KHRISTIAN LEH POLITICS

THUAMPUI

I maban ah MLA Election hing um ding ahina ah, Hattuom Upa (Elder), LCC leh Hattuom Lamkaiten ithei ding ua hoi mama leh Khristian hina toh bang chi panla ding chi tupna in tam Article ka hing giel hi.

Politics kichi ka line ahisih a, nanleh Khristian ihileh Bible deidan bangtah a Politics bang chi sai ding chi tupna toh mawltah a laibu tuomtuom akipat kaikhawm a hing giel ding ka hizaw a, iphat tuompi theina dingin simtu zousie Mangpa Pasian in Ama (Pasian) deidan a Politics saithei tadin hing guolzawl chiet tahen, chi ka thumna ahi hi.

Politics kichi ahiding bang tah a akisai leh asietna aum sih a, nanleh mimal hamphatna ding, let leh lalna ding deina zieh a Khristian hina manghil zen a isaina un politics kichi isuhnia uh ahizaw hi. Khristian ihi uleh Politics sailou ding ka chi sih a, nanleh i Khristian hina manghil zen a isaina un hoina sangin sietna lienpi hing tun ahizaw hi. Tua ahileh Politics kichi koite sai ding e? Tuami thei khietna din laibu tuomtuom leh Seminar paper bangzat ahiei apat kaikhawm in tamna anuoi a te mawltah in isutkhawm ding hi, tuate ahileh:

POLITICS HILCHETNA

Politics kichi Grik thumal “Polis” apat kilakhie ahia, Mang haam in “The State” china ahi hi. Politics ichi chiengin “Vaihawmna dan” (the art of ruling) china ahi hi. Grik thumal a “polis” khu “Khopi a hinna” (the life of the city) ahi chia hilchen pawl zong aum hi. Ahina toh gen ding hitalei, “Politics kichi mihingte hoina ding, bitna ding leh khantouna nasepna zousie a genna” ahi hi. John Stott gendan in, “Zautah a gen in politics in gam khat hindan leh a sunga teng mite mopuohna akaw hi. Tuami ziehin politics in gam khat a tengte hinkhuo zousie ahuop kha hi. Politics ichipen Community khat a tengkhawm theina siemna ahi” (it is the art of living together in a community) achi hi. Aneuzaw deu a gending hilei, “Politics in asai ahileh gam khantouna dinga policies bawl ahi. Politics ichi khu society a kikhelna umna dinga thuneina lasawnna ahi” (it is about gaining power for social change) chi ahi kia hi.

i) Politics leh Sakhuo: Mipil masate thupil gennei mama khat “Work is worship” chia a um a Pasian silsiemte adieh a mihingte hoina ding a nasepna khu Pasian biehna leh nasep thupi pen khat ahi. Indiate Pa chia chiemte a um Pu Mahatma Gandhi in, “Gandhi adia sakhuona khu mi hinpite adia nahoi sepna ahi ziehin sakhuo nasepna (religious duties) dia politics alut ahi” akichi hi. Tunia igam sunga Politics saitute a political philosophy (concept) uh adih masia a politics saidan uh dih ngailou ding ahi uhi. Thupil khat in, “Na Hagau mit lou inzong sakhuo mit sawm in” akichi hi. I gam a Politiciante khu Khristian ngen ahi ua, nanleh a khristian hina uh manghil zen in agam tang uhi (imai election hun ah ana en ulechin chieng mai ding hi).

