Gingtu Mizia #02 - Satan hiachitute paikhiat kisam

Ninih-nithum vel paisa ah Gingtu Mizia chi tungtang introduction tobang in ina kikum zouta ua, tuanah Gingtute in Silsiamtha ihitaah ziah un eima apat hoilounate koimang in silhoi toh iki thuampan ta ding uhi, chi ina sutkhawmta uhi.

Tuaziahin hun hing tung zel dingte ah, i kithuamna ding silhoi ichite bang ahia, bang chi'n i kithuam diai chite entou zel dingin ki singsa vai in, tuni'n ahoilou silte paimang vai ichite achiang zaw in point khat-le-ni vel kikup sawm vai.

Gingtu hinadawl ah, eima apat ahoilou silte paikhiat/koimang ding ahi i chite pen bangdang ahi sih a, Satan in Adam-le-Eve hunlai apat mihingte tung ah ang tukhumsate khuh ahi. Tam hoilounate khu ahuntah chiang in ang mengdoh zelzel ding hi. Tuaziahin apichin tandong eima mihin ah i khanlet sah chiangin ga angsuang a, tua agate khu bangdang hilou in siatna-khaatna, thangsiatna, hazaatna, mani aangmasialna, huaihamna leh a dangdangte ahi. Tambang siatna gaate ziahin i Mangpa meel ataangzou tasih a, i maizum sah leng uhi. Thamlou-in eima ngelzong tam siatna gaate suah-le-sal a pang in, khenkhatte suata zoulou in kumtawn meidiil a, a kipai hunding ngaah in ana mualliam zouta uhi. Tuaziahin unaute aw, Satan haichitute pichingsah manlou in [adawnlai/angeehlai in] nuailum paipai vai. Aziahpen hing piching man tale uh anuailup na dingin gaalpi saat a ngai vawt ding hi.

Mi khenkhatte pen khangdawng thahatlai mama ahi ziahun sithei ahilam uh kiphawhphalou zong tampi a um uhi. Tambangte khu Satan in a nungzui dingin amanden ut a, tuaziahin leitung mipa/minu pen atahsa utnate uleh a khovel pilnate uh tungtawn in, Pasian toh akizop tahtah ding uh adaal hi. Bang-chi-dan in adiai?

Satan mi heemdan chituamtuamte i ngaisut leh lamdang peetmah hi. Satan panlaahdante khu: langtang tah a mihoilou hidingin ang deisih a, mihoi bang a kilang ding lah Pasian a pianthahna tahtah neilou ding khu adeidan ahi. Pilna-siamna lam ah gualphala dingin ang umsah utsih a, gualphazou ding, midangte sang a tungtuang zaw ding, ahivang a Pasian toh kizopna dihtah neilou ding khu adei ahi. Tuabaanah i leitung pilna leh minhoinate khu thudih/thutah saatdaai na dingin Satan in vanzat in ang neiguat gige ahi chi manghil sih vai.

Satan in langtangtah a Pasian meelma hisangin Pasian mizat mama a kithei, biahna-phatna, hattuam lamkai lubawh muanhuai hi ding, ahivang a Pasian toh kizopna tahtah neilou, ama mimal ding bou leh ama lungdeina bang chouh a vaihawm hiding khu Satan deidan ahi. Tuabang mi i hattuam lamkaite lah ah, i nam sung lamkaite lah ah, organization tuamtuam lamkaite lah ah baan et talei mibangza tuabang mi a um diai? A bawn un chu hisamsih van tam mama ding hi.

Khenkhatte in Pasian deidan bang ahiai chi athudon sih ua (a ngaisah ut sih ua) zong athei ut sih uhi. Hinanleh khenkhatte pen in Pasian deidan bang ahiai chi theina pi in a zui ut sih ua, ama deina bang khu Pasian deina sangin a zuizawta ua tuachiin Zuu addict, Khamthei addict, huasan-thanghuaina addict, neehguuhna addict, huaihamna ziah a zuoutatna, tualtha khawsahlouna, engsiatna leh adangdang te addict ang hita uhi. Tambang addict hinkhua khat poupou khu anop mama hunlaitah a um a, hinanleh mitphetloukaal (tomnoukhat sung zou chiang) in anopnateng abei paita a, lungziin-lungkhamna in azui ngaal hi. Zuu kadawn a, banglouteng ka bawl vangin siatna talawm kabawllou leh bang a poina talom a um a, i chizelte pen dihlou mama ahi dan ngaituah tha vai. Aziahpen tambang a [kitaal tah a hinkhomanna/nopdan a hinna] in ang addict sah chiang in buaina hing kipan ding ahibou hi.

