RAPTURE A PANGKHALOU TE SILTUOH DING GIMNEI - PART 5

RAPTURE A PANGKHALOU TE SILTUOH DING GIMNEI - PART 5 
Rev.Stephen Khupsianlal

Rapture a pangkhalou ten asiltuo dingte ukhu Bible genbang in aban ban in ina genta ua, Pasian Thangpaina Chiemtena 7, Pengkul 7 leh Hengkuong 7 gimnei tah tah hing um dingte ah abei nai sih a, Rapture zou Tribulation Gimthuona kum 7 sung in piengtha dihtah te zousie leh Mangpa Hagau lahtou a um ta ding ahizieh in Hepina Hun abei ta ding a, Setan in nasatah in nna ahing sem ta dinga, Anti-Christ ahing tung ding ta ding ahi.

Tuachin kum 7 Tribulation hunsung in One World Government kivaihawmna ahing umta dinga, Anti-Christ khu athunei pen, leitung pumpi ah C-in-C Commander in Chief ahing hita ding hi. Ama khu Rapture a pangkhalou ten abieh uh angai ta ding hi.

Anti-Christ khun vai hawmta ding ahiziehin, ama chiemtena number 666 zong hawm hita ding hi. Anti-Christ pen mihing ahi ding a, ama khu Setan in aluokhum dinga, azat ding ahi. 

ANTI-CHRIST: Anti-Christ khu Kihilna 13:1 in 'Lutang sagi leh kii sawm nei...' achi a, Daniel 7:8 in 'Kii te lah a kii neu khat hing poudoh leh sil thupi tahtah gen kam khat nei' achi kia a, Mathiu 24:15 khun' Sumangthaipa kidah huoi,' chi in agen kia a, tualeh 2 Thessalonika 2: 3-4 khun 'Khelna mipa mangthang tapa, ama leh ama kitawisang leh Pasian biehinn a Pasian bang a tou dingpa' achi hi.

ACHIEMTENA : Kihilna 13:16 gen bang in tam chiemtena khu tahsa tung mun biih te ah bawl hiding hi. Tuakhu talpang or khutzietlam ahi ding ahi. 

Gamsa Chiemtena toh kisai mi khenkhat khun Rome gam a Pope lukhuh a kigiel ' VICARIVS FILII DEI ' chi khu Roman numbet tungtawn a alekhiet chieng un 

V=5     I=1     C=100     A=O     R=0     I=1     V=5     S=0.     TOTLal=112

F=0     I=1     L=50         I=1     I=1.     Total=53

D=500 E=0     I=1.     Total=501

Total= 666 chi in letkhie uhi. (Tam khu Gamsa numbat 666 kisim dan zong ahi)

Tualeh Islam (pangal ) sahkhuo zuite te (ISIS) talpang akhun Arabic laiteng a kigiel puon khat gah ua, tuami khu Greek laiteng a lekheit ahi kia chieng in 666 hikia in kigen hi. Tuaban ah Arabic ham a kigiel ALLAH zong khu 666 chi in lekhiet in umkia hi.

Tambang a mukhiet hinanleh amaute khu Anti-Christ ahi uh china vang ahi sih ua, nanleh tambang Gamsa Chiemtena 666 khu Rapture a pangkhalou ten Tribulation hun chieng in atalpang uh ahisihleh akhut zietlam uah abawl uh ngai ta ding ahi.

Bar Code khu Anerica ten 1970's laivel in pankhie uhi. Tam Code khu van zousie ah bet uhi. Tam Code akhun lines a um a, tuanah lines saudeu 3 a um tuom a, lines saudeu 3 ten lines 2 nei chiet kia ua, tua lines 2 chiet khu igawm leh 3+3=6 suoh hi. Lines saudeu teng abawm a gawm in 666 hing pha hi.

