I Leader Dei dan in I hina Langsah hi

I Leader Dei dan in I hina Langsah hi

Pastor Dr Dongza Thawng

Devotional No 64( vol 3)

Fellowship of Thirsty Souls and Hungry Hearts

Simtute Shalom!

Tavang jingmawng nisa em silsel Shillong pat in Chibai!

Tulai message igel louna asawt simta a..Saturday a kagel leh ka jaw ding kuan in ana mangbei hi. Thase gawp in ka khawlden kha hi.

Tuni Topic: “I Leader Dei dan in I hina Langsah hi”

Mathew 27:17  “Barabbas or Jesus”

Tutung inlam ka va jinna neu khat hing gen vang. Ka seminar uh nop sengseng ka ngaitua mai leh zong ka kipah jing hi. Ka seminar uh nopsa mama a ka um lai in Rev Hauzalian Manlun toh Imphal ah ka kimangkhawm kia uhi. Hibang hagaulam a veteran khat toh kithua khu Jesu toh kithua mama kabang hi. Hibang a Pasian mi khat toh hunjat a manphat dan ka genthei sih hi. 

Tualeh Lamka leh Imphal ah ka seminar sung ua mun gamlapi apat hing del vengveng a Hagau dangtaah ten mite hinna challenge uhi. Keima ading in jong Inspiration thupi tah hing pia uhi. Pasian hibang gingtu extra mile paite thupha tampi piata hen! Gamlapi apat ang del mai uh hilou itna silpiah thupi tah toh hing kuan nalai uhi...

Hibanga Pasian hoina kamteng a gentheilou zar ka jou lai in Pasian in hunsa nailou hi.

Ajiehpen Inn (Home) kichi khat um a. Ama’n Van INN Nuam I kumtawn inn ding uh lim ding in hih leitung ah INN (home) leh INKUAN (family) kichi khat hing pia hi.

HOME kichi khat um a,  tua mun ah Leitung a i-it pen leh ingaipen, ang it pen leh ang ngai pen i ji kichi in hing na ngah jing hi. Tualeh i-it ngut ngut i tate ei hing na ngah jing um hi. A Manggam nasepna a misiangthoute toh hunnop tah i jatlai in Pasian in tuate sang a nopjaw leh lungkimhuai jaw Inkuan/family kichi hing na lawmdawn leh ngah dingin hing na koisah nalai hi.

Tuachi'n inn ka tung a, ni 3 jou in ka ki teenna uh 11th  wedding anniversary ahi.  Ka nu pa ua ka bawl ngailou uh, Ka tate nusia in park khat ah sunni tum in hun ka va mang uhi. 

A nopdan pen ka kiteen chiil lai uh ka bang ua ka ki ngaina uh affection hing thou kia, hing hingdoh kia, hing pahdoh kia bang hi.  Hibang a atuam a, i nupa a va pot khia khu - Nu pa ki teenna, ki itna  nuture- vah khangsahna ding a bawl jel ding thilhoi mama ahi dan ka mu khia uhi.

Abang abang hitaleh i thupi ah lut ta vai:

French Historian khat in : “Every nation gets the leadership it deserves.” Khovel a nam khat poupou in ama uh toh kituah leader mu uhi, Or a kibatpi leader nei uhi chi ahi. AT Ironside in “Pasian in namte a got ut chiang leader hoilou pia a, tua leader hoilou tungtawn in gawt hi” chi ahi.

Tutung zong i maban ah MLA election ading in leader tampi kisa in Mang Taithul zong interview bawl in buai mama hi. Ahiin leader ching tahtah hing kilang mah leh Lamka mipiten ikibat pi uh leader ing nei toujel ding ua, ei toh ki milpi chet leader piah in i um jel ding uhi.

Ajieh pen sum a leithei mipite, maban a ding leh i gam ileitang sangin tomkhat eima mimal hamphatna ding dei maimai  mite ihi uhi.  Pasian in leader hoi tah, fel tah, i khangsawnte ading tanpha damna tuntu ding leader hing pia nanleh tuate sang a i nam, i gam juah mangthei leaderte ma i telching jel ding hi. Ajiehpen tuate khu ei ading a phabep seu te ahi uhi. I kituahpi chet leader i mujel ding uhi. 

Pasian in hing piapia nanleh eiten a pomthei nailou mipite ihi uhi.

Tuania ihina uh ka gen khu agen khial himai leng ut mama ing e lawmte! A hiin ka gen khu adih ahinalai leh dahuai mama ding hi.

 

Tu in hattuam lam ah en talei Pasian in i nam ah pastor hoi, pastor hagau mi tahtah hing pia taleh zong a kem theilou, ajatna ding theilou, jat somlou, ning khinkhin, atop a del a del mang hattuam mipite ihi mai thei uhi.

Tuabang ihileh i hattuam te ading a  avangsiet huai mama ahi ding hi. Ajiehpen Pasian umpi hagau mi, lamkai khat i nual chiang Jesu nual kisuah a, tua chiin Pasian in zong hing nusia in, Ama'n a umpi pa asuahpa ma jui in eite hing nusia thei hi.

