Seeing God’s faithfulness during lockdown

Seeing God’s faithfulness during lockdown

Dr. Dongzathawng

Devotional # 36 ( vol 3)

Fellowship of Thirsty Souls and Hungry Hearts

Tulai I laibu ding uh ka buaipi leh message gel man lou.

I kim i pam a Pasian mi hoi tampi puh in i vui liam jung jung uhi. Mi ginum tampi Covid natna in dawm tuan lou in ICU te leh quarintne centre te ih innn uh suah hi. 

Lamka ah kou inn kuante zong thuah pha in tu in vang Pasian hoina toh aphalam ka hi ta uhi.

Hibang lungjinna leh buaina te in hing bawm nanleh Pasian hoina leh gin umna te meipi jing lai a Sakhituihip hing kikap khia bang in Pasian ginumna leh hoina in hing nusia lou hi.

Kei bang tulai zoom meeting ka ha bawl seng a ka lutang na jou hi. zoom tungtawn in gam leh nai a i lom iit te toh ki fellowship thei hi.  Jannitahin EOC Shillong Misiangthou te toh hun nop tah ka jang uhi. Aw Pasian it a mite toh tahsa a ki mu theilou lai in Technology tungtawn in ki pawlkhawmna um thei veve a nop hina mai e…

 

Tualeh Pasian kepbitna mai zong kipah thu gengen ding hita napi in tulai Singthupi nehseng lou phial in Shillong ah eimi nupi me-juah ten hing supply uhi. Tua zong kipah huai mama hita na pi nikhat ka loinu toh Bazar ka vahna uah PA-TUNG(mushroom) khasi ten kiman deu in ana juah kia uhi. 

Tulai Phillip Yancey laibu, Joseph Prince leh Warren Wiresbe leh Henry Nouwen laibu te apat hagau ann tui tah tah toh ka ki vah lai in Pasian hoi hina mai e. ... Hagau lam ann mai hi louin tahsa lam ann zong hing supply jel   ...

Ahiin agim huai vang, i tate school work te buaipi vang gim huai vawt e…

Covid in a suh khah i tanau suapi laijomte i thumpi lai in Pasian gin umnate jong gel doh jel vai.

Tuni Topic: Seeing God’s Faithfulness During Lockdown

“Great is Your faithfulness.”

(Lam 3:23)

Tuni ih msg pen nikum a ki gielsa kang modified ahi.

President Trump in lockdown lakhiah kin a normal life umsah kinkin ding a utna khu himi a paisawt leh mitampi hing ki suicide ding chi hi.

Migam pen ei society bang hilou ahi. Ei a pen inkuan khat a khat in sum alaw leh adang teng in ki seen thei hi. Adangteng in bang ma bollou in mikhat law kine khawm nainai hi. Asemlou te athase pen, a neh hat pen, a sum jathat pen, a hamnuam pen hinalai hi. Mi tampi ann baisa ngahtop a mobile toh sun leh jaan a kimawl ngap jong ki um hi. Sapte society pen michin in asep ngai, koi ma tung a ki ngamlou, kum 18 apha leh mahni keng a ding ata uhi. President Obama tate suti lai a hotel a kilaw te isim kha uhi. Ei chu jinei, tanei tate jong i nu or ipa pension nekhawm nalai te ihi.

Sapte pen na aseplou ua, a account ua sum a lut lou leh a loan uh pia ding tam seng hi. Mimal chin in bangkim loan a ki la ahi. Loan lah bailam seng hi. Tualeh hateng a account apat cut or lakhiah ding tam hi. Inn apat Car, electronics apat furniture loan (eilam a EMI bang a ) a kila ahi.Khute khu hateng in i acount apat ki cut hi. Khujiah in sum a lut non lou chiang a date line hing khel a, aban a fine hing um, bat kibelap hi. Tuate khu huah sat huai hi.

Atawp ah himi pressure ten mite depression natna vei sah hi. Lockdown lou in jong USA pumpi ah depression natna nei mipi ching million 19 val um Kichi hi. Tualeh hia sum leh pai a lungkham ban ah inn mun a , a ngen a hunsawtpi hinkhuo man khu mihing khat adin thuah hah hi. TV te ah imu USA te khu Lockdown beina din rally nei tawp uhi. Paycheck umlou a hinkhuo man khu thuah theilou uhi. USA um lai kal khat sung sepna ding mulou, neilou mai a um leh jong ki thomhau in ki ngaisiet huai hi. Ajieh pen nasemlou umlou hi.

Seplou a neh khu ngainase lou society ahi uhi. Eite pen seplou a neh ki ngaina se mama ta hi.

Pasian gualzawl na in ih societypen sapte bang a ingen a thuah, ingen a neh leh ngawl te kihi lou hi. Ki thei tua, ki panpi tua, ki sawmdawl tua society ihinalai ua a jiajia um ihi uhi.

