THUDOH 2 of 11 Local church-a lamkai le vaipoh a thunei ding ho chu koikoi aheuvem?

AMUN HOUBUNGA LHAGAOVA LAMKAI HO

Dr. Haokhothang Mate

 

 

THUDOH 2 of 11

Amun houbung-a (Local church-a) lhagaova lamkai ding ho chu koi koi heuvem? Koi chun vai apoh-a thu anei ding hitam?

Amun houbung sunga lhagaova thunei ding vaihom ding chule lamkai ding ho chu imutauvin ahi. Hiche toh kilhonna ivet khom diuva dei um chu, amun houbung sunga thunei vaihom ho chu koi koi hiuvem tihi ahi. Amun houbung (Local church) sunga koipen chu hiche thuneina chu kipe-a ham?

 

Ama ho kiminsahna

Amun Houbunga lamkai ho hi Bible-in minchom cheh-in akouvin ahi. Hiche ho chu abanneichan veuhite.

 

1. Upa ho (Elders)

Hetbai lampena akiminsahnau chu “upaho” ti hi ahi. Greek paova  presbuteros ahi. Hiche thuchenga kona hi "presbyter" ahilou leh "Presbyterian." hungdoh ahi. Presbyter khat chu upa khat ahi. Mi tamtah kiseina ahi teng leh presbytery kiti ahi (I Timothy 4:14). Akum upa, synagogue-a lamkai ho jong chu akikou tengu leh hiche thucheng hi kimang ahi. Amaho mopohna chu vaihopna le mihil hina ahi. Houbung masaho chun hiche kiminsahna hi ana manguvin  houbung sunga lamkai ding ho jong hitia chu ana minsah-u ahi.

I Timothy 5:17 dungjuija upa ho chu adinmun-u leh anatoh jal-uva jabolna adenni/athonia peh lom ahiuve. Solchah hon tahsan le chondan chungchangah thuneina lhingset ana neijun ahi, ahin Solchah Peter chun upa ho lah-a khat kahi ana tin ahi. John jong chu upa khat ana kitnin ahi. Hiche hin solchah ho thuneina chu upa ho ana kipeson ahi ti vetsahna ahi. Hijeh-a chu upa hon amun houbung sunga thuneina le vaihopna chu aneiju ahitai.

 

2. Avesuija pangho (Bishops)

Thulhun thah houbunga lamkai ho kiminsahna dang khat chu Bishop ahi (ITimothy 3:1; Philippians 1:1).

Hichea kimang Greek thucheng chu episkopos, ahi, English-a "episcopal." Hiche thucheng hin akou doh chu "avesuija pang (overseer), angah-a pang ("guardian)," ahiloule avetupma pang(manager) ahi" (Acts 20:28).

Bishop kiti chu amasanga pang, amopo, chule avesui tina ahi. Rome –a lamkai lenpen (Emperor) chun gamthah khat alah teng leh, hiche gam sunga chu vaipo ding mi khat ana lheng dohjin, hitabang panmun lo ho chu “bishop” tia ana minsah ahi. Hichea kilang tah-a kimu doh khat chu amun houbung sunga Pathenin vaipo ding, vaihom ding le, thunei dinga atum beh-a ngensena ana peh mi aum-e tina ahi. Ama ho chu Bishop ho, ima lam jousea houbung avesuija pang ho tina ahi.

 

3. Pastor ho

Mi jousen ahet bailam pen chu Pastor hi ahi. Ahin hiche thucheng hi Thulhun Thah-a akihaman lou pen ahi. Thulhun Thah sunga pastor hi khat vei bou akimin phah-in ahi (Ephesians 4:11). Hiche jong hi mihil hina toh kigom’a kimang  ahi. Greek paova ‘poimen’ kiti hi kelngoi ching tina ahi. Houbunga Lamkai hon kelngoi ching ahinauva  amopohnau le atoh dingu toh kimatna kimang thucheng chu ‘poimaino’ahi. Hiche hi mun nia bou akimangin ahi (Acts 20:28 chule I Peter 5:2, KJV, "feed").

Hebrews 13:20 le I Peter 2:25 a Christa hi ‘eichingpao’ akitin chule Thuphon 2:27 a Christan thih tenggol-a ichunguva vai apoh ding (KJV rule) ahilou le eichin diu thu akiseijin ahi (Revelation 12:5 and 19:15). I Peter 5:4 a Jesu hi kelngoi ching pipui akiti kitnin, hiche hin avetsah chu upa ho hi ama noija chinghoi kaihoi ahiuvin ama-a kon jeng ahiuve ti avetsah-in ahi. Kicheh tah-in pastor ho hi houbung sunga Christa noija vai hom ding le vaipo ding ahiuve. Amahon kelngoi achin dingu kelngoi hon amaho achin lou dingu ahi.

Thulhun Thah a kimu dungjuija amun houbung chunga lhagao lam thua thunei vaihom ding ho chu upa ho (elders), avesui ho (bishop ho) chule chinghoi kaihoi ho (pastor ho) akitin ahi. Houbung sunga vaipohna ding thaneina nei ngansena chang ho chu ama ho hi ahiuve.

