TULAI A KITHANG WY (The World Is Yours)

0

Recent Visitors: 5

TULAI A KITHANG WY (The World Is Yours)

Rev. Dr. M. Thangboi ZouThumapui: Amasan tam Article giel theidia deisahna hing pieh Diamond Jubilee, Souvenir Boardte tung ah ka lungdam thu ka hing gen masa hi. Tukhang a Khangtha tampi hinkhuo suhsetu, tualeh mi tampi Jail bang zutsahtu WY khu “The World is yours” china ahi. Lamka khopi sunga tengte houlimna khat ka jadan ahileh, “Salamte kungah WY, hanglamte kungah Kani kithang” chi khu ahi, adih-le-dihlou ken theilou! Masangin, khanglaiten, RP Tang ineh leh ki fresh chin ana kithangsah ua, tun WY tang ineh leh kipil hing kichikia tazel ei. Tunin igam in ibuoipi mama uh WY hing kipat khietdan, anehte theikhiet ding dan leh a nehte hinkhuo a siltungte mipi theidin ka laibu bawlsom (Suokhiet hinai lou) Tuhun a Khristian Khanglaite Buoina apat ka hing lakhiet ahi. Tami khu atheisate adin ninhuoi maithei nanleh athei nailoute adin kiven theina ahi ding kalam et zieh a ka hinggel ahi hi. Simsuo nailoupin phun sinlen, simsuo phot in, thutha mukhe ding nahi!

  1. Amphetamines:

Methamphetamine (WY) in mihing damtheina lam pang suhkha mama a, tualeh innten, louten zong suhkha in. Mihing tahsa tungah Huoh (brain), lunggel lam zong napin asuhkha mama hi. Tam damdawi khu mi suhalthei chi khat ahia, anehte tam bangin speed chite leh upper chite in akihan uhi. Tami khu nehtho, hiptho leh kikapthaw theidia siem ahi. Tami’n huoh (brain) sungah nna asep ziehin akikap tute mipil Socratet, Sherlock Holmes te bang khop a pil kisahnate apia a, Vompi nangon toh kihau thei ding khawp in a tha uh thousah mama hi. Imut suohtheilou khopin mi asuhalthei a, ahin nguina leh luotnan atunzel/ azui leng hi. Blood Pressure (BP) susang in Stroke a chau thut thei ahi.

Methamphetamine kichi khu WY (World is yours) loutang ahia, tami loutang sungah 25-35 mg um ahia, tami loutang beilamtah a addict theinadia kihal khu ahileh Caffeine 45-65 mg jong pang ahi. Tami Methamphetamine in a kick apia khiet in Cardiovascular toh central Nervous system aha suhkha mama hi. Akikap sawt uleh a Sam (hair) uh pul in a Ha (teeth) uh amuotsah a, ann duhna abeithei hi. Tami bawl danthei a pil sangin theilou in mozoh lei apil huoizaw ding hi.

  1. WY hing kipatna Gam leh akisiem dan:

Tam khamthei WY khu Burma gam akipat hing kipan khie ahi. Burma ten India gam a damdawi (medicine) Ephedrine leh Pseudae-phedrinete agam sung uah kailut un, tuate hing halkhawm in WY ahing siemkhia uhi. Burma akipat in Moreh, Moreh akipat in itenna Lamka khopi, Manipur vel ah ahing polut/thelut un, tuni’n Lamka khopi akipan Zoudawn tan ah khanglai sangnaupang (student) tampi hinkhuo suhsetu, hatpente lah a khat in ahing pang tahi.

Tam WY addict mi nichin in a pung deudeu a, adia in Manipur leh Mizoram gam ah Sangnaupangte (student), khanglai hoi tahtah kum 16-45 kikaal te addict atam diah ua, akhente kum 10-15 kikal (Teenage) tampi zonga addicted hita uhi. Tam khamthei a kick hun sung ahileh naikal 12-14 (hrs) sung ahi. Tuhun a khamthei tenglah a a kick sawt pen akizang khu WY ahi hi.

