DUTHUSAM KISIA DILDEL (DREAM SHATTERED)

 

Nitah chiang Shillong sung a vah lei decoration thupi mama. Aizawl jong thupi mama. Sum nei lei Christmas sale munchin ah um. Innlam ahileh sip vawt. Christmas leh i Chrstian gualnop teng bawllou a i umum leh Setan leh Meitei te kipah ding hive aw. Duty ki kheel a noptheipen a bawlpat ding hi ta ve aw. Kei ngai dan.

 

(Himi article khu Christmas tun kimni chiang a ka sermon gige khat ahi. Gospel Tangkou ah 1998 in kasua masapen hi. Khum in Ruth Messenger ah tuachiin ka belap a Khristian Thukizakna, Lungdamna aw, Gospel Tangkou, Hinna Thah, Muanna Aksi te ah Christmas message dan in 2012 in ka pia hi. Ka lawipa Dr. S. Thangboy Zou in tami kasim in mittui naptui toh ka kiteh hi achi jiehin midangte hinkhua zong sukha tei va chi’n tam “Duthusam kisia dildel” chi article ka hing tuang sah hi.)

 

1. Date 14 in ka it mama leh ka seppi pa Meng (Dongzachin Samte) in hing na mualliam san hi. Pa Meng ngai huai na maijen chia. Galmanlou in kang nuasiata hi. 

2. Date 18 a inn ka tun leh Date 19 in Tripura a Missionary Galhang Rev Thanghaulian (T. Suantak) in a mission field mun ah hing na mualliam san kia hi. Hibang Pasian gam a ding mi manpha, gospel galhangsan in hing mualliam san chuh pammai na maijen e!

3. Tunia hia tung a igen Pasian suahte gel a ji leh tate’n Christmas ama uh umlou a, ut-le-da leh mang ding ahimai ta uhi.

4. Midang khenkhat natna jieh a hospital a mang ding pawl leh

5. Frontline a duty te’n Christmas a hi ding bangtah a, a manlouna uh akum 2na ding hita.

6. Khenkhat a pian a pat a theingailou relief camp a mang ding jong tampi i um uhi.

7. Khenkhat sum leh pai umlou jieh a mite een sang a inn a kikulkhum ding pawl jong um ding hi. Tholom pejoulou, vanthah leijoulou.

8. Kei jong ka Chrstmas plan teng uh abawn in ki chai deer hi. Bangma duthusam in pailou hi. Ji leh ta kim leh dam a i um pou leh vuina ding um mongmong lou hi. 

9. A tung a igen bang a sungkuan kimnonlou a lunghelna toh mang ding jong i um ding uhi.

 

Abang-abang hileh tutung Christmas buaina tuamtuam jieh a duthusam bang a mang nonlou dingte ading in noumaimai na hi sih uh, Lawm tampi ihi uh chi etsahna in himi article tungtawn a iki hamuan tuana hi dingin ka hing suakia hi.     

                           

Tuama bangin nidanglai in singtang khua khat ah tangval khat a duthusam kise dildel khat tangthu houlim vai. Ama pen anu leh apan ana beisan na sawtsimta hi. School kaijoulou in khut nasep toh neh leh taah sui hi. Mi chitah leh taima ahijiehin a khut nasep a paihoi mama hi. Mi neilou leh taga himah leh ahausatna mama pen Pasian nei a, Pasian a ki ngam mi ahi. Nidang lai Egypt a Joseph ma bangin nihoi lou leh ni hoi ah zong Pasian ma bel vevaw hi. Ama uh tawndan ngeina bangin a khua ua nungah nou Pasian thei mama khat ama a dingin a nu leh apa ten naupang nou apat  ana khamsah uhi.  Tu in pen khum tangval  zong teirol hun khel in pichin lam manawta hi. Khujiahin maban inkuan bawl ding dan angaitua panpanta hi. A ji khaam pen toh ki-it in ki ngaiin hun tampi mangkhawm uhi, hinanleh tahsa a ki suhkhah kipawl chite  a ngaidan uh hi himhimlou hi. Khujiahin akiten ni ding ngah chanchan uhi. 