 

Amaho kihetna ahiloule kiminsahna

Hiche kiminsahna ho kimuna Bible chang ho ivetna ahile hiche kiminsahna ho hi khat khel-a khat kimang thei ahi. Hiche kiminsahna thum ho hi mi khat tohmun khat kihetna bou ahi.

Acts 20: 28 a "upa ho (elders") (presbuteroi, v, 17) hi Pathenin angense avesui ho(bishops) chule achinghoi akaihoi ho chu ahiuve  chule amun houbunga kelngoi ho ching ding le vaihom dinga( poimaino, "feed" [KJV] or "rule) Pathen thupeh chang ahiuve.  

Upa ho chu pastor na tong bishop ho ahiuve. Hiche hin avetsah chu, upa khat chu pastor ahin chule bishop jong ahi. 

I Timothy 3 a Bishop lolhing khat hina ding kipe ho le Titus 1:6-9 a upa lolhing khat hina ding dinmun kipe ho akibangin ahi. Hiche thumun teni ana jih-a Paul lungsunga office khat bou um hidingin akilangin ahi.

Titus 1:5-7 sungah ‘upa’(elder) le avesui (bishop)thakhatnin akimangin ahi.

Achainan I Peter 5:1-4  hin upa ho chu houbunga pastor na atohna dingu (poimaino) le avetsuija (bishop) apanna dinguvin thupeh apen ahi.

Hijeh chun kiminsahna thum ho hin tohmun khat avetsah-in ahi. Achuom cheh hina ima aumpoi. Hiche jeh-a chu houbunga pastor ho chu upa ahilou le bishop akiti teng leh Bible thuhil toh kitoh ahi. Ahin hiche lekha sunga hin navahna dingin ‘upa” (elder) kiti thucheng hi atamjoa hung kimang ding ahi. Ipi thucheng kimang jong le office khat kihetna ahi ti hi suhmil lou ding ahi. Pastor chu bishop jong ahin upa jong ahi. Hichea office kiti hi upa ho dinmun kihetna ahi. Panmun hijo louvin tohmun joh ahi.

 

Hiche channa amaho chung chang hilchetbena

Hiche kiminsahna thum ho hi office khat kihetna ahi. Bible chung changa hetthemna nei ho sei dungjuijin kiminsahna thum ho hin mihem khat le anatoh chuom cheh avetsah-in ahi. Upa (elder) kiti hin mihem khat hina-a pilhing hina avetsah-in ahi. Bishop hin ipi abol-em ti avetsah-in. Avaihom, avesui hina le avaipo hina avetsah-in ahi. Pastor hin mi akhohsahna, avengtup ahina, angah ahina, anneh ding pe leh lamkaija pang ahi kihetna ahi. Hiche thum ho hin panmun (office) khat kihetna hijong le ahina le anatoh ho lam chuom cheh-a avetsah-in ahi.

 

Ngaidan khat

Upa ho chu pastor ho ahiuvin chule upa ho chu thunei vaihom ho(Boshop ho) ahiuve. Upa ho chungchanga tulaija hetkhel khat chu ahi leh upa ho hi houbung sunga office athum channa lo ho ahiuvin, deacon ho sanga thunei jo ahivanga pastor ho sanga thuneimo jep ahiuve. Upa ho hi houbung mipi thalhenga phat chomkhatna dinga houbung ngaichat ho chungchanga pastorpa henga thulhut ding le thumop dinga kilheng doh danin akigel-in ahi. Houbung tampiah upa ho hi pastorpa chunga thunei dinga kilhengdoh board danin aum doh tan ahi. Hiche tabang lunggel leh ngaidan ho hin upa chung changa Thulhun Thah thuhil hetkhelna atah langin ahi. Pastor ho chu upaho ahiuvin. Upaho chu pastorho ahiuve. Upaho tohmun hi jatchuom cheh ahin chule jabolna jong jatchuom cheh ahi ti hi chomkhat jou teng leh hung kivekit ding ahi. Ahivangin, upa jouse chu pastor ahiuvin anoinung joh aumpoi. Chule upa-pastor–bishop dinga lhing lou mi khat chu houbung upa dinga lhen lou ding ahi.

Thu khum khana

Thulhun Thah thuhil chu ahileh, amun houbunga thaneina hi upa ho bishop ho le pastor ho khutna akingamin ahi. Christa le asolchah hon hiche ho khutna hi thaneina chu ana peh-u ahijeh-a chu anungjui hon ama ho thu angai diu chu ahiding dol tah ahi. Upaho bishopho chule pastor hon jong Christa thunoija chinghoi kaohoi ahiu akihetnu angaije. 

Also Read

Thudoh 01
Thudoh 03
Thudoh 04
Thudoh 05
Thudoh 06
Thudoh 07
Thudoh 08
Thudoh 09
Thudoh 10
Thudoh 11