KIGENSIATNA THU I ZAAHNOPLOU PEN HISAH NI

KIGENSIATNA THU I ZAAHNOPLOU PEN HISAH NI
Nisim Manna

Bulphuh: Koipou thuginalou gen a vahkawi mi'n thuguh a iimtheisih a, tuaziahin [tuabang] mi kamtam toh kigop sin. Thupilte 20:19. 

Gensiatna i chi chiangin, ahoilam hilou in aselam a midangte hinaloukhat ahi bang a tangkoupina ahisihleh ahina bang chet uh tangkoupina ahi mai hi. Hinanleh tam pen a selam a tangkoupina ahiziahin tambang thute a i zau/tel (involve) ding hilou in, tambang thu genhatmite iki pawlpilouh ding uh chi'n i Laisiangthou in ang hil hi. 

Aziahpen, tambang thute a va zau/tel a, agen teng uh ina ngaikhiat a enzong tuama bang a i genson tah chiang in gutate vanzuah ana leisah zel toh iki bang giap ding uhi (i.e. mi zuouthei mi in tambang thu a ngaikhe nuam leng uhi achi bang in eizong migilou, miginaloute toh i kibang giap ding uhi) - Thupil 17:4. Tamte ziahin thusia genmite kung ah "gennon da in ichi ei, ahisihleh na gen utpen tangtah in gen in" ichi ngam uh angai hi. 

Ngaidan dang khat ah, thusia izaahte pen genson da lei abei ahi mai hi. Hinanleh thusia pen izaah mun leh genson sih lei zong ilungsim a sesah a tua ziahin thu iimthei mi khu thupina leh letna chikhat ahi. Bangteng hileh thusia zaah gige a gendohlou sang in zalou a umthei mi khu atung azangkhai zaw hi. Hinanleh thusia zalou a umtheina gam/leitang ahilou ziahin zana pi a gensonlou a amatan a gensiatna beisah mi (thu iim zou mi) khu igam, mimal, innsung, hattuam leh koipou in ipoimaw uh ahi hi. 

Gensiatna bang ding a deihuailou ahiei ichi leh, gensiatna izaah mun tah chiangin i lungsim sesah a, kimudaahna piangsah a (Thupil 16:28), pawl kikhenna zong piang sah hi (Jude 19). Hinanleh, singkhua umlouna a mei amit bangin, gensiatna umlouna mun ah zong kihauna/kilangbawlna abei hi (Thupilte 26:20). Tamteziahin tuni mama in gensiatna zanuamlou a, gensiatna zaahna apat kiveng a, kam apat zong gensiatna potsahlou a umthei ding in iMangpa ah ki-lankhia ni. 

Ki-latkhiatna: Mangpa aw, ka kam apat mi gensiatna thute potsahlou a, ki gensiatna thute zong zanuamlou a ka umtheina ding in leh, a gense mite toh zong ki pawlkhawmlou a ka umtheina dingin Jesu Khrist min in kang ki-lankhia hi. Amen!