 

Tualeh agam dinmun entalei ama uh pen namneu kumpi lian nuai a um ahi uhi.  Thakhat thu in a kim apam a namdangte leh a gam sung opkhum ten a khua uh hing bulu in hing soisah jel uhi. Tuachiang numei naupang dawmlou in sugenthei uhi. Nungah noute bang enla mama uhi. Tualeh tangvalte zong bawlgenthei jel uhi. Hibang kaal ah ama gel zong akin lam a kiteng kin a, insung bawl a maban ding ngaitua ngaita hi. Hi tangvalpa zong hibang a, a sen ngainou a ji kham toh kiteng ding hun naita in a nasep habawl mama hi. Khawvel a a-itpen toh kiteng ding chi angaitua chiangin a nasep gimnate zong bei jel in a thanopna in jou in mataal mama hi. Hibang a thanuam leh kineem tah a Pasian kung a athum lai in amang a zong matphahlou, a ngaituana zong um kha lou a ji kham a lawmnu in nau ana pai ta maijen hi. Tuapen juau thuthang maimai chia angaisahlou hamham vangin a tahtah ana hita hi.

 

Hibang tungta chi athei jaan in pen ama adi’n ih mut dan umlou hi. Jaan khovaah in ki ngaitua a Pasian mai ah naungeh ka in kap hi. Hibang tangval lungkhau leh pasal tulaiham a paa mama hinapi naungeh bangin kap tamai hi. “Aw kamanglam hijaw mai leh maw! Kum hijat ka kinepna tuni’n pape tualpuang lah a totchil bang ahita hi. Maban a hunnop ding ka lamet maijen toh maw tu in guntui bang leluanta hi. Hibang mai ahi maw hinkhua kichi. Aw Ka Pasian hite bang nagenna e? Na min a kikem siang a na min ging a siangthouna ding a aman pete hibang a, a kinepna uh beisah mai ding na hi maw? Na min siangthou gingtate nang midangte mai ah hibang a mualphou sah mai ding maw!” chi in hase tahin thumta hi. Ama uh custom dan tah in pen khum tangvalpa’n hita hen achichi ni apat tua a nungah gainu pen suang a selup ding ahita hi. Ana juausan a tangval  tung ah ahinna kingata hi.

 

Hibang a lawmnu hinna jauhuai tah a umlai in jaan khawvah in kingaitua a thumna nei tahi.  “Aw, ka it pen jing a nang suang a hing kisep lum ding hita hia maw. Ka bang chi etngam ta diai? Bangin ahing bawl lawmlawm a hitan ana tung na hiai? Ken kang bang chi etngam ding lah? Aw ka sil tuah te ka jalmang himai le maw?” Chi in hase tah in kapkapta hi. Atawp in alawmnu pen asilouna ding in pan lah sawmta hi. Bangchibawl leng silou ding bang chi leh ka hun khe thei diai chia akingaitua laitahin Pasian Angel siang akung ah hing kilah hi. Tua tangval khu Joseph ahi a anungah gai pen nungah siangthou Mary ahi. Tami a pat in Christmas hing kipan hi. Tungnungpen ah Amin loupi tahen. Lei a a itte tungah lemna lengta hen!

 

