PASIAN MUHNA AH MI DIK CIANG BEK HILOU DINGIN AW

PASIAN MUHNA AH MI DIK CIANG BEK HILOU DINGIN AW
Nisim Manna

𝘽𝙪𝙡𝙥𝙝𝙪𝙝: ..... 𝙖𝙢𝙖 ( 𝙉𝙤𝙖𝙝) 𝙠𝙝𝙖𝙣𝙜-𝙖𝙝 𝙥𝙖𝙪𝙗𝙖𝙖𝙣𝙜𝙡𝙤 (𝙠𝙖𝙬𝙠𝙗𝙖𝙖𝙣𝙜𝙡𝙤) 𝙝𝙞. 𝙋𝙞𝙖𝙣𝙘𝙞𝙡𝙣𝙖 6:9

Pasian' ciamtehna ah Noah pen a thumaan/a dik bek hilo in paubaanglo (kawkbaanglo) in kiciamteh hi. Laigelh mi pawlkhat in Noah thumaan/dik cih ciangin Pasian mai-a a nuntakna a kigen hi-a, kawkbaanglo cih ciangin mite mai-a a nuntakna a kigenna ahi hi, ci uh hi. Mi khatpeuh in Jesu Khris a upna tawh Pasian mai-ah midik a suak thei hibek-a, tua midik a suak mi pen mite mai-ah zong midik ahihna a nuntakna tawh kilang ding hi. Noah kawkbaanglo cih ciangin mawhna neilo cihna hilo-a, a ginatna a kigen hi-a, Pasian mai leh mite mai-ah gensiatna ding leh mawhpaih theihna ding omlo cihna hi. 

Tua mah bangin Jesu Khris upna tungtawnin pianthakna a ngah mite' nuntakna ah gamtat hoihna a kimuh ding ahi hi. Noah bangin i upna i nuntakpihna tungtawnin Pasian mai-ah midik bek hilo-in, mite mai mahmah ah zong paubaang hetlo-in i nuntak-gamtat ding ahi hi. Leitung mi tul tampi lak panin upna tawh kalsuan-a, kawk a baanglo mite Pasian in ama deihna a semkhia dingin zangnuam-in, telkhia nuam a, tua bang mite thupha pia-in, midangte adingin thupha naak suaksak nuam hi. Nang tua bang ding na ut hiam? 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐧𝐚𝐧𝐠𝐦𝐚 𝐦𝐮𝐡𝐧𝐚 𝐚𝐡 𝐦𝐢𝐝𝐢𝐤 𝐜𝐢𝐚𝐧𝐠 𝐛𝐞𝐤 𝐡𝐢𝐥𝐨 𝐢𝐧 𝐤𝐚 𝐧𝐮𝐧𝐭𝐚𝐤𝐧𝐚 𝐚𝐡 𝐩𝐚𝐮𝐛𝐚𝐚𝐧𝐠𝐥𝐨 𝐢𝐧 𝐤𝐚 𝐠𝐚𝐦𝐭𝐚𝐭 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!