PASIAN LEH POLITICS

Pasian leh Politics kichi thumal khu thu lamdang khat ahi a, Bible gendan thei beilam na din mawltahin hichin isut ding hi. Tuate ahileh:

i) Politics alienzaw a etna: Pasian nasepte’n leitung, leinuoi leh huikhuo ahuom suo hi (Gen. 1: 1, Deut. 9: 16, Ps. 148: 5, Jn. 1: 1 & 3). Tomkim a gen din “Sil zousie Pasian bawl leh aneitu ahi” (Exo. 9: 16, 1Chro. 29: 11-12, Ps. 33: 6, Acts 17: 25, 28, Rom 11: 36). Tam Pasian nasepte leh asaitu din Pasian in mihingte mopuona apieh hi (Gen. 1: 26-28). Tam etkawlna ah Pasian in leitung pienchil akipat ana koi khawmsa system ahiman in tuamun a umte Pasian in aguot ahi chin Bible in agen2 hi (Rom 13: 1-3). Nanleh Pasian guot banga um theina din tulai politician ten mipi deitelna sangin Galvan tawite toh pangkhawm in tua mopuona alazel na un Pasian leh Bible deidan a Politics asai uhi, akichi ngam na diei mah chi khu ahi hi. Kei mimawl mudan leh ngaidan in, “Sum senglou leh Galvantawite toh pangkhawm lou a mipite deina toh tua mopuona tangte khu Pasian lemguot hidin ka ngai sun hi, nang zong na chi sih amah????” (I gam peidan enkawm a ka hing get ahi, koima mimal dem hilai zanglou kahi, aselam a nala leh kei gennuom dan toh kikal na hia, amoh ken ka posih ding hi).

ii) Politics aneuzaw a etna: Gam khat ahiei, biel khat sunga khantouna ding, lemna leh muonna a upna dinga nasepna ahi hi. Nang MLA, MDC lawchinna din na pienpi na sanggamte dougal a ki-en din phal sinlen, dougal-melma a ki-ente nang vang in nuikhawm, kihouthei hizaw din pan lasawm hi. Politics neuzaw a etdin, “Mangpa Jesu’n political party abawlkhe sih a, Ama hunlai a siltungte bangma a ngaisah nuom sih hi. Nanleh A nasep zousie khu political ahi”.

HATTUOM LEH POLITICS

Pasian silsiemte etkawlna leh nasepna khu Hattuom dinmun (a role) toh kisai a et ding ahi. Politics kichi Hattuom toh kisai ahimasa sih a, Sakhuona toh zong kisai ahimasa tuon sih hi. Tam gamsung vaisaina ah Moral value leh hoina dan (virtue ethics) zui ding aum a, tuami zui khate a vangpha ua, azui khaloute a gam miten avangsietpi uhi. Hattuom hina theichet dingte:

a) Hattuom toh kisai:

i) Hattuom kichi bang adiei: Hattuom kichi khovel a kikepna (system) umsate hilou in Penticost ni a Pasian in (Jesu Khrist) aphukhiet ahi hi. Hattuom umnasan/ atup thupipen ahileh, “Khelna vanga anapuosa, tangawn shina tangdia umsa mihingte hundam/ tungdin kia a gingtute lah ah Pasian leenggam tun ding kia ding, Gingutte hinkhuo leh anasepna ah Pasian min suh thupi ding” chi khu ahi (Mt. 5: 13-16, Tit. 3:1-2, Eph. 2: 10, Phil. 1: 27, Jn. 18: 36, Lk. 17: 20-21). Tamte tup a neiin Pasian in Hattuom kichi ahing phut khie hi (Mt. 16: 18, 1Kor. 6: 20, 7: 23, 2Pet. 2: 1). Hattuom lutung khu Mangpa Jesu ahi hi (Eph. 5: 23, Kol. 1: 18, 2: 10). Nanleh Politics tup ahileh, “Politics in mihingte leenggam (political kingdom) bawlkhiet a, tua sungah tasahlam khantouna, lemna leh muonna umsah ding” chi ahi hi.

ii) Hattuom gamgi hoitan: Tam leitung peidan umsa sunga siltha Pasian in abawl pen bang tupna adiei, system umsate toh kisai bang dinmun a koi ding ahiei chi khu Bible pansan a theisiem ahisih leh a buoihuoi sil ahingsuo ding hi. Hattuom leh politics kibang ahi ichileh Hattuom hing kiphu khietna san in umzia anei sih ding hi. I gensa mabang in, Politics in “Tasahlam khosatna ding vai asai a” nanleh Hattuom in, “tasahlam hinkhuo a abeipei dingte pansan in Hagaulam nna asem hi” (2Kor. 4: 18, Kol. 3:2, Mt. 6: 19, Jn. 4: 13, 6: 27). Hattuom lamkaiten igamgi manghil zen a nasep khat inei chiengun i politics uh asia a, tuamin hattuom sung leh chi-le-nam kal tan ah buoina ahing pieng hi, tuami ziehin Khristian te i gamgi kansan in nasep kidiem mama vai….

