Mangpa na nutsia hileh jong hing ve kia in aw

Mangpa na nutsia hileh jong hing ve kia in aw

Pastor Dr. Dongza Thawng

Devotional # 63 ( vol 3)

Fellowship of Thirsty Souls and Hungry Hearts

Thirsty souls member te jingpha Pasian in hing umpi ta hen!

Imphal (ipu-ipa gen dan: Phaipi) apat in chibai leh Shalom!

Janni tah in Lamka vangkhua Zokhopi nusia in Phaipi tung ing e.

Ka tunna uh Telecom a upa te Qtrs nop sengseng in Pasian taang siangthou a um ka bang uhi. 

Ka jinpipa koi dang hilou in ka pianthah apat kana jui leh etton Rev Hauzalian M ahia. Pasian mi siangthou khat toh hunjat khu nop in manpha seng hi. 

Lamka a kang paima a ka pastor pi te toh football  kava ki mawl in ka ki ngainat na uh thupi tah in hing kijop sah kia hi. Ka seppi ka pastor pi te angai in ka ngai a, ama uh te ding in toplou in kipah thu ka gen hi.

Tualeh tutung ka seminar ua Pasian Hagau in ang pawl dan ka ngaitua chiang ka mit-ha in ka seminar uh thaam jing hi. Khatvei ni  biahinn ka va mu kia in ka lunghel seng a ka kathasuah hi.

"Lamka aw vut vai khu, buannoi in, tui paan kai in, a thaang a dual in um nanleh chin hing mil thei sing e!"

"Na vontawite'n hing nesia na zu teng top kangnan leh hing top san thei sing e!

Ka hing nutsia ka hing manghil som vang in hithei mama sa sing e!"

"Ajieh pen na sung ah ka laijomte teeng a, na sung ah ka it kangai te leng hi.

Ka pianna, ka khanletna, ka kipatna gam na hi."

"Gamvang la apat in na min theibang hing loulou ing."

" Sengual ngai lom leh gual te bualna vangkhua bang chi'n ka hing milthei diai"

"Christ grape huan a ka seppi te umna mun, misiang ka thumpi  Zion tanu toh na min ka law namun" 

" ka it ka tunnu teenna mun" 

Aw Lamka na nitna, na buahna, na liamna te toh hing nual in, hing nuangat som nanleng ka hi thei sih hi.

"Aw Mangpa na nutsia sate jong nua vil kia Pasian na hi. Na taisan gam ah na kilia kia jel chi na Laisiangthou apat in ka mu hi.

 Kou te singnuai gam mual nang jonkhiahte nang vil kia uh ka poimaw uhi." 

"Aw Mang Nunem na taisan te khu ama un ang taisan masat ua, mun ang pialou chiang un da ngoingoi sa in na nutsia jel ahi chi ka thei hi. Hitama nanleh Na nutsia sa gam leh innkuan leh hattuamte'n na umlou a hamsat dan ang thei ua ang hat kia chiang ua ja manlou a ki lia kia, ama uh sang a ki lekia ut jaw, ang hat ding uh ngah Hundampa na hi."

Tuni'n na nutsia sa Lamka ka Zogam uh nang vil kia, nang taw kia ngai ngutngut ung e."

Unaute tutung inn kuan leh hattuamte  kave na pou a ka thum chiang himi thumna kammal hung ki lou jel hi: " Mangpa himi innsung, himi hattuam, himi gingtu na nutsia sa ahileh zong hing ve kia in," chiin Pasian in mi nusia masa ngei lou in. Ama hina( nature)  hilou hi. Mihing in Pasian anutsia jou chiang Pasian in mun neilou kisa in nusia pan hi. 

Ahiin a nutsia sa gingtu mimal hiin, innkuan hiin ,  hattuam leh nam hileh Pasian ngai a ang hat kia, ang chial kia chiang ua kile kia ding a mansa I Pasian ahi.

I  Bible pumpi khu Pasian in a mihingte ave a, aki tuah pi. Khujou a Mihing ten Pasian anutsia uh tua jou a Pasian in jong anutsia. Khuchia mihing in Pasian umlou hamsa sa, Pasian ngai kia a ang chial kia. Khuchia Pasian in hing vil kia chi  Himi kikal avelvel in Bible ah imu hi.

Abraham apat David, David apat lengte chanchin, leng te apat jol nei te, Jolnei te apat nungjui te. Nungjui te apat mimal gingtute hunkhua ah avialvial in imu hi. Tualeh Isreal nam tanchin pumpi ah  himi ki vialvial imu hi.

Tunia igen ut khu Pasian umpina in ahing nutsia, ahing taisan ta a ithei leh tunin i han kia, i chial kia pai thei hi. I gintat sang in ama ut leh mansa in um hi. Ei ngai leh ei ut sang in Aman ana ngahla jaw hi.

Nupa iki hau chiang ahoupi masa ding ki ngah hi. I tate toh i buai chiang i jawl ding ana ngah uhi.

Tunin Pasian umpi lou leh nutsia hinkhuo ining kitel thei a, a gim huai dan i thei a, i thomhau a, ama umlou lam i feel a, ama i miss thei leh kipah in lam in. Ama na nai ah um jou ta a, aman hing vil ta hi.

Adahuai pen khu aman ahing nutsia lam jong theilou a Samson bang a hing umpi hina va hattuam activities a abuai a buaite ahi. 

Biah inn kaikai, thumkhawmna pangpang  comittee pellou, khompi mangmang, choir a pang, lasa sa, even pulpit a sermon bolbol, in sung maitam bolbol Ahivang a Pasian in hing umpi nonlou.

Ahing umpi nonlou lam theilou a paipai gingtu ki tam ding hi. Gari puncture kom a taitai in aman lah theilou, miten lah mu mama toh kibang ahi 

Aw anutsia sate jong vil ut kia Pasian ittna beitheilou Pasian inei man in Amin thupi ta hen!

Kei jong tutung ka ki jatjat lai in ka Pasian toh ka ki mang sah man a, ka ki gamlat man hi. Ahiin tujing kal in upa nun Pasian nasemte hoi bawl sengseng in ahing umsahna uh room thawveng leh nop tah ah Pasian ngai ngutngut  in ka sui kia hagau ki dia nouna nop tah ka tang kia hi.

Mang Hagau nunnem in nang hinkhua, nang inn sung, nang hattuam leh i Lamka zong anutsia sa hitanan leh hing ve kia ta hen!!

Shalom!

Topa Thupha!

Pastor DZT

Ps. Tuni Tribal Colony ZCBC ah 11 AM ah hun jang ding. Hing thumpi vo. Tualeh sunni tum a Rev Hauzalian Manlun lamkaina nua a hagau lam a seminar leh  fellowship nop thei bang a   nei sawm. A ut ut mun nai a um te welcome!