n
Pathian tawnlou a sum amuh hiangun sawt adaih sih hi. Pathian kipaahsah inla
huchi’n Ama’n na deih leh kipaahna ahung bawlsah diing hi.
No comments