JONAH HEH BANGIN NANG ZONG NA HEH HIAM?

JONAH HEH BANGIN NANG ZONG NA HEH HIAM?
Nisim Manna

𝘽𝙪𝙡𝙥𝙝𝙪𝙝: ...... 𝙠𝙚𝙞𝙢𝙖𝙝 𝙞𝙣 𝙜𝙖𝙣𝙝𝙞𝙣𝙜 𝙩𝙖𝙢𝙥𝙞 𝙩𝙝𝙖𝙢𝙡𝙤, 𝙖 𝙩𝙖𝙠𝙡𝙖𝙢 𝙠𝙝𝙪𝙩 𝙡𝙚𝙝 𝙖 𝙫𝙚𝙞𝙡𝙖𝙢 𝙠𝙝𝙪𝙩 𝙣𝙖𝙣𝙜𝙖𝙬𝙣 𝙖 𝙠𝙝𝙚𝙣 𝙩𝙝𝙚𝙞 𝙣𝙖𝙞𝙡𝙤 𝙣𝙖𝙪𝙥𝙖𝙣𝙜 𝙩𝙪𝙡 𝙯𝙖 𝙡𝙚𝙝 𝙩𝙪𝙡 𝙨𝙖𝙬𝙢𝙣𝙞𝙝 𝙨𝙖𝙣𝙜-𝙖 𝙖 𝙩𝙖𝙢𝙯𝙖𝙬𝙩𝙚' 𝙩𝙚𝙚𝙣'𝙣𝙖, 𝙖 𝙡𝙞𝙖𝙣 𝙢𝙖𝙝𝙢𝙖𝙝 𝙉𝙞𝙣𝙚𝙫𝙚𝙝 𝙠𝙝𝙪𝙖𝙥𝙞 𝙥𝙖𝙢𝙢𝙖𝙞𝙝 𝙨𝙖 𝙡𝙤 𝙙𝙞𝙣𝙜 𝙠𝙖 𝙝𝙞 𝙝𝙞𝙖𝙢? 𝙘𝙞-𝙞𝙣 𝙖 𝙙𝙖𝙬𝙣𝙜 𝙠𝙞𝙠 𝙝𝙞.   𝙅𝙤𝙣𝙖𝙝 4:11

Pasian in Nineveh mite hehpih-in hunpha dang a piakkik manin Jonah nakpi takin heh hi. Jonah ngaihsutna ah Nineveh mite hehpih taaklo-in leitung panin hepkhiat dingin a muh ahi hi. Bang hang hiam cih leh Nineveh mite pen Israel mite a dingin a gal lianpen hi uh hi. 

A taktak in eite in zong tuhun a dingin i Nineveh (i gal) tampi om kha ding hi. I seppih hong langpan' dente zong hithei a, i lawmte, i veng-i paamte, i khuapihte, i pawlpi mite zong hithei hi. Hih bang mite in hong langpannate-hong gensiatnate hangun amau tungah zong siatna-hoihlohna khat beek Jonah bangin a tun ding kideih kha thei hi. 

Tuni i Lai Siangtho bulphuh na tungtawn-in ei mahmah zong i ki-etphat ding Pasian in hong deih hi. Eite zong Nineveh mite sangin i hoihzawkna om tuanlo a, hoihlohna thaman a ngah thei tawntung i hi hi. Tua bang hi napi Pasian' hong itna leh hong hehpihna hang bek tawh tuni ciang i nungta thei hi. Tua thu phawk kawm-in tuni in nang hangin mi dangte in hamphatna, hehpihna thupha a ngahna dingin nungta-in nasem in! 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐧𝐚𝐧𝐠𝐦𝐚 𝐧𝐨𝐧𝐠 𝐡𝐞𝐡𝐩𝐢𝐡𝐧𝐚 𝐡𝐚𝐧𝐠 𝐛𝐞𝐤 𝐭𝐚𝐰𝐡 𝐡𝐢𝐡 𝐜𝐢𝐚𝐧𝐠 𝐚 𝐭𝐮𝐧𝐠 𝐤𝐚 𝐡𝐢𝐡 𝐥𝐚𝐦𝐭𝐚𝐤 𝐤𝐢𝐩𝐡𝐚𝐰𝐤 𝐚, 𝐤𝐞𝐢 𝐡𝐚𝐧𝐠𝐢𝐧 𝐦𝐢 𝐝𝐚𝐧𝐠𝐭𝐞 𝐢𝐧 𝐳𝐨𝐧𝐠 𝐭𝐡𝐮𝐩𝐡𝐚 𝐚 𝐧𝐠𝐚𝐡 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!