NA THEISIAMLOU HUN AH ZONG PASIAN THU MANG VEVE IN

NA THEISIAMLOU HUN AH ZONG PASIAN THU MANG VEVE IN
Nisim Manna

Bulphuh: Ginlelna ziahin Pasian thuchiem tahsanglouin a um sih a, ginna ah ahaat a, Pasian apahtawi hi. Romans 4:20.

Tam atung Paul laigelte lah a i changteel in agennop pen ahi leh Abraham in aginna zaal in Pasian thuchiam a mu dan agen hi. Mihingte hinkhua i et chiangin ginna leh kinepna neilou hitalei i nungta zou sih ding uhi. Khat veivei i hinkhua a i siltuahte itheisiam zawlou tampi um hi. Hinanleh, theisiam zawlou siltuah i hinkhua ah tuahkha nanlei zong Pasian thu mang veve lei ki bawlkhial hetlou ding hi. Aziahpen Pasian thumanna ziahin i kineppha hetlouh thupate in hing nungzui zel leng uhi.

I theichet leh i muchet te tung chouh a Pasian thu mang ta lei, muna toh kalsuan (walk by sight) ki suah ding a, hinanleh i theisiam zawlou hun ah zong Pasian muangin kalsuanta lei ginna a kalsuan (walk by faith) ihi pan ding hi. Tam tungtawn a igennop khat ahi leh imuchetpha chiang tan a Pasian thu mang hita lei mihing sepzaw chiang tan a nasem isuah ding a, hinanleh itheisiamlou hun ah zong Pasian thu mang ta lei, mihing septheitan chiang kheel a Pasian silbawltheina toh na sem leh kalsuan i suah ding uhi.

Tua ahimanin, i hinkhua a i siltuahte uh, itheisiamlou hun ah zong Pasian muanna toh kalsuan tawntung lei Pasian thupina leh aloupina te imu ding hi, tualou in Pasian sil lamdang bawlte leh athupina imuphabaan sih ding uhi. Tuni'n i hinkhua uh leitung a bei ding ahisih a, leitung pulam, vangam (Pasian umna) tan dong, ki pai nalai ding ahiziahin silbangkim ah Pasian a kingahna lou in bangtan itung zou sih ding uhi: i tunna ding mun ulah mihing silbawltheina kheel lam ahi ngaal a. 

Tuaziahin, tuni'n na muna leh na theina tanchiang toh kalsuan ding maw ahisihleh Pasian kamchiamte muanngamna toh kalsuan ding? Nang deiteelna ahi mai hi. Tuaziahin, na theina tung a na kingah lai sia sau na tung sih ding a, na sau tun tawp in zong bang tan ahi sih ding hi (or in other view - leitung na kheel ngeingei sih ding hi). Hinanleh i tunna ding mun khu leitung pulam - Pasian tenna mun ahizaw ngaal a, bang chi'n i tung ta diai? Khuziahin, itheisiamlou sil ituah hun ah zong Pasian thu gingta a muang veve ding in kilankhia in.

Ki-latkhiatna: Mangpa aw, ka hinkhua a silpiang zousia ka theisiamlou hun ah zong na thu tungtawn a nangma thuchiamte muan ngamna tawh lungmuang a kalsuan thei ding in Jesu Khrsit min in kang ki-lankhia hi. Amen!.