Thirsty souls simtute i damchiat na uh maw?

Jacob Taona Mol apat in, Chibai leh shalom!
Himi message khu i nungkum a ka sua sa hinanleh, Vanlalchankima Ralte in “I TA KANI E, CHATUAN ATAN” Na Ta ka hi, Kumtawn a din asah ka ngai apat thupi tah in ka deithah kia hi. A sahdan lung len huai in zong a key sang mama hi.

Tuni’n “Mangpa khu na hagau toh um ta hen” -The LORD be with your spirit” – 2 Tim 4:22

Na Ta Ka Hi, Kumtawn a Di’n

Tami laa khu Stacy Punte apat in ka na ngaingai a, ahin tuzingin Vanlalchanhima Ralte apat kang ngai chuh! Lamdang daih hi. A kai dan leh a aw bol dan te’n Pasian a adangtaah dan a langsah a, thupi tah a Pasian Hagau in mang(zang) in ahing keehgopsah ngiingei hi. Nang zong ngai in lamdang in thupi hi – “I TA KA NIH E, CHATUAN ATAN; LALPA NANGIN MIN CHELH TLAT RAWH.”

Tulai kipahna leh lungkhamna ki mix in ka dim hi. Alangkhat ah Pasian hoina in ahing vuhkhum a, kipahna ngen in ka dim hi. Tualeh alangkhat lam ah thawmhauna leh lunglauna’n ka dim hi.

Ka nu ki vuiliamta. Kei leh ka innkuante Lamka va zin ngainonlou. Navah huai khop mai. Ka tate result ki phuangta, abawn ua hoi deu a pass. Tate School suty ta. I lungsim thoveng sengseng thomhau huai zawzen. I bawl ding tam sengseng apatna ding kitheilou. I plan tam ahivangin Shillong khua vot leh liap sengseng ahiziahin khoimah ki pot khe ngamlou. Tutung ka tate toh Home Alone part 1 apat 5 tan ka etsuah sawm uhi. Tua khu hunop pen himai ding hi. “ka Thupui Ber” chia Mangpa phatphat khu himai hi.

Kipahna ding tampi Pasian hoina in ahing vuh lai in, alangkhat ah thomhauna thuuh tah in ahing vuh dim a, bang sermon leh bang laa te in ahing zou sih hi. Ka Bible sim anop mama a, tukum a dingin Bible a 2veina Psalm laibu tan ka simzou a, hinanleh masawn theilou in Psalm bung 1 a kipat kia kasawm hi. Bible busua teitei ding chi saltanna pat in ka zalenta hi. Tu in nop tah a Psalm laibu a golvah or pawi bawlbawl pan kia ding kahita hi. Ka nusia ngam sih hi. Anop talua hi. U Rev Haozalian vang Bible changkhat ah jong sawtpipi nusia theilou in teng den leng hi

Tutung pen frontline te thuahpina a quiet Christmas ding chi’n ka Christmas tree uh lianpi jong midang kape kheta uhi. Quiet i chi vang a DRY chuh hisahlou thei ahi. Biahinn a mipi ankuang luilou jieh leh gualnop umlou jieh a DRY ding china hilou hi. Quiet ichi vang a Pasian Hagau Ve-na toh nou dildel a zatthei ahi.

Tulai hibang ka thawmhau leh ka lunglenna in ka hinna bangma in halsah joulou hi. Nidang a tuhun chiang a ka ngai gige late in jong hing thousah butlou hi.

Jingkaal teng in pu C. Lalzarmawia laphuah: Tracy Punte in asah “I TA KA NIH E, CHATUAN ATAN” chi khu ka hamsah gige hi. Midang sah jong ka limthei sih a, Punte a sese in ahing khoih hi.

Jingkaal matah a tual a bohkhup a “Mangpa Nang a ka hi, na ta ka hi. Kumtawn a ding a nang a kahi” chia Pasian ang a naungeh bang a ki tuhlut khu ka bawlpiih pen ahi.

Ka bible zillai in, ka suty khat in tour pai in khat vei Singngat a ZCC biahinn ah chialpina ka nei hi. Tuahun lai a numei naupang kum 10 ding vel hing kilatna ka manghil thei sih hi “Mangpa kumtawn kumtawn a nang ading ka hita” chi’n pulpit gei ah kapkawm a, athum ka ja hi. Tua naupang nu khu tuni’n piching in, Innsuangta hi. Hinanleh athumna ka bilha ah ging den hi.

Tualeh hi laa in “Setan in nichin nang ma taisan dingin hing beih, hatlou kom hinanleng jong kang paisan ut sih” chi toh “paidan ka siam sih” chite lung khoih himai hi.

I Mangpa Jesu’n mipi 5000 val a vaah zou in, a gil uh vaahta ahi ding a, a banban in pei mang siangta uhi. A tawp in a nungjui 12 te beh umta hi. I Mangpa’n “nou jong peimang na ut uai mah?” chi’n dong hi. Tua hun lai in Peter in “Khoi ah ka peimang ding uai. Nang kumtawn hinna THU na nei thuai(ngal) a” chi’n dawng hi ( John 6:68,69)

I Mangpa Jesu’n mite peimangsan dan thuah ngei mama ta, thei siam ta mama ahi chiangin, a ma nungjui te tanpha in pei mang san ding in gingmaw ta mai hi. Hih leitung ah koima muan leh gintat ding ana neilou bang hi. Ahi’n gintat huailou tahin Peter in “Mangpa bang ding a koute lawmlawm nang nawmang sawm lah? Koute’n ka inn – kalou uh, ka zi – ka ta uh nusia a nang kang jui uh a sam veleh, Nang kung apat pot uleng khoi a ka pai tuan di uai? chi’n hangsan tahin dawng hi. I Mangpa’n jong ama lam a pang tahtah ihi leh ihilou thei ut jel hileh kilawm hi.