iii) Vaisan dan kiheng zel: Politics leenggam ah Kumpiten akul leh poimaw bangin thagum, thatang zangin vai ahawm uhi. Leitung kumpite Sum sen tamna pen khu gamsung humbitna dinga Galvan leina khu ahia, hinanleh Hattuom ah tuabang ahisih a, Pasian leenggam tunding nading, thagum hilou in itna, nunnemna leh ngaidamna chite toh ahizaw hi (Mt. 5: 39, Lk. 6: 29, 2Tim. 2: 24, Isai 53: 7, Mt. 26: 63, Mk. 15: 5, 1Pet. 2: 23).3

b) POLITIC NASEP

i) Koi patawi: Politics in, mimal (politiciante) nasepte uang getna, mimal akan aval a kipatawina leh kitoisangna thu a uang gen mama a, nanleh Hattuom in vangin, “Jesu Khrist tanchin, Khantanhoi aung gen mama hi” (1Kor. 2: 2).

ii) Kidemna: Politics vai a party tuomtuomte kidem tuana, panpi tuom nei a kilang khen in thuneina akituh uhi. Vaihawmna innpi sungah zong vaihawmtu leh apposition a kikhenna aum hi. Nanleh Hattuom tup leh ngim ah tuate aum sih a, Bible in tabangte aphal vawt sih hi (Rom 16: 17, 1Kor. 1: 10, 3: 3, Jude 1: 19).

PASIAN ZAU KUMPI NASEMTE ETTON VAI

Tami toh kisai Bible apat leh leitung vaihawm Pasian jau mibang zat ahiei eaten iphattuompi thei ua, amaute banga Politics isai theina dingun tamlou anuoi ah enkhawm nailai vai ei, amaute ahileh:

Bible sungah:
Bible ah genthei ding tampi umnanleh mi-4 te hinkhuo tomkim in anuoi ah enkhawm vai, amaute ahileh:

i) Pasian zatat mama Danial in Babylon kumpi vaihawmna napi’n athuzaw mama hi. Dan. 4: 27 ah, Danial in kumpi Nebukkadnazzar kungah, “Leengpa aw, ka hing thuhilnate tawpsan inlen pomtah hihen; na khelnate tawpsan inlen sildih bawlin, na gitlouna tawpsan inlen, mi genthei tung ah khotuona langsah in. Tamte’n na nopsahna asusau khamaw sih ding hi” achi hi. Danial in hangsan tah leh chiengtah in leengpa lamdih ana koh mu hi. Danial ahileh Babylon gamsung pumpi ah houtulien leh mipilteng zousie tunga upipa ahi (Dan. 2: 48). Denial in leengpa vaihawmna innsung ah dinmun thupitah nei a, tuami banah aman leengpa dih leh tang a vaihawm dingin thuhil hi. Danial in kumpipa thupia ajuilou ziehin Humpi kulsung ah kumpipan khe nanleh ajuipa Pasian in Humpi hon akipat Danial humbit leh kembit hi.

ii) Joseph in Aigupta a Pharaoh vaihawmna nuoi a upipa khatin ana pang hi. Bible ah Pharaoh vaihawmna ah Jospeh in ana thuhil zeldan imu hi (Gen. 31: 37-44, 42: 6, 45: 8-9).

iii) Baptispa Johan in Kumpi Herod Antipas, amimal khelna ziehin a taihil thu imu hi (Mt. 14: 3-4, Lk. 3: 18-20).