Tukum bul apat duthusam bangbang na nei ei? Duthusam kisia bangjat nang tuah tou ei?  Mi khenkhat  kumbul a duthusam hoitah nei nanleh Christmas tungmanlou a duthusamteng tualpuang lah a pape kichilthaang bang hita hi.Tate maban kinep mama lai a tapa muang mama khamthei in ana ne lum dehdehta chi zong um ding hi. Akal chiang i duthusam tung ma lah a aselam ngen ase lamngen in hing vuh khum hi. Ahoi i lamet lai in asia hing tung a, kipahna i ngah lai in kaana hing tung hi. Aw, nang gingtu lunglel leh liangvaina mittuiteng, na mualphouna teng, na lungnatna teng, na lawsapna teng, na mansuah teng abawn in Pasian in record bu ah khat zong manglou in keem hi chi thei in aw. Tunia hibang duthusam kisia leh kehgawp na tuah khah leh nangmai na hi sih chi thei in, misiangthou pai masate leh na kim na pam a na khualjinpi te’n zong tuah uhi chi ka hing gen sah ut hi. Na mittui luanpi ding lawm nahau hi. Pasian in Ama inaisem nading leh ama mai iki pum ngah thei nading in i muanteng ineiteng i kinepna teng hing lahmang sah jel hi. i plan teng zong hing tawhkehsah hi. 

 

Joseph a lawmnu ama ading a gin umlou chi athei in a lungtang nat ding dan chuh… Ei hilei suanga seplum masa pen kihiding a, ki lungkim nai lou ding hi. Aman ahileh ama lungtang natna thutuam hitaleh a lawmnu (agalnu) ading in sil hoithei tawp bawl sawm nalai hi. Pu Ironside in “itna umjia ahileh i itte adinga  ahoi penpen bawlsah” chi ahi. Joseph itna khu itna tahtah ahidan kilang hi. Eite itna ahileh mani makhual itna ahi jiehin mite i itna bang a ahing lethuhlou chiangin ki it jounonlou hi. Pasian in ahileh eite gilou sasa in zong hing it veve a ei ading a hoipen hing bawl sahsah nalai hi. Hibang a lungtang nasah penpen zong hutkhiah sawm teitei mipha Joseph tung ah Pasian in bang gualjawlna zong itlou ding ahichi i mu hi. OT a  Joseph in zong a unaute tung ah sil hoi theitawp bawlsah hi. Hibang lungsimlian pua ahijiehin Pasian in mun sangpi ah tawisang hi. Tunia i genpa Joseph zong Pa Pasian in leitung tahsa  ah atapapa hi dingin muang ngam tamaijen hi. I galte ading a silhoi I bawl leh Pa Pasian in mialnate hing vah sah in, I kaanate laamna in hei a, avaigeita akichaita ichite zong Aman a bawl dan khat thei veve hi.

 

Pasian in Joseph ading a Mary apia sa tawmkhat ading a alakia in Joseph ading in hamsa mama ding hi. Hinanleh Pasian testing hoitah in pass hi. Pasianin job hausahna, tanu tapa te toh gualjawl hi. Hinanleh Pasian in pe tam ut sem ahijiehin tawm khat adingin lahkhiat sah phot hi. Job Pasian in a test nateng  ang pass jou a Pasian in nuamman ang pia kia ni chu thupi hita lou maw! Na hinnkhua a Pasianin ang pia sa bangjat vei ang lahsah kia tai? Ang piah lai a ikipah maijenjen toh thakhat thu in abanban in hing mangmang tamai jen hi. Unau aw Pasian in ang piasa ang lasah kia leh phunlou in ngah jaw in Aman atam sem hing pe kia ut leh hing suhpung sah ding hi jaw hi. Pasian in Abraham ateh nung avuai nung in tapa Isaac pia hi. Tuapen kum tampi a, athuchiam amual suahna ahi. Abraham in nikhatni chiang ka tapa hing ngen kia va chi mawngmawng a lungsim ah um khalou ding hi. Hinanleh manglam bang hial in Pasian in “na tapa Isaac in hing bia in” chi hitamai hi. Abraham adingin theisiam hamsa ding hi.” Tua nang nget kia ding bang dia nang piah e” chithei khopin lungnat huai ding hi. Hinanleh Ginna pa in vang a amu dan ana tuam hi. Pasian a muanna lianseng ahi jiehin ana laan ngamla lou hi.

 

Pasian in koima leiba balou hi. Pasian in eima deibang sangin Ama deibang tangtung sah ut jaw hi. Eima deibang ichi na lam in Pasian program ki vaigei sah jel hi. Pasian in alahsahte apia kia chiangin atuang aval ahi dan thupi hi. Tutung October leh November ha sung mai a ka khual jinna ding Siliguri, Delhi, Gwahati, Imphal kal flight ticket cancel man mai in Rs 15,000/- val ka seng hi. Mawt huai kaki sa mama a ka pawsiam thei sih hi. Pammai kasa ta lua hi. Hinanleh Pasian mai ah bang chi dan e chi ka thumthum hi. Judah kumpi kei bang ana tuah ngei khat ka lungsim ah hing kilang jel hi. Kumpi Amaziah in Temple a sum jat louna ding a, ana jang kha hinan leh kisia a Pasian kung a bang chi ta ding chia a thum  lai in jawlnei in “Mangpa’n hisang a tamjaw ahing pe thei hi”(2 Chronicle 25: 9) chi’n va hamuan hi.

 

Pasian min thupina dingin November ha zong bei nailou in mun tuamtuam apat in lamet lou in double phial in ka mu kia ta uhi. Tualeh Job a tate leh anei agouteng Pasian in laahsah bei a hinanleh aman “Mangpa’n ahing pia a Mangpa’n alamang kia hi. Mangpa min phat in um hen” chi’n Pasian min phat veve hi. Tuachi’n Pasian in pekia mai hilou in a double ngen in pe kia hi. Belam 700 mang khu tu in 1400 pekia hi. Sangawngsau 3000 shi khu tu in 6000 hita hi. Bongtal kop 500 shi khu tu in kop 1000 chingta. Sangan 500 khu tu in 1000 in kibelap ta hi. Ta pasal 7 leh numei 3 ana shi a hinanleh tu in Pasian in amaute ganhingte bangin  double a pelou in ta pasal 7 leh numei 3 ma pia hi. Ajiehpen ana sisate khu ashi hilou ua thawkiana ah kimu kia ding uhi. Tuajiehin angeijat ma pie hi. Hinanleh ata numei te khu gamsung a melhoipen tulai ham hileh miss world, miss universe  chite bang ngen a melhoi ahi uhi. 

 

Pasian in alahmang sa te a double ngen in pekia jungjung hi. Thupi e maw! Pasian in Abraham apia kia ni in tangtawn daiding  thuhun pia maijen hi. Pasian in tuni’n Joseph apat in Mary lamang jawlou in aki itna uh detsah semsem ahi jaw hi. Pasian in alah mang ichite alamang hijawlou in a supung semsem hi jaw hi. Unau, na ta gammang vahvaite zong hing kilekia ding a, na pasal gammang in zong inn lam hing juan kia ding hi, na sum na pai na mangsahte zong tampi toh hing  kia ding a, na jatatna, na thupina te zong hing pai kia ding hi. Ajiehpen Jaleenna dah ging in, Suatahna kawlni suahta hi.

 

Unau tukum paisa a Pasian in ang lahmangsahte jiaha na lung ngaingai a, na suunsuun te khu Ama’n atamjaw leh a hoijaw in hing pekia ding hi. Bethelem a naungeh hundampa lam juan in kilekia lechin na hinnkhua hing ki panthah kia thei ding hi. Aman hinkhua ki sesa, gopsa, thaangsa, muatsate bawl phat theina power nei hi. Jungolvei, khamthei bawl, nochi zuah, tualthat te leh siatna a saltang, bat a saltang, jawnkhalna a saltang, natna a saltang leh buaina tuamtuam a saltang tampi te jalenna peta hi. Panpitu neilou, gumtu neilou, belding neilou, kinepna neilou, maban neilou, hinkhua mumal neilou, hinsan theilou a mialnuai a tou nang leh kei ading in Bethelem ah khua a hing vahta hi. 

 

Mangpa’n mihing ngaituana leh plan in a huam phahlou Van nopna leh kipahna in tutung na thomhau lai in a Vantung mite jangin hing veta hen! Also visit this

 

Christmas man nop leh Topa Thupha!

Shalom Shalom!!