THINA IN MIHEM CHUNGA THA ANEI DAN
Kaineo Touthang
Semtilin thina hin mihem chunga tha
ana neipon, thina kiti jong ana kihepoi hinlah mimasa Adam le Eve chonset a
ahung lhah hon’a pat a Pathen’in mihem te chunga thina ahin koi ahitan ahi.
Hiche hi tahsa thina apeh goh hilouvin lhagaovin jong thina, lhagao mitchot
na, chule Pathen toh akigui jopmat nau chu ana sutan tan ahi.
Thina hin mihem te chunga vai ahin hom pantan, mihem khat hi nikhat le thicheh
ding chu ahung hitan, chule mi sim joulouvin thina pel theilouvin thinan
alhunden’in, tunjong nitin’in thinan mi adel jingin ahi. Mihem koima kei thi
thei ponge tin thina apel thei deh poi, mihem ten Pathen ahi tia mihem tampi
ahou houjong thinan apel deh pon, thina atoh cheh un ahi.
Ahileh tunin nangin jong thina hi pelthei inge tia nakigel em? Mimasa Adam le
Eve apat tuni geiya ahao avai, alen aneo khen louva mitin chung’a vai hin hom
jing thina hin tunia nangle kei eipel ding vang ginchat ahitapoi. Ki-it lheh
hitin da lheh jong le hen ito tei ding vangchu ahitai. Eima nople da kibanga
hung lhung tei ding ahitah jeh’in thina kimai to pidinga ikigot ding chu
nangle kei dia lampi phapen joh ahung hitan ahi.
THIJOU (lhagao hinkho) HETCHET APOIMO DAN:
Tahsa’in thina toh jongle tonsot a thi thei lou lhagao hinkho aum nalaijin
ahi. Mitampin thijou hinkho hi ahetlou jeh uvin thina kichalouvin anopnop in
hinkho amang’un, alungim’un, alungdong’un, alhaset nile alhagao hinkho ding
gellouvin ama le ama akithat ji un, abangin midang (asopi, a-u, a-nao) athat
ngap chan, that jong athat un ahi.
Abang loikhat in leiset hinkho abei teng thi nunga hinkho aum ding hi
ahepouvin, idam sunga hi hinkho nom tah’a manna inopnop neh ding ideidei
bolding ahi atiuvin, chule athi tenguleh asopi a-u a-naoten asopinu ahilou
asopi pa hi kanung mu kit lou ding ahitai tin ha kap in akap jiuvin, akinep
nau jouse kichai in agel ji tauvin ahi. Thinung teng chemasa (ana thimasa)
hotoh kimu to kit ding him him agelpha pouvin ahi. Thinung hinkho aum lam
helou hohi eti lainat peh um hitam. Henge, tunin nagin jong thinung hinkho
aume tinan nate, ahileh thidinga naki got chai hitam. Nakigot chai nailouva
thiding nakichat nahlai le vang thinung hinkho hepha louho toh najot nading
chule nadinmun kibang nalai ahi katinom’in ahi.
Thinung’ah hinkho aum monge tihi Bible hil dung juiya ivet a ahileh akichen in
ahimonge ti jong tahsan umtah ahi. Ajeh chu Jesu ama tah in jong Lazarus le
mihao pa thusim’ah kichet tah in eihil un ahi, (Luke 16:19-23). Leiset a
damlai hinkho sunga itobanga hinkho mangten hoilai mun ajot diuham tijong
kicheh tah in akimun ahi.
THINUNG’A UMNA DING MUN:
Thinung ahiloule thijou teng um na ding hi mun-ni aumin ahi. Hichu Damun
meidel le Vangam ahi. Hiche teni hi mihem khat in khat joh joh alo tei ding
ahi. Hiche thuhi kajah jingsa kahet sa ahi tijongle chun naki semtoh loule
nahet na chun nalhat doh thei deh louding ahi. Leiset hinkho man dan ahiloule
damlai a Christa kisan le kisanlou dung juiya mihem khat in ajot na ding
akisem cheh ahin ahi. Mihem ten ithi nung uva ijot nadiu meidel ahahsat dan
Pathenin anahet jeh a asemsa achaten hiche hahsat namun a achediu chu avet
joulou jeh a achapa changkhat hileiya eiho lim leh mel pu’a ahinsol a tonsot
sohtan na a kon lhatdoh dia ahin sol ahi. Christa huhhing na nei nailou
nahileh, tunia Pakai pen nalem hi nang ding’in tonsot lampi kisem toh nan
mangtan.
HOILAI PEN JON DINGA NAKI GOT EM? TUNIA KIPAT IN THI LUNG MONNA NANEI NADIN
NALAMPI KISEM TUP DINGIN PAKAI MININ KAHIN TEM’E.
No comments