PASIAN IN KOI BANGIN HONG CIAMTEH DING NA UT HIAM?

PASIAN IN KOI BANGIN HONG CIAMTEH DING NA UT HIAM?
Nisim Manna

𝘽𝙪𝙡𝙥𝙝𝙪𝙝: 𝙉𝙤𝙖𝙝 𝙞𝙣 𝙖 𝙩𝙝𝙪𝙢𝙖𝙖𝙣 𝙢𝙞 𝙠𝙝𝙖𝙩 𝙝𝙞....... 𝙋𝙞𝙖𝙣𝙘𝙞𝙡𝙣𝙖 6:9

Noah min khiatna pen 'tawlnga,' 'tawldam,' 'hehnepna,' cihna ahi hi. Bang hangin hih bang min kiphuak hiam cih leh Noah pianma in zong leitung mite sialua khinta in, gitlohna leh thumaanlohna tawh kidim in, tua teng panin a honkhia ding honpa khat lamen mahmah ding uh hiven Lamekte nupa in tapa hong neih ciangin Noah min phuak uh hi. I Lai Siangtho bulphuh ah i muh bangin Noah pen Pasian' muhna ah mi dik/thumaan in kiciamteh hi. I Lai Siangtho ah Noah min a kigen ciangin a thumaan, adik-in kigen den hi (Ezk.14:14, 20; Heb. 11:7; 2Pit.2:5). Ahi zongin i theih ding thu in Noah dikna/diktansakna pen ama hanciam tawmna tawh a ngah hilo-a, Pasian hehpihna hangin a upna tawh a ngah ahi hi. Abraham zong tua bang mah ahi hi (Pian.15:6; Heb. 11:8ff). Tua hi-a, Noah pen diktansakna a ngah khit ciangin dikna leh thumaanna tawh a kalsuanpa ahi hi. 

Tuni in nang tangthu kigelh ding hileh koi bangin a kiciamteh ding hiam? Pasian' ciamtehna ah a thumaan mi in hong thei ding hiam? Diktansakna a ngahpa-a ngahnu na hih leh dikna leh thumaanna tawh a kalsuan ding Topa’n hong lamen hi. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐍𝐨𝐚𝐡 𝐛𝐚𝐧𝐠𝐢𝐧 𝐧𝐚𝐧𝐠𝐦𝐚 𝐦𝐮𝐡𝐧𝐚 𝐚𝐡 𝐭𝐡𝐮𝐦𝐚𝐚𝐧 𝐦𝐢 𝐤𝐚 𝐡𝐢 𝐧𝐮𝐚𝐦 𝐡𝐢. 𝐓𝐮𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!