NA SATHAU BIING-AH SATHAU THUN INLA, PAI IN

"...NA SATHAU BIING-AH SATHAU THUN INLA, PAI IN..." SAMUEL MASA 16:1

Nisim Manna

Israel kumpi dinga Sawl sathau a nilh pen Samuel ahi hi. Kumpi Sawl in Topa thupiak a zuihloh manin kumpi hihna panin Pasian in Sawl nolh khin ahih thu Samuel in thei hi. Tua manin Sawl hangin Samuel dah mahmah hi (1Sam.15:35). Hih thu in Samuel gimsak mahmah hih tuak hi. Tua ciangin Topa in Samuel kiangah, Sawl hangin bang tanvei dah ding na hi hiam? Na sathau biing ah sathau thun inla, pai in... ci-in sawl hi. Hun beisate ngaihsun nawnlo in pai in, mainawt in! Plan-B ka neih pen plan-A sangin hoih zaw hi, Topa in aci ahi hi. 

Tua mah bangin eite zong hun beisa thupiangte in salmat bangin hong mancip thei-in tua-in i mainawt ding hong khaktan thei hi. I pilvan kei leh mainawt lo-in i dinkhawlna in tuni huna Pasian' nasep ding khaktan thei hi. Hih thu sawltak Paul in theician ahih manin, "ka hih khat om a, ka nunglam a om nate mangngilh in ka mailam a om nate ka zam hi," na ci hi (Fil.3:13). Na lawhsap manin na dah kha dinga, na itpen in hong nusiat manin dahin na lungkham kha ding hi. Ahi zongin bangbang lawhsapna, lungkhamna, dahna na tuak hangin a lungdam huai mahmah thu-in mailam ah Pasian in nang adingin a hoihzaw geelna nei hi, cih phawk in. Tua manin Kha tawh kidim zaw-in, Pasian deihna sem dingin pai in, mainawt ngam in! 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐡𝐮𝐧 𝐛𝐞𝐢𝐬𝐚 𝐭𝐡𝐮𝐭𝐞 𝐡𝐚𝐧𝐠𝐢𝐧 𝐤𝐢𝐭𝐡𝐚𝐧𝐞𝐦 𝐬𝐚𝐤𝐢𝐧 𝐝𝐢𝐧𝐤𝐡𝐚𝐰𝐥 𝐦𝐚𝐢 𝐥𝐨-𝐢𝐧, 𝐤𝐞𝐢 𝐚𝐝𝐢𝐧𝐠𝐢𝐧 𝐚 𝐡𝐨𝐢𝐡𝐳𝐚𝐰 𝐧𝐨𝐧𝐠 𝐠𝐞𝐞𝐥𝐬𝐚𝐤𝐧𝐚 𝐭𝐡𝐞𝐢 𝐚 𝐤𝐚 𝐦𝐚𝐢𝐧𝐚𝐰𝐭 𝐳𝐚𝐰𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!