Tambang addict mite khu Satan thaang/suangkul a awh/taang ahita uhi. Khenkhat a suangkul taanna apat taidohthei nalai ding dinmun a umte khu a potdoh ut sih ua, a taidoh zounonlou ding dinmun a um hita chi ang kitheitah chiang un taidoh dingdan naahtah in ang sawmpan vaniang uhi. Mikhat bang a addict nung in kisia mama in khawl ang utta a, khawl ding a pan aha laah deudeu leh aduhna akuang deudeu a, hahsa sa sengseng in shi dingkuan laitatte banghial in a umta hi. Ngaivawi, Satan haichitute khat poupou a saltaang khate koima noptah a kinunglekia a um sih hi. Siatna kokhu a lutkha zousia, i thuuh lut zaza a sau lampi hahsatna toh, gimthuahna toh ing ding ahi chi manghil sih vai.

A lelamkhat ah genkia talei pawlkhatte pen pilna, siamna, minthanna, letna te aneitaahziah un iMangpa kingainiam dandan a kingainiam ding pen hamsa asata uhi. Tampen bangdang hilou in Satan haichitu, EGO khu amihin uah vaihawmtu ahitah ziah ahi. Tambang mite'n iMangpa Jesu Khrist khu ahinkhua uh mapuitu leh lamhiltu a apansahlou ziah uh ahi.

Atung a point ni igente hichiin genchiang vai. Jesu Khrist khu Mangpa a pomlou mimawlte ahisihleh vantang (average) pilna tanchiang nei mite pen atangpi in a un ahinkhua uh asusia a, theina sang tahtah neite pen a un ahinkhua uh a susia hi. Siatna toh kisai ah abulpat pen a manbei tobang ahi a hinanleh, kisiah a hing kinuahlehna or khial a um suahdenna pen amantam dan mihing theisiam gual ahinawn sih hi. Hinanleh hoinatoh kisai ah abulpatna pen mantam mama a, zawgual ahisih hi. hinanleh izawzou na ding un panpitu Hagau Siangthou piah in i um uhi. Tua Hagau siangthou iki puihuai sah ding leh thuman apoimaw hi, tuachiin thumanna toh ithuahzou leh atawpnalam pen aman kiam deudeu a, atawpna ah reward imu baan ah Hundamtu Jesu Khrist toh kumtawn in itengkhawm nalai ding uhi.

Tambang siatnate gaaldou bang a naahtah a dou seselou a noptah a i theina ding un Satan haichitute i mihin ah ang mengdoh chiilchiil chiang in [a apichin masang in] nuailum/sunlum paipai vai adiah in LUHLULNA - EGO chite paimang vai. Tualeh bawl vai, i lungkiat sih napou leh ahuntah chiang in aga i aat ding uhi.

Simtu zousia iMangpa'n ipoimaw dungzui in hing gualzawl chiatta hen.

haichi hoiloutahmai

Tam haichi hoiloutahmai ichite khu Satan mizia, Satan khaatna, Pasian deidan toh kikal bikbek lunggeel, ngaisutna, kisahtheina, huaihamna leh adangdang te ahi.
A chiangzaw sem a i et utleh anuai a te ana en vai - Ezekiel 28:14-18; Isaiah 14:12-17.

Nungzawt kia

Khelna apat kinungle kia na in Khelna a ilamzawt asau na zaza i nungzawt kia ding thamlou aman pen ale sawm, ale za a isang (fine) angai ding hi. Tua fine khu siatna a isaugei dan zil ahi ding a, aphatmaw leh shina tandong angai maithei hi.
- Khelna thaman khu shina ahi - Rom 6:23.

Luhlulna

Luhlulna kichi khu khantoulouna bulpi khat ahi. Aziahpen ahoi-ahoilou bang a hiai chi theinanlei zong koima thu lalou kei a eima lungphutphut a namtatna ahia, engtatna ahia, michilou dandan a tatna zong ahi.
eg. Khat in na silbawl dih deusih eih achikha leh thangtawm kisa a adihlou pen thei na giagua a bawl paupau.

EGO

EGO hi khan daaltu lubawh khat ahi. Aziahpen EGO khu kipilsahna, kibawltheisahna, keilou koi e kichina, midang bangma a simlouna leh adangdang ahi
eg. Kei koi ka hi chi nang theilou ama?.

sihoibawl sedalou in

Tuachi'n silhoi bawl chimtah sih va ui [khop gopta ing chisih vai, Aziahpen] ilungkiat sihna pouleh ahun tahin [aga] i aat ding uhi. - Galati 6:9.

Peel hiau

Siatna saltaanna apat pawtkhiatna di'n naahtah a sual (manpiah) angai a, hinanleh siatna ana bawlloute a di'n bangma manpiah angai sese sih hi. - Siatna pen apichin masang a inuailup/isutlup zel khu awlsam tah a ipelhiau na lampi hoitah ahi.