iv) Sawltah Paul in zong Kaisaria thonginn a khum a aumlai in Rom Governor dihtatna leh mani kithununna leh Pasian vaihawmna hing tung ding thu ana taihil hi (Acts 24: 24-25).

v) Exo. 1: 15-21 na sungah Pharoah in Hebrew pasal naupangteng tha chimit dia Order asuo lain, Shiprah leh Puah ten Phoroah thupia sangin Pasian thupia “Tualthat sin” azuizaw ziehun Pasian in aguolzawl hi.

vi) 1 Leengte 18: 4 ah, Jezebel in Guolneite tha siengdia thupia abawl laiin Guolnei Obediah in amaute ahin theina dingun kohawm sungah phuoldap in, nei-le-dawn ding ape ngam hi.

Bible toh kikal Kumpiten Dan (Law) ahing bawl chieng ua, gingtuten douthei ahidan tamna igente apat zilkhiet thei ahi hi.

LEITUNG VAI AH

Leitung ah politician genthei ding tampi a ua, nanleh mi-2 hinkhuo tamlou anuoi ah enkia vai ei, amaute giel ahileh:4

i) William Wilberforce: Ama ahileh 19th July, 1759 in Yorkshire Suolam, Hull, London mun ah apieng hi. Baptist minister leh social activist khat zong ahi hi. Kum 21 (1780) apha in Britist Innpi ah, Hull biel akipat M.P. din ahing lut hi. London khopi ah khotang nasepna ah athuzawsem in a hinglut kia hi. Ama hunlai in agam sung uah “Suoh-le-sal a sum suina umpen abeina din House of Common ah hangsan tahin kum tampi lungkelou in ana tangkoupi hi.” Aman “Abolitionism” a tangkoupi khu Evangelical Khristianity Thugin apat piengkhie/ kilakhie ahi hi. Aman Pastor John Newton, “Amazing Grace la phuopa leh Suoh-le-sal a kimat ahoiloudan mukhepa” khu “Spiritual adviser” din azang hi. Kum tampi lungkelou a atangkoupi nung ashi masang deu ni-3 akivat ni’n tami (26th July, 1833) “Slave Abolition Act” innpi ah lemsah (pass) in ahing um hi. Suoh-le-sal a sum suina suhbei ahinua in William Wilberforce siltup dang khat ahileh, “Silhoilou, Umdan; gamtatdan toh kisai a gitlouna, khelna, tatletna, hiamngamna leh adang dang Khristian gamtat dia kilawmlou zousie Vaihawmna Innpi tungtawn a suhbei ding. Kikhailup ahiei, kigawtlup ahiei ten silhoilou asuhbei sih ding a, mani phalna kipie a nasep zousie khu gitlouna kipatna ahi” chi khu apeipi ahi hi. Tuachi’n, William Wilberforce zong Flu natna ziehin damzou nonlou in 29th July, 1833 kum in, ama tahsa kum 73 apha in Codagon Place, London, United Kingdom ah amuolliem tahi. Kumpi vaihawmna sunga Issue khenkhatte Political action henglam dan theina dia Pasian jau leh thudih dinpi ngam te’n gamsung kivaihawmna ah heng lamdang thei ahidan ahing zilkhe sah hi.

ii) Martin Luther King Jr: Ama ahileh 5th January 1929, Atlanta, Georgia, United States ah ana pieng hi. Ama zong William Wilberforce ma banga Bible zilsahna jui a dingkip khat ahi hi. Aman apeipi/ atangkoupi ahileh a gam sunga “Mingou leh mivom kikal a kidaidanna suh bei ding” chi khu ahi hi. Tamte toh kisai a “Civil Right Movement” lamkaitu khat ahi. Aman khotang a kihuotna leh kimudana adim khu pansan bulpi a anei ahileh “Kingaidamna” chi khu ahi. Ama kitheina khat ahi kialeh “I Have a Dream” chi khu ahi. Luther a dingin ngaidamna khu “Khotang kisesa tungding tha na dia khotang sietna douna dinga Khristian galvan ahi” ahi hi. Ama ahileh 4th April, 1968 kum in, ama tahsa kum 39 ahi in Memphis, Tennessee mun ah ana muolliem tahi.