Tuachin 1980's lai in van kileina Bar Code theichetna dingin Scanner bawlkhiet in um kia hi. Tam scanner khu Hex Scanner akichi a, ning 6 anei ahi. Tulai inzong italpang uh ahisihleh ikhutzietlam uah scanning hing kibawl pan ta hi. 

Rapture zou chiengin Anti-Christ khun mihingte kungah 666 neichiet dingin phut ta ding hi. Ngaidan tuomtuom umnanleh tam chiemtena khu RFID CHIP kithun ding in gintat huoi hi. 

Tam khu Radio Frequency Identification Chip ahi. Tulai leitung azong CHIP tungtawn in vaihawmna peitou zel ta hi. CHIP khu mihing tahsa tunga thunlut thei a bawl ahizieh in Human Implantable RFID CHIP jong kichi hi. A letdan pen Anntang size chie phagiep in kigen hi. 

Tam CHIP sung akhun Copper Wire akithun lut a, ama leh ama ki charging thei dinga bawl ahi. Tuaziehin mihing tahsa kipieh (active) munna mun talpang or khutzietlam a kithunlut dinga gintat ahi. 

Khovel gam tuom tuom te akhu tahsa tunga CHIP kaplut pat injong um ta hi. CHIP neiloute khu company te ah sepna munawnlou uhi. Tulai a Vaccination Certificate or Passport neiloute suhzin touzin etc facility umlou ding kigen toh kibang tou zel ta hi. 

Hun hing pei zel in Bar Code thakhel ding in QR kichi Quick Response kichi in hengkhie uhi. Tam khu Phone tungtawn a zah ahia, alim piendan khu MILIM/GAMSA toh kibang in bawl uhi. 

Bangteng hitaleh Setan number pen Tattoo a hingki bawl ding zong ahithei a, CHIP hingki kaplut ding zong hithei hi. Tami ding ahi chi pen gen hamsa hi. Ahin bang pen kithun ding or kibawl ding hilehzong mihing tahsa tungah buoina huoisetah (side effect) tung ding hi. 

Kihilna 16:1-2 khun " Gamsa Chiemtena neite leh alim be mite tungah himasie nasetah leh kidah huoitah ahing tung ta hi ," achi ahi. 

Tulai in natna tuom tuom toh kisai a damdawi or injection te zieh a side effect umthei te khu zendam thei ki etkol thei nalai ahi a, nanleh 666 neitute tunga himasie umding khu adamdawi ding mawng mawng umlou ding ahi.

Tambang dinmun gimneitah umding ahizieh in Rapture a pangkhalou ding or piengtha lou a shina tuoh kha ding sil chizat umtah ahi, aziehpen Tribulation a um dinga tuazou chiengin gawtmun-meidiil a gawtna huoisetah thuohna umnalai ding ahi.

Rapture a pangkhalou damnalai te a dinga last chance umsun khu LUTANG TAN NGAI DING ahi ta ahi. 666 lanuomlou zousie te khun a lutang uh atan uh ngai ta ding ahi.

GAMSA: Rapture zouchieng in leitung pen One World Government hita ding ahizieh in tuami kivaipuohna ding khu UNO hiding in mi khenkhat ten gintatna nei uhi. Tualeh Anti-Christ khu mihing khat hing hi ding ahizieh in UNO President hing hiding a zong gintat ahi. 

Bible in 666 lanuom loute kigawtna ding khu lutang tansah ding chi ahi khel khel zieh in tambang a gawtna bawlzel te khu ISLAM te ahizieh un Anti-Christ zong ISLAM sahkhuo zuitu mi khat hing hingei va chia gintat ahi. 

Tambang teng khu atahtah a hing tung ngei ding ahizieh in Rapture a pankhahlou ding pen mi vangse tawpkhoh china asuoh ta ding hi. Hepina Hun bei ding kuon mama ahitah zieh in i Hagau dinmun siemtup sa'n koi chiet va ui unau. Mangpa'n hing guolzawl hen🙏