PASIAN TAWH ZAWHKHAWMTE A KITHEINA
Nisim Manna
Bulphuh: Tuachimabangin sing hoi pouma aga ahoi a, hinanleh sing sie in ga hoilou a suang hi. Matthew 7:17.
Pasian tawh zawhkhawm mite a kitheina tuambiih tamte lah a khat ahileh: a hinkhua uah gaah hoi tah a suang uhi. Mi koipou a mawhna kisia-a ginna tawh hepina zaal a tatana/hutdamna ngate in Hagau Siangthou gaahte (itna, lungdamna, lungnopna, lungduaina, migitna, hoihna, citahna, dihna leh pumpi ki thununzawhna) a nei ngeingei ding uhi (Gal.5:22&23). Tuachi'n na hoi sep utna lungsim zong anei ding uhi.
Thamlou in Pasian thu zong a theibeh nuam semsem ding ua, Pasian tawh ki pawlkhawm/khawlkhawm zong nuam asa semsem ding uhi. Tuabang ahiziahin a damsung un Pasian tawh kipawl leh khawlkhawm nuam asa ding ua, Pasian deidan a gamtat ding lunggul in, mite sawlhaat hilou in ama uh thanopna toh Pasian deidan bawl ding in a nungta ding uhi.
Tuni'n na hinsung in koi tawh hunzatkhawm nuam na sa ei? Bang pentah ziah ahiai nop nasatna? Tualeh na hinkhua ah bang muthei ding a piangdoh a? Ngai in, unau leitung ah Pasian tawh khawlkhawm/hunzatkhawm nop nasatlou leh vangam na tung chiangin nop sa tuan ding in gintat huailou hi.
Pasian a ka um hi chi zousia in Pasian gamtat bangin a gamta ding uhi (1 Jn.2:6). Tuabang a gamta mite leh Pasian tawh khawlkhawm zing mite'n gaah hoi a suang ding uhi. Tuaziahin, tuni in Pasian tawh khawlkhawm zing a, ama gamtat bang a gamta a, gaah hoi tahtah leh etlawm tahtah suangkhethei ding in pan lathah vai tuni mama in. Ei hatna tawh zaw ding a umlou ziahin, Pasian hatna, hoina, chitna zaal zou ding in iMangpa ma suan zing vai.
𝐊𝐢-𝐚𝐩𝐧𝐚: Mangpa 𝐨𝐩𝐚 𝐚𝐰, 𝐡𝐢𝐡 𝐥𝐞𝐢𝐭𝐮𝐧𝐠 𝐚𝐡 𝐧𝐚𝐧𝐠𝐦𝐚𝐡 𝐭𝐚𝐰𝐡 𝐤𝐢𝐤𝐡𝐨𝐥𝐡 𝐦𝐚𝐡 𝐧𝐮𝐚𝐦 𝐤𝐚 𝐬𝐚𝐤 𝐩𝐞𝐧 𝐚 𝐡𝐢𝐡 𝐭𝐚𝐰𝐧𝐭𝐮𝐧𝐠 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!
Ki-latkhiatna:Mangpa aw, tam leitung ah nangma tawh khawlkhawm ka hinna ding in anuam pen ahi tawntung theina ding in Jesu min in kang ki lan hi. Amen!
No comments