William Wilberforce leh Martin Luther King Jr bang conviction nei Khristian politician igam in akitul moh hi. Thutah, thudih, leh thuhoi thei pumpum a Innpi vaihawmna sunga ahing tou chieng ua Sum amla nazieh a amite gentheina leh chimohna, nuoisie a umte manghil thei tu khangin Politician kidei nonlou akihi man in, Pasian jau, khotang leh amite bitna dia Sum amla lou akidei mama tahi, na chisih uh mah, nou zong…?????

KHRISTIAN POLITICIANTEN ATHEIDIA HOI KASATE

Tami toh kisai kei mimawl mudan tamlou mawltah in hing kum vang ei. Khristian Politician khat na hileh, na thei dingte:

i) Galvan toite panpina toh na lawching leh amaute deidan leh lemsahpi khu na jui ngai dinga, na mite gentheina leh chimohnate ah dei bangin panpina nasep nabawl jou sih ding hi.

ii) Khristian politician kahi na kichi ngal leh, Vote Capture, Force leh Sum hawm a kaidin kisah sin len, tamte panglou a na mite deisahna toh kaidin kisah ngam zaw in.

iii) Khristian khat kahi, mi piching khat kahi na kichi ngal leh, na Vote suilai a na thugente, thuchiem na bawlte manghil vawt sin!!! (Thuchiem bawl a zawploute kihai tuonlou ahi hi).5

iv) Gam leh muol (leitang) Chi-le-Nam kal bitna susedia Sum tampi piadia jol a na um hun chieng un, Sum sangin Gam leitang leh chi-le-nam bitna ding telngam hing hizaw ta un.

v) Lawchinna ding deina zieh in na mite (Innsah, innhang) dougal melma a ki-en din siemkhiet sawm sinlen, dougal melma a ana ki-en kha aum tah uleh nang vangin tuate beisah sawm zaw in.

KHRISTIAN DIHTAH NA HILEH NA MANGHIL VAWTLOU DING THUTE

Southern Manipur khu 99. 99 % Khristian dihtah kahi kichite tenna khopi ahi hi. MLA, MDC Election hun chiengin i Khristian hina uh mansuote (mipite ka genna ahi) akihi paipai ziehin, tutung “MLA Election” hun a ithei ding ua hoi kasah tamlou anuoi ah hing koi vang ei, tuate ahileh:

i) Ei mihingte pen imel ipuom uh akibatlou dung jui un, I support uh zong kibang lou hi. Tami thu ah nang hing support bang hing supportpi lou na innsah, innhang, na mite khu dougal melma et in en non sih vai… “Hattuom Lamkaite” (Upa, LCC Members, Khanglai leh Nupawl) Vote Campaign na zousie a VIP dan in kikoi non sin, na support bang hing support pi louten “Pulpit tunga Pasian thutah na gen chiengin, Vote sui a na dieng koikoi hing muten na Pasian thugen hing gingtatpi lou thei ahi man in pil vangin”. MLA Term khu Kum 5 ahia, Pasian gam nasep khu tawngtawn ahi, heipen lawching leh na ut ei? Telsiem mai in…

ii) Hattuom lamkai (Khristian dihtah) kahi kichi in, Vote zuo, ama Vote loupi khe ngam na hileh kingaitua in. India Kumpi’n zong “one man one vote” achilai a, nang na Vote na jua, nang Vote loupi (midang a, mi shisate Vote) tampi na khiet thei leh, na hina leh na dinmun theichienlou Khristian hikha ding na hi, kigelpha in!!!

iii) Biehna ngaisah manlou zen a dieng koikoi Hattuom lamkai (Khristian) namah? Juou leh nal a thugen in dieng koikoi non sin, “Limlang (Mirror) khu khatvei ake (broken) leh tua Limlang ah na mel hoitah nou in kilang nonlou ding hi, akilat chiengin 2/3 vel in na kimu ding hi.” Na deisahpen pen khu Thumna leh na Vote manpha pe lechin tua kan a hoizaw umlou hi, tami khel a na gamtat leh Khristian Dan (Law) palsan nahi kia ta ding hi….

iv) A Vote manpha Rs 500, 1000, 2000 ah jua thei Khristian nahi leh kigel pha in (vote bon kikhiet theilou zia jua). Na Vote na juajua zieh a igam hichituh a khangtou lou ahilam geldoh hun ahi tahi. Tutung a zong na jua kia leh na maban zong apeisa hun bang veve ding ahi, maban a khantouna na dei leh tunin na VOTE JUA non sin aw….

v) Candidate kunga Sum nget teitei ding, bangja ama khat election masang a loikhiet teitei ding lunggel na (i) neite uh tawpsan hun ahita hi, na deisah leh na panpi theina ding lampi sui inlen panpi zaw in, tami’n khonung adia chidamna ahizaw ding hi.

vi) Na Khristian sakhuo suh beinuom a lunggel nei, hing soisah zing Party (any party) khu Khristian dihtah kahi kichiten tuami party izawp ua i support thei zing uleh, na hina khu adihlou ahizaw ding hi, aziehpen “Miel leh Vah umkhawm ngailou ahi”.

Tamte manghil non sih vai, “Election ibuoipi bangun Pasian thutah buoipi thei talei moh… election thu ihoulim ut bangun, Pasian thutah houlim ut zaw talei moh… Mi khat Kum 5 sung alal dih i (na) deisah tuh in, mi dang khat a tawngtawn mun ding ngaikhopi thei talei moh… mi khat a dia shi ngap a na pan bangin, nang adia hing shi Jesu Khrist adin shi ngap zaw talei, igam ah muonna leh bitna, khantouna dih hing um mai ding hi”.

AKHUPSITNA

Khristian khat in Politics asaipen khelna ahi pai sih a, nanleh i politics saidan6 pen Bible leh gam kipuodan toh akituo sih leh khelna ahi hi. Politics in khotang ah hoina, muonna leh bitna hing tun ding ahi chi theina pai, lal utna zieh a Khristian dan toh kituolou pi a Vote gu (capture), Vote lei, force zang ichite Pasian masang ah sil kidah huoi ahi hi (Ps. 119: 137, Jer. 9: 23-24, Ps. 117:7). Hattuom leh Politics tup-le-ngim kibanglou ahi man in Hattuomte (Khristian te) politiciante vanzat a ipan kha ding ikiven ding leh ipilvang mama ding uh ahi (Vote capture, Voluter, force a nasem dia Sum a goi). Politics asia kachi sih a, nanleh Khristian ten Politics isai dan poimaw kasa hi, Khristian ihi ngal leh dihtatna toh sai theilei ka nuom mama hi (Mika 6: 8). Arch Bihop Desmond Tutu in, “Khristianna leh Politics peikhawm thei na chi leh bang Bible e na sim?” chin agen hi.

Atawpna din, “Tu ahing tung ding election ah Khristian dihtah kahi na kichi ngal leh Na Vote Jua non sin, Sum dei man in Vote Capture, Voluter din kipe khe non sinlen, na hinkhuo tomnou na nei sung pen Pasian leh na mihinpite chidamna ding, bitna ding leh muonna tuntu hizaw sawm tavai, Hattuom lamkai (Belampu) na hileh hing pilvang in, dachia Pulpit tung a na Pasian thugen minten angai nuomlou kha ding zen in Vote campaign in hing dieng koikoi nonsin” chi khu simtute kunga ngatna ka hing bawl hi. Thupil khat in, “Na tawm (Jump) masang in na tuhna ding en chienin” achipen manghil sih vai aw….. na Vote nang ma thuneina ahi, na zatkhiel leh nang leh na gam miten athuoloh ding hi, pilvang chiet vai.

Khristian ihina utoh Pasian leh Bible deidan bangtah a Vote khe thei chiet tadin simtu zousie Mangpa Pasian in hing guolzawl chiet tahen