Tutung locdown sung in bangbang ibol ta uai? Bang thil i semkhia ta uai? Bangbang ituahta uai? Chi iki dong ut hi. Ih gam thilthah khat khu lockdown sung in pastor tampi in media tungtawn a Pasian thugenna inei thei ua( kei chilou) youtube a imin uh mu thei ding tampi i um ta uhi. Khenkhat home crusade bolthei jong um hi. Kei jong lockdown umlou leh ka book project hitan tung ngeilou ding ka hi.

Tutung lockdown jangsiem diah te khu ni 20 chinglou sung a Holy Bible simsuah te ahi. Kei thei maimai jong mi 5 lam pha hi. Tuate lai ah mi 2 in ni 10 ma in sim suah uhi. A ki genkha lou tampi um ding hi. Ih msg Amasa in Noah te lockdown kum 1 leh ni 10 thu igen ta ua, tunia i gen sawm pen sawt diah hi. Elizah lockdown khu kum 3 ahi nalai hi. Kum 3 sung gampumpi a gua ju lou. Amasa in Elizah khu kereth luipieu ah ki lockdown hi.

A lockdown na mun ah VAAH( raven), Va lah a vasianglou pen, gintat huailou pen jang in Pasian in neh ding va supply hi. Tuajou in Zarephah meithai nu'n vah hi. Elizah jiah in meithainu leh atapa jong lockdown sung pumpi tasamlou in neh ding mu uhi.

Tunia iki doh ding khu lockdown sung in Pasian hoina leh ginumna na mu thei ei? Chi ahi.

Nasep ding um nonlou, sum lutna ding teng ki khah ta. Ahin ki doh ut khu lockdown jiah a ann ngawl i umta uai? .Ni 40 val nasepna tahtah umlou in ann neh ding neinon lou a kikhailum ija ta uai?Ahileh ineh te uh khoi lamlam a hing kipan? Koi nasep malah ihmumu mai a chimlum dehdeh ihita uhi. Ahia i dudu ine ua gil va mai hilou in exercise umlou in i thaulum dehdehta uhi.

Tunia igen ut pen khu lockdown sung in Pasian ginumna na muthei ei? Chi ahi. Khenkhat Bible hunlai a kum sabath leh Jubilee hun lai bang in nasemlou in Pasian in hawsuah kum 3 ading hing suh pungsah bang ihi uhi. Nou thei sing ken vang Pasian ginumna lamdang sa ing. Niteng in Pasian khawllou in ka phat hi.

I theiphalou lam ah Pasian in atate tung ah a ginumna langsah hi. Noah Pasian, Elizah Pasian khu kei pa Pasian jong ahi a. A gin umma khut in hing pui hi chi ka muta jen hi.Nidang a ha khat a na neh khoplou khu tu tung in ha 2 in hing nejou sah lou thei hi.Nidang a hasep a na sep a na mujat double in Pasian in tutung semlou in hing musah a, na lou hawsuah hing suh pungsah thei hi. Israel te kum sabath chiang kum 6 th na asep uh khu kum 7 th leh 8 th natan a set thei ding un Pasian in suhpung sah hi.

Ka pa Ka Pasian khu a muan huai ahi. Shi jou tangtawn ading mai a kingapna tah hilou in tu leh tu a ka ni chin hinkhuo a ding a jong muantaah Pasian ahi. Aman thil hing tung dingte mathei in ei ading in bangkim guatloh sa in ana koi jouta hi. Ei gim ngailou in i pa in bangkim gualtuahsa in ana koi ta hi.

Noah te inkuan mang hillou, Elizah Va-ah tungtawn a vah pa, zarephah meithai nu ginna jatat sah Pasian in jong nang umna leh dinmun hing mu in hing theisiam mama hi. Aman tuni tan agin umna hing toh ang tuamkhum hi. khujiah in tuni tan nelou talou a hing koilou mai hilou in khenkhat hoihoi tu lockdown lai tah insung van lei jiehjieh jong ka thei hi.Khujiah in a hun a hai umlou in Pasian phat in kipah thu gen nasep in nei in . Pasian kipah ding hi. Thum ding na theilou leh jong kipah thu mawh gengen mai in. Na thum hat na sephat jiah a hite na mu hisih . Ama gin umna jar joujou pa/ nu na hi. Kipah thu gen ha bawl mai in.

Lungkham leh kingaisiet khu melma Setan a hing kipan ahi a mun na otlou ding ahi. Lungkham huai na chite jong kipahthu gen khumkhum lechin khu lungkhamhuauna jung teng hing ki tan bei dimg hi.

Mangpa'n tu lockdown sung a, a ginumna ahing musahte jiah a Amin phatphat ding leh agin umna thupi sem a muthei ding in hing umpi ta hen!