A HENTANG DING MAW, AHILOULEH A SUAHTA SAH DING?
Nisim Manna
Bulphuh: Tamveipi sia khainieng bangin ana kaan ngaita ua, hinanleh siakhainiengte abottan a, kolte bang asutan a, mi koiman athunun zou sih uhi. Mak 5:4.
Tam dawibua paaipa khu mite a ding in zauhuai ahi manin, mipite'n abitna ding un siakhainiang toh kaan in ana kolbul zel uhi. Tamma bangin eima bitna ding leh, nopsahna ding ahinapou leh midangte in hahsatna thuah nan uleh poisavetlou a zong umkhathei tham ahi. Hinanleh Jesu gamtatdan lamdang mama khat ahi leh: dawiveipa mite'n zau in hua uhi, hinanleh Jesu'n it hi. Tuaziahin Jesu'n hentang leh kolbul dingin thu pezawlou in, a koltaanna zousia suutsah zaw in damsiangsah hi.
Mipite'n amaute bitna ding athupipen a akoi ziah un, dawiveipa henkolbul in um hi. Hinanleh Jesu'n dawiveipa tung ah a lungsiatna asuhlat ziahin dawiveipa/dawibuaipa in henkol apan suahtatna leh damsiangna nga hi.
Nangma nopsatna ding leh bitna ding chouh na ngaituah ziah a midangte henchip/kolbul tu na hi kha ei? Ahisihleh Jesu bang a midangte tung a damna leh suahtatna tuntu na hi zaw ei? Oleh midangte zalentah a, a umlai ua nang pen na hinkhua henkolbul a umkha ahiei? Tambang dotna leh hahsatna tengteng dawnna zousia Jesu ah a um hi chi manghil sih vai.
Ngai in, midangte in na mihoih chiangin, na hauhsat chiangin a hing it ding ua, hinanleh Jesu'n vang bangchihlaipou in ahing it hi. Tuaziahin sildang, midang sangin, hunteng a hing it zingzing Jesu Khrist siang zuan zaw in. Tualeh nang zong Jesu'n eite ang it bangin nang zong na it theihna dingin ki-lan khia in.
Ki-latkhiatna: Mangpa aw, kei nang it bang a ke'n zong midangte ka itzou na dingin leh a henkolbul uh ka suutsahzou na dingin Jesu Khrist min in kang ki-lan hi. Amen!
No comments