Tuajieh in  hattuam pawlpi lam a ileader te zong i et vengveng chiang khenkhatte a chijathuai pipi imu hi. Singnuaimi leader te toh kijom leh ki houthei mama director/ES, business bawlthei leader pou, pastor khenkhat ju guhdawn pou, khenkhat politician pastor pou inei uhi. Khenkhat hotel a sunni tum a chiah thei, mi vantangte sang a jong standard ngiam jaw, a khen politician te private  pastor hileh kilom, akhen hattuam sukehthei changchang leh a umumna  hattuam buaisah leh nasah pastor vel piah in i um uhi. Tuate alat sah khu ei amipite toh ki tuah belampu ahi mai hi.

Ajiehpen Pasian in ahoite hing pe nanleh eiten i nual jieh un ei toh kibang pastor lamdang pipi Pasian in hing pia hi. “For I am going to raise up a shepherd over the land who will not care for the lost, or seek the young, or heal the injured, or feed the healthy, but will eat the meat of the choice sheep, tearing off their hooves” Zechariah 11:16. Belampu hoilou hing pia ding chi hi tajen hi.

Pasian mipite'n thu amanglou seng chiangin ama utoh kituah lamkai pia hi, Tua leader hoiloute'n ama uh neh chitah a nesia in mangthai sah hi. Ka Prof. Dr AT Ironside in “Pasian in namte  a got ut chiang leader hoilou pia in, tua leader hoilou tungtawn in gawt hi” chi ahi.

Tuin nam toh kisai hi in hattuam toh kisai hitaleh leader hoi mama theina pi a telching sawmlou mipite ihileh Pasian gotna tangtah mongmong namte ihi ta uhi. 

Juda miten Mangpa Jesu  hoina teng theinapi pi in Tualthat suammang Barabbas teel teitei uhi. Ahoi chi thei sasa in ahoilou jaw teel ding in anampi in kuthu tuah uhi. Tuami in amaban uh a mial ding dan sulang a, amanthatna ding uh ama uh leh ama un kibawl uhi. Amanthat ding uh gaugau a mi hoi pa sang a mihoilou tel ding in ha pang a pangin ki thutuah uhi.

Ki thutuahna lahlah a hoiloupen khu mihoilou khat gupna a ki thutuahna ahi.

Gam leh Lei mai hilou in hattuam pawlpi a director leh E/S te itel na ah ihina kilang ta lua hi.  A hoilou thei sasa a i tunding teitei leh tua mihoilou teel ding mipite khu mihoilou mamate ihi china ahi. Pastor hoilou khat na support a na gup vevaw leh  nang zong mi hoilou na hi. Leader hoilou thei sasa a na gup vevaw leh nang zong mihoilou khat na hi chi etsahna ahi mai hi.

 Ahoilou thei sasa a na bepa or na ham kibat pi or na mimal hamkhat nakhat jieh a na gup teitei leh nang zong mi hoilou mama khat na hi chi suhlang na hi. Mihoi chi thei sasa a na panpilou a, na guplou a na votelou leh nang pen mi hoilou khat na hi chi etsahna ahimai hi.

Mihoi, midih, thummi, hagau mi kichi ten mihoi, midih, hagau mi, thummi te ma dei ua, gum ua, ngai uhi. 

 Mihing in ikibatpi lamkai ki dei hi, I kibatpi leader in hing hiip hi. Tuakhu Law of attraction kichi hi. 

1500 lai peh a kipan English thupil khat Birds of feathers flock together kichi khu dih mama hi.  Ei paunah sial kaang leh sial kang ki ngai kichi hi. 

I leader jui, i pastor ngaisang, i upa dei dan in hagau lam a idinmun leh ihina sulang pen hi

Upa ding a hoi mama, chit mama, fel mama khat na guplou a chitvawtlou khat gum teitei (na bepa ahijieha) na hileh nang pen mi hoilou mama khat na hi china ahi. 

Ahoi deitheilou a, ahoilou lam a pang teitei mi na hileh Jesu hun lai in dam leh chin nang zong Jesu sang a Barabbas tel lah a pang ding na hi. 

I pastor deidan, teldan, i upa deitan, i hattuam director ding deidan, teldante ah ihina kilang pen hi. Ajiehpen iki batpi leader kidei hi. 

I gen ut chuh nam hileh hattuam hileh migilou namte ihi jieh un nam lam ah zong mihoite ki teldoh theilou a, hagau lam leh hattuam lam ah zong ahoite ki nualkhin in, ki tuambawl in, kiningbawl in, iki batpite ma ki jui in ki bawm valui hi. Lamdanglou hi. 

Hibang kal a mihoi khat leh ni ang dindoh leh kipapilou leh pawmsawmlou te ihi jing uhi. Mihoi kipapi theilou mihing ihileh mihoilou idei jaw china ahia. Tua in ei mihoilou ihi dan hing sulang hi.

Na umna team leh na lawmpawl leh na kipiahna *group in na hina sulang hi. Na pastor dei chi leh na leader dei mi in na hagau dinmun sulang hi. Na nam leader jui in na hina sulang hi. Na upa dei leh deilou ah mihoi leh mihoilou na sulang hi. 

Na leader kipapi leh kipapilou ah na lungsim geel sulang hi.

Tunia igen som pen khu: Pasian in mipi hoiloute a gawt ut chiangin leader hoilou pia hi. Tua leader hoilou khu a kituahpi chet ding a Pasianin a piah ahi. Ajiehpen tua leader hoilou dei thei mipi hoilou ahi uh taahlatna hoipen ahi.

Himi principle khu Pastor idei dan chi leh hattuam upa telna ah zong kilang hi.

Mangpan theisiamna hing pia ta uhen!

Topa Thupha!