ITNA I SUHLATNA DING HUN HOI PEN TUHUN AHI

ITNA I SUHLATNA DING HUN HOI PEN TUHUN AHI
Nisim Manna

Bulphuh: Na bawlthei ahi nahpou leh, a tang dinga kilawmte silhoi it sin. Na nei nah pouleh, na innveng kungah "Pei phot inlen, zing chiangin hing hawkia in hing na pe vang," chi'n nuasawl kia sin. Thupilte 3:27&28

Bangziah a itna i suhlatna ding hunhoi pen tuhun ahi chi i diai? i china ziah ahi leh hunhoi bangtan ki mu toutou nalai ding chi itheilou ziah uh ahi. I kiim i paam a thuthang hoilou zaah ding tanlou in ki neiden hi. Lametlou pi in tambang thuthang hoilou eitung ah zong tungthei tham hi, aziahpen mihingte tuahsiatna leh shinate tung a thuneitu eima kihilou ahiziahin. Tamziah mama in zingchiang ka dam teitei ding zong ichi thei sih uhi. Tuaziahin midangte tung a iitna ilatkhiatsah ut leh tuhun khu ahunpet leh hunhoi pen ahi chi manghil sih vai. I Laisiangthou bulphu in ang hil-ut pentah khu tam ahi.

Mihingte hinkhua ah itna pen a thupi pen ahiziahin i Laisiangthou in zong alianpen IITNA ana chi hi (1Kor.13:13). Hinanleh na hinkhua ah alianpen bang hi in na ngaituah ei? sum? thuneina? hausatna? pilna? bang ahiai? na innkuanpihte, na mipihte sangin nasep-nabawlte na thupi ngaisut kazaw ama? Midangte a ding a iitna langkhesah zou mihing hinkhua khu hinkhua-manpha ahi a, tualeh tambang iitna latkhiatsahna ding hunhoi pen khu tuhun ahi. Tuaziahin hundang-nidang ngaah seselou in tuni, i hunhoi neipet a midangte tung a itna langkhesah thei dingin Mangpa Pasian ah ki-laankhe vai. 

Ki-latkhiatna: Mangpa aw, hundang-nidang ngaah seselou a tuni, hunpha ka neilaipet a midangte tung a iitna langkhesah thei ngeingei dingin napanpina ngai in Jesu Khrist min in kang ki-lan hi. Amen!