DAM SUNG’A KINGAILUT DING by Kaineo Touthang
DAM SUNG’A KINGAILUT DING
Kaineo Touthang
Vetan, sopi le sopi kipum khat a achen khom teng iti phat’a pha a lung
lhai um hitam! (Psalm 133:1)
Damsunga kingailut ding kiti hi mihem a ding’a angai khoh pentah ahi. Sopi
insung khat a nom’a lung kitoh a cheng khom theilou hohi poh nat aum lheh
jengin ahi, ajeh chu ama hon kingailu tah a chen khom aman tam dan ahet lou
jeh u ahi. Abangkhat in vang asopi a-insung mi khat tou ahung bei teng
damsung’a kingailut ding akhoh dan ahin geldoh ji nauvin ahi. Ahin atam jon
agel doh chom pon ahi ajeh chu ama chun kingailut aman tam dan leh athupi
dan chule anop dan ahet lou jeh ahi.
Damsungin kingailu ute ahung kitileh damsunga ikingailut uhi alhasam’e ti
hi seilouva het ding ahijenge. Hijeh a chu ken jong tunia hi nangma
kangailut jeh a nadam sung’a na-insung mite, naloi nagol, nasopiu na-u
na-naote, naheng nakom, nakho naveng toh kingailu tah-a cheng khom dia
kahintem nahi. Tua a-nule a-pa dam nalai hon nule pa mantam dan jong ihet
lou Meithei u ahi, ven nalungthim in kingaiton na-nule na-pan vangset pin
tuhin nadalha tale itobang in hinkho namang dem? Nahinkho anom dem? Navah
nasa dem? Keichan dia kagel leh vang hahsa kasa lheh jengin ahi. Dam’a
insung kikima umkhom laini hi aman tam dan hi atepi ding kahe poi.
Eiho nam mite hi hinlaiya kiho ahilouleh kithe te ihiuvin chule thinung’a
kingailute ihiuve kitile kiseival ponte tin kagelin ahi. Damsung’a
kingailutah a cheng khom’a nui khom dingte kingailut na lam lam jong hepha
louvin hinkho imang ji un, thinung leh ikika un thil man tam tah tah in
kasopinu kasopipa het jing na din tin mi mumun kangailue itijiuvin
thil tampipi ibol ji un ahi. Ahivangin kaseinom pipen chu nasopi athinu
ahilou leh athipa chun athi nunga nagailut naho chu nahet peh lou ding pa
chu pohnat um kasan ahi. Henge thi nung hijong leh iki ngailut nau ahipou
leh aphalheh jenge, ahin adam sung chun hiti chun mipi ma-ang hihih jongle
changvel guhthim hijongle nangailut na anahetsah in lang, kangailue tin
nangailut na chu anavet sah in lang hile chun kingailut na chu sang jolou
ding ham katin kagel in ahi. hijeh chun idam sungun ha ngai in
kingailu ute kati nom’in ahi. Mite ma-anga mi mit mu a bolkhel khel
angaipoi. Eiho kikah a ikingailut nau idamsunguva ikihetpeh to uva
kingailutah a ihinkhom diu pa chu thupi jo ahi.
Nanu le napa nasopi nau nanao dam nalai ahi leh mivangpha tah nahi. I-ma
cha kinomsot nan nei hih in phat nanei sung in homtho tah in nanu le napa
hihen nasopi chengtoh chengkhom din kahin tem’e. Anu ham ahilou leh apa ham
in adalhah hokhu ven itobang’a achun le ajo alha ngai hitam. Mi insung kima
aum amua anuikhom teng’ule amahoa din athoh hah in nule pa lhangai yin amao
mao jiun ahi. Nangin hitobang nato nailou jeh in Pathen thangvah in lang
nachun leh najo toh lung kitoh a lenkhom a hinkhom ding gotan. Tua achun le
ajo dam talou nahi khah a ahileh, adam honlaiya kipah tah a nana nuikhom uva
nalenkhom jeh un kipah in. Ahin ana dam sung hon’a alunghon lhaina a ana um
talou nahivang leh Pathen in nangaidam hen lang chuleh tua nangin jong nadam
sungin nabolthei chanin nule pa tia ja thei dol ho chu jabol in kingailut
sah in lang himaitan, hi chu Pathen nangailut na ahin Pathen in lungmon
naleh phatthei naboh tei ding kinem lal hih in.
Damsung kingailut hi aman tam in aneiten adamsunguva aum na jouseu chu
insung nom khosung nom asotei diu ginchat ahi. Tunia pat in nadam sungin
nachen khompi nasopi na-u na-nao, na-nu na-pa toh kilungtoh in hingkhom in
lang, nakingailutbe jing thei nadingun Pathen in naching jingu hen lang
nalam hil jing tauhen. Kakipah e.
No comments