  1. WY kizatdan:

Tam WY tang khu Tui in aki dia in, atui kilah doh a kikaptho a zangloi, ahilou leh atam zawten Bottle ah tui ah thun/ sung un, Silver lekha atungkhu a koi in, ahal ua, akhu (smoke) khu ahiplut thaw zel uhi. Khanglai tampi’n bangzie a WY khu khamthei dangte sanga atelzaw uh adiei? ichileh:

  1. Tha kipetuo tobangin gel uhi.
  2. Bawlding sepding asui ua, asepkhat poupou semdoh dingin athanuom uhi, tamte zieh hidin misiem ten asuikhie uhi.
  1. WY nete kitheikhiet dan:

Tam khamthei nehte atahsa tung ua ahing kilatkhiet (addict) chiengua kithei khietnate ahileh:

  1. Ann duh nonlou uh
  2. A tahsa uh gong
  • Amaisuoh uh dup
  1. Siengthoutah a kivon nuom nonlou uh
  2. Apdeduh a um uh
  3. Lungvai zing
  • Nu-le-pa kal (sex) a thanuom nonlou uh (zi neite),
  • Shi utna lungsim nei uh
  1. Mani kitha utna lungsim neisah/ tun uh.
  2. Lunggel dudah neithei nonlou uh
  3. Ngaituona mawngmawng neithei nonlou uh
  • A tahsa uh nasa (pain), leh adang dangte ahing neichieng un WY Addict lampang ahita uhi.

WY toh kisai a doctor siemte’n, anehte damtheina suhkha ahidan asuikhiet/ amukhiet dan uh ahileh, tam banga ahi:

  1. BP: 140/86 mmHg
  2. RR: 16/min
  • Weight: 60 Kg (WY akimawl masang (aneh masang) un 68kg apha uh),
  1. MSE (Mental Status): Lungmang hiei hiei, lunggel mumal neilou
  2. KFT (Kidney): Urea 57
  3. LFT (Liver): Sgpt: 140 (ana suse manta), chin amukhia uhi.
  1. WY Addicts ten atopsan chiengua asiltuote uh:

WY nete a addict nuo ua ahing topsan sawm chiengua ahinkhuo zatdan uh ahileh:

  1. Imu theinonlou uh
  2. Atahsa tung zousie uh na (pain) sah uh
  • Shi ding azau uh
  1. A mang (dream) uh sie
  2. Ann du nonlou uh
  3. Kapkap mai uh
  • A BP uh sang
  • A lunggelte uh amanglam bang in ngaisut uhi.

Tualeh a addict saten ni 25 bang ahing bawl nonlou chieng un atahsa tung a natna piengkhete ahi leh: (a) Ekho (b) Lungtang natna nei (c) Gilna leh adang dang tampi tuo uhi, chin misiemten asuikhia uhi.

Akhupsitna: Bible in, “Leitung pumpi nei inlen, na hinna tan lechin nangdin bang aphatuom diei” achi bangin, “The World is Yours” (WY) chi inlen, shi lechin bang metna aum diei! WY neh a mipil a kham mukhie tunitan in leitung ah muding um nailou hi. Setan in mi masa Adam & Evi asol zawna san khu khu, “Pasian bang a pil ding chi khu ahi” (Gen. 3: 4). Tuhun in mi tampi (aneh a kimante leh ajuote) Jail tanna, innsunga mittui luon kipatna leh motna hing tuntu khu WY ahilam theichiet lei ka nuom mama hi. Khanglaite aw, WY neh zieha mipil Socratet, Sherlock Holmeste loi bangdin kigel vawtsih un! Amaute banglou in, zumdan theilouna, gitlouna, mitha ngapna, gutatna leh atawpna ah muolphou tah a shina hing tunzaw ding ahiman in, WY khu pilna kipatna hilou in sietna kipatna, minsiet kipatna leh Jail bang jut kipatna hizaw ahi. Pilna kipat nakhu, Laisiengthou in “Mangpa jau khu pilna bulpi ahi” chin (Prov.1:7) agen a, tualeh “Koi pou in pilna atasap leh Pasian kungah ngen heh” chin (Jak. 1:5) agen a, WY ah ngen in sui un chivawt lou hi.

Khamthei a lungnopna leh kipahna tahtah umlou hi, a kick um sung kipah leh lungnopna mudan in thei zong lechin, a kick ahing bei chiengin jumna, kisiana, muolphou kisahna hing tun veve ding hi. Tangtawn kipahna leh lungnopna khu Mangpa Jesu Khrist kungah aum a, Ama kungah tua kipahna leh lungnopna suizaw chiet din, simtu zousie (adia a WY a saltangte) Mangpa Pasian in WY saltanna (anehte, ajuote) pan zalenna hingpe chiet tahen, chi ka thumna ahi hi.