Song of Solomon 2:16 ah, A ki-it nungah leh tangval tegel in : “Ka it khu kei a ahia, Kei jong ama a ka hi” chi in a ki-itna uh kitheisah tuahtuah in ki thahsah gelgel hi.

Tangval in a nungah it mama a it sengseng jiehin gingmaw hi. Hinanleh a nungah in “Bangchi dan a midang toh nang ginmaw lah? Nang a ka veleh. Nang ding a ginum tah a um ing a, midang mongmong ka itna pelou ing a, ka bang chi gen kan ding lah? Nang chilou koima a, ka hi mongmong sih a, ka hi sawm mongmong shi hi. Nang chilou ka it, leitung ah koima dang um sih ei U Thang aw” chi’n a it dan avelvelin puangkhia in detsah hi.

Tuania i laa in agen dan a ka thei khu : Mangpa nanga ka hi. Kumtawn ading a nanga ka hi ta. Hing tudet inlen hing hasua sin. Midang in bang gen in hing theisiamlou nan uleh Mangpa nang vang, na hing ngaidam leng a, ka khelna te na manghil a, na chiamte sih hi. Nanglou koima a ka hi sih” chia Pasian kung a ki tulut tuntun dan in ka thei hi. A thuuh mama Pasian ngaina laa ahi.

Pasian in vang Ama a ihi lam ei sangin hing thei jaw hi. Ka neulai in kelnou hing piangkhia pan anu nung a del kawikawi a, anu’n a taisan kawi kawi leh a deinonlou ahi lam ka theikhia hi. Hia kelnou in a gen ut chuh “Nu, nang ta ka veleh. Bang ding a nang taisan lah? Koi nu dang ka nei sam ah? Bang ding a nang taisan e?” chia adel kawikawi ahi.

I Pa Pasian in Ama ta, Ama teelsa, Ama tatsa ihi lam hing thei mama hi. I Mangpa Jesu’n Ama ji-khaam siangthou, Ama toh kumtawn a kiteeng ding, Ama sisan a chiamtesa, Ama leisa, Ama tatsa, leh Hagau siangthou a mohor namsa ihi lam uh thei mama hi.

Ahi’n achang a nungah in a tangval sepai gam a um kung ah “Lungmuangtah in um in U Thang aw, nang a ka hi, Nang ading in ginum tah in ka um na hi. Bang chi leh jong ka hing juausan sih ding, gin-um tah in kang na ngah ding” achi khu a u Thang adingin poimaw mama hi.

A chang ah singtang papi khat in MLA pa kung ah hangsan tah a va pai in “nang mi ka hi a, khatvei jong kang nusia sih hi. Nang a ka hijiehin ka khuo ua pat in jong hing ki delmang sawm hi. Nang kang jui jiehin ka khuomite apat in tuambawlna tampi ka thuah hi” chi’n va ki phin thei hi.

I pa Pasian in Ama a ihi hing thei mama nanleh jong eite’n Ama angsung ah, Ama kengbul ah, Ama nai ah, Ama a ihi dan hangsan tah a iva ki puan a, iva ki suh thah jel khu poimaw mama dan ahi. Church leh society tuamtuam ah jong membership renewal form ki hom jel hi. Tuama bangin Pasian a ihi uh chi iva ki puanthahthah khu thilhoi ahi.

Adiahin itahsap i poimaw hun a Ama angsung a hasie tah a “Mangpa nang a hilou kama? Bangding a midangte banga na hing bawl e? Bang ding a midangte lah a nang mualphou sah hita? Bang ding a hing panpi lou? Bang ding a ka hing poimaw penlai a hing nungngat san na hia? Bang ding a ka poimaw ka buai hun a hing kilaah lou? Na tate na mite ngaisah lou ding nama? Na min a ki han leh na minsung na mite, na tate a poimaw hun a ngaisahlou a gaal et mai ding nama?” chi’n I pa kung ah iva kiphin thei hi.

Ahilouleh “Mangpa nang a ka hi. Hing nuasia sin, Hing kitheimaw bawl sin. Hing maijumsah sin. Hing kem in, Hing tudet in, Hing kawidet in, Na angsung ah hing huaitup in” chi’n i thum thei hi.

“Nang a ka hi” chi thumna in Pasian a i kingap dan, Pasian i poimaw leh i muandan suhlatna leh suh detna khat ahi.

Tuaziahin i Hundampa Mang Jesu in hing thei mama na pi “nang a ka hi Mangpa” chi a iva ki lat thatha a, iva ki tuhlutlut khu Ama kipahna hi ding in ka ging ta hi.

Tualeh Ama angsung a Ama i poimaw dan i va gen baan ah, ei jong Ama a ding a ginum ding, Ang poimaw na mun a pang ding, Ama min a mun awng khat a ana ding ding a iva ki latthah zel zong poimaw hi.

I genut pen jong siangtah in genthei sih hai. I lungsim in vang thei. Tuajiehin “Mangpa nang a ka hi, na ta ka hi. Hing nuasia sin, hing pomdet in, hing nual sin, hing pampai sin, hing ve in, hing kem in, hing panpi in, hing mualphousah sin. Ka hing han hi. Ka hing kap hi. Ka hing beel hi. Ka hing tudet hi. Ka hing kiluai hi Na Puanmong ah ka ki khai hi. Na keng ka tawp hi.” chi’n thum mai vai.

Mangpa Hagau Siangthou in tami article mawltah apat in hing houpi ta hen!

Shalom
Christmas lamdawn nopta in..Visit FB

Pastor Dr. Dongzathawng
Fellowship of Thirsty Souls and Hungry Hearts
Devotional # 